İnsan alveri ilə məşğul olan mütəşəkkil dəstəyə hökm oxundu

Ağır Cinayətlərə dair İşlər üzrə Məhkəmədə insan alverində təqsirləndirilən Sənubər Məmmədova, Bayram İsgəndərov, Anar Rzaquliyev, Zeynal Zeynalov, Nazim Zeynalov, Namiq Həsənov, Rafiq Əliyev, Sədaqət Muxammetyazova, Çiçək Ələsgərovanın məhkəməsi başa çatıb. İttiham aktına görə, təqsirləndirilən Sədaqət Muxammetyazova əxlaqsızlıq yuvası təşkil edərək gəlir əldə etmək məqsədilə qadınları fahişəliyə cəlb edib.

Belə ki, S.Muxammetyazova yaşadığı Gəncə şəhəri, Atatürk küçəsi 197, ev 1, mənzil 42 ünvanında əxlaqsızlıq yuvası təşkil edib. Şəmkir rayonu, Düyərli kənd sakinləri Esmira, Şəlalə və Şəhla Bayramova bacılarını gəlir əldə etmək məqsədilə fahişəliyə cəlb edib. Həmin qadınları yaşadığı mənzildə müxtəlif kişilərlə dəfələrlə görüşdürüb.

Bundan əlavə, S.Muxammetyazova tanışı Bayram İsgəndərovla cinayət əlaqəsinə girərək fahişəliyə cəlb etdiyi Esmira Bayramovanı həmin şəxsə ötürüb. B.İsgəndərov isə Esmiranı kirayə tutduğu evə gətirərək orada saxlayıb, evdən çıxmağa imkan verməyərək onunla qəddar, qeyri-insani və ləyaqəti alçaldan rəftar edib, üstəlik, qanunsuz olaraq azadlıqdan məhrum edib. Həmin müddət ərzində B.İsgəndərov E.Bayramovaya qarşı zor tətbiq etməklə və onun köməksiz vəziyyətindən istifadə etməklə onunla dəfələrlə cinsi əlaqədə olmaqla təkrarən zorlayıb, dəyəri 100 manat təşkil edən qızıl üzük və sırğalarını, 40 manat dəyərində olan mobil telefonunu əlindən alıb.

Bundan sonra B.İsgəndərov tanışı Çiçək Ələsgərova ilə əlbir olub cinayət əlaqəsinə girərək E.Bayramovanı cinsi istismar məqsədilə ona təhvil verib və bunun müqabilində 50 ABŞ dolları alıb.

Z.Zeynalov və N.Zeynalov isə E.Bayramovanı oğurlayaraq bir neçə gün saxladıqdan sonra qızı digər şəxsə 150 ABŞ dolları müqabilində satıblar. Bundan sonra R.Əliyev E.Bayramovanı cinsi istismar məqsədilə gizlətmək üçün Goranboy rayonunun Səmədabad kəndində yaşayan həyat yoldaşı Sənubər Məmmədovanın evinə aparıb. İki ay müddətində E.Bayramovanı həmin evdə saxladıqdan sonra ona ümumvətəndaş pasportu alaraq avtobusla Türkiyəyə yola salıb.
N.Həsənov isə E.Bayramovanı Türkiyənin Düzcə rayonuna apararaq orada fahişəliyə cəlb edib. Bir neçə ay sonra E.Bayramovanın viza müddəti bitdiyindən N.Həsənovla birlikdə Gəncəyə qayıdıb. R.Əliyev onları Gəncədə qarşılayıb, Esmiranı üç gün saxlayıb və sonradan yenidən Türkiyəyə yola salıb, bununla daha üç ay zərərçəkmişi cinsi istismara məruz qoyublar.

Məhkəmədə təqsirləndirilən şəxs qismində dindirilən S.Muxammetyazova ona qarşı elan edilən ittihamla özünü təqsirli bilməyib: "