Aysel Teymurzadə: MƏN ARTIQ BU YOLA GƏLMİŞƏM VƏ DAYANMAĞIN HEÇ BİR MƏNASI YOXDUR

"Eurovision" müsabiqəsində Azərbaycanı təmsil edən və bürünc medala layiq görülən gənc sənətçi "Ayna"nın suallarını cavablandırır

Onun bioqrafiyası Bakı ilə, təhsilə önəm verən bir ziyalı ailəsilə bağlıdır. Lap erkən yaşlarından ona çalışqanlıq, təşəbbüskarlıq aşılanıb. Ata-anası onun təhsilinə ciddi fikir veriblər. İntellekt güclü olanda, adam özünə inamlı olur.

Aysel Teymurzadə 1989-cu il aprelin 25-də Bakıda dünyaya göz açıb. Atası ixtisasca jurnalistdir. Uzun illər Azərbaycan Dillər Universitetinin fəlsəfə kafedrasının müdiri olub. Anası elmlər doktoru və Bakı Slavyan Universitetinin müəlliməsidir. Özündən 16 və 14 yaş böyük iki bacısı var. Uşaqlıqda üzgüçülük, bədii gimnastika ilə məşğul olub, balet məktəbində dərs alıb. 9 yaşında incəsənət məktəbinə daxil olub, 12 yaşında məktəbin həndbol komandasına üzv qəbul olunub və idmanla ciddi məşğul olmaq fikrinə düşüb. Eyni zamanda, xarici dilləri öyrənməyə başlayıb, hazırda ingilis, alman, ispan, rus və türk dillərində danışa bilir. 14 yaşından xoreoqrafiya ilə məşğul olmağa başlayıb. 2006-cı ildə Bakı "İntellekt" liseyini bitirib. 2001-2005-ci illərdə fortepiano dərsləri alıb.

Hələ uşaq vaxtlarından oxumağa meyil edib. "Pöhrə" və "Tələbə baharı" müsabiqələrinin iştirakçısı olub.

2004-cü ilin avqustunda ABŞ-ın Texas ştatında High School-a daxil olub. 2005-2006-cı illərdə burada oxuyub. Bu müddət ərzində Amerikada gənclərin musiqi müsabiqələrində çıxış edib və hətta qızıl medala layiq görülüb. Azərbaycana qayıtdıqdan sonra "Yeni Ulduz-4" telelayihəsində iştirak edib.

Hazırda Azərbaycan Dillər Universitetinin beynəlxalq münasibətlər fakültəsinin tələbəsidir.

- Siz ali məktəbə sənədlərinizi verəndə tam ayrı ixtisası seçdiniz, bu sizə mane olmayacaq ki?

- Sizinlə müsahibəmiz mənə çox doğma olan bir məkan barədə başladı. Bilsəniz, müəllimlərimi, qrup yoldaşlarımı görüb necə sevindim. Adi bir tələbə kimi, gündə dərsə gəldiyim vaxtlar yadıma düşdü. İnşallah, yenidən universitetə qayıdacağam, axı mən təhsilimi dayandırmamışam. Sadəcə, "Eurovision" müsabiqəsinin məşqlərinə görə bir müddət dərsə gələ bilmirdim. Və mən müğənni və diplomat ixtisaslarını yanbayan qoyub, hər ikisinin üzərində çalışacağam.

- "Yeni ulduz" müsabiqəsi sizə bir o qədər də uğur gətirmədi, buna baxmayaraq bir neçə ayın içində siz Azərbaycanda ilk dünyamiqyaslı ulduza çevrildiniz. Daha çox "Yeni ulduz" müsabiqəsinin seçim turuna gələndə həyəcanlanırdın, yoxsa "Eurovision" müsabiqəsinə?

- "Yeni ulduz" müsabiqəsində mən ilk səhnə addımlarını atırdım, onda 16 yaşım vardı və heç də heyifslənmirəm bu müsabiqəyə getdiyimə görə, amma "Eurovision" dünyamiqyaslı bir müsabiqədir. Sözün düzü, mən "Eurovision" müsabiqəsinin seçim turundan keçəndə o qədər də sevinmirdim və deyirdim ki, mən o zaman sevinəcəm, nə vaxt ki, Azərbaycanı layiqincə təmsil edəm. Son altı ayda isə, ümumiyyətlə, həyəcan və məsuliyyət hissləri get-gedə artmaqda idi. Mənim arxamda konkret insanlar, bir komanda dayanırdı, mən isə, sadəcə, icraçı olmuşam. Mən bizim xaricdə yaşayan soydaşlarımıza da çox minnətdaram ki, mənə bu qədər dəstək oldular və məni bu yerə layiq gördülər. Hələ də həyəcanım soyumayıb. Gördüyünüz kimi, ölkəmizdə toy-bayram davam etməkdədir. Küçədə hamı üstümə hücum edir, şəkil çəkdirmək istəyir, hamının sevincini çox gözəl başa düşürəm və heç kəsə yox demirəm. Və mən özümə qarşı olan bu diqqət və məhəbbətin ömrüm boyu müşayiət etməsini arzulayıram. Sözün açığı, final gününə yenidən qayıdıb, o hissləri bir də yaşamaq istəyirəm.

- Gələn "Eurovision" müsabiqəsində bizi kimin təmsil etsini istərdiniz?

- Yalnız özüm.

- Hansı ölkənin nümayəndəsini təhlükəli rəqib hesab edirdin.

- Yalnız Norveç iştirakçısını. Bunu əvvəlcədən hiss edirdim.

- Sizcə, nəyə görə birinci yeri qazana bilmədiniz?

- Gəlin etiraf edək ki, Azərbaycan kimi gənc ölkə üçün 3-cü yeri tutmaq qalibiyyətə bərabərdir.

- Araşla bir səhnəni bölüşəcəyini biləndə ilk reaksiyan necə oldu?

- Sözün düzü, eşidəndə ki, Araş ölkəmiz üçün mahnı yazıb, şoka düşdüm. Əlbəttə, yaxşı olardı ki, mən tək çıxış edim, amma Araş mənə çox kömək oldu. Mən əvvəl düşünürdüm ki, Araş təcrübəli müğənnidir və məni səhnədə əsmə tutacaq, amma əksinə oldu. Və çıxışdan əvvəl mən Araşa müraciət edib onu sakitləşdirirdim ki, Araş, xahiş edirəm, təsəvvür et ki, sən artıq səhnədəsən və oxuyursan, həyəcanlanma. Özüm isə o qədər həyəcanlı deyildim. Bütün Azərbaycan xalqının dəstəyini hiss edirdim. Araş mənə peşəkarlaşmaqda kömək oldu. Bir insan kimi də, gözəl dostdur.

- Sizcə, Moskva uğurunuz Azərbaycanın dünya ölkələri arasında tanıdılmasında, onun müsbət imicində nə kimi bir element oldu?

- Bizim çıxışımızdan sonra Azərbaycanı daha da gözəl tanıyırlar və ilk yaranan assosiasiya onlarda Aysel və Araş cütlüyü olur.

- Demək olar, dünyanın bütün öndə gedən ölkələrində çıxış etmisiniz, bəs hansından heç getmək istəmirdin?

- Stokholmdan.

- Müsabiqə zamanı hansısa təzyiqlərlə rastlaşdınmı?

- Bu təzyiqlər hələ mən müsabiqəyə hazırlaşanda burada başlamışdı. Bir çox mədəniyyət işçiləri mənim heç nəyə qadir olmadığımı bildirdilər və hətta uduzacağıma qarantiya verirdilər. İndi, sadəcə, onların gözlərinə baxmaq istəyirəm ki, görüm mənə nə deyəcəklər?

- Sizcə, daha çox hansı vacibdir: şanslı, yoxsa istedadlı olmaq?

- Hər ikisi vacibdir. Əgər insan istedadlıdırsa, amma şansın yoxdursa, o, qabağa gedə bilməz.

- Sözsüz ki, hamını sizin gələcək planlarınız maraqlandırır...

- Həddindən artıq təkliflər gəlir mənə. Hazırda gündə bir ölkədən konsertə və yaxud verilişə dəvət alırıq Araşla. İnşallah, qrafikimizi qurandan sonra hər yerdə çıxış edəcəyik, Azərbaycanın adını ucaldacağıq. Mən artıq bu yola gəlmişəm və dayanmağımın heç bir mənası yoxdur. Sözsüz ki, mahnılar da yazdıracağam, kliplər də çəkdirəcəm, lakin ilk öncə Vətənin musiqi sənətini xaricdə təmsil etmək istəyirəm. İstəyirəm ki, məni bütün dünyada bir azəri qızı kimi tanıyıb çağırsınlar.

Sevinc İSMAYIL

Ayna.-2009.-6 iyun.-S.19.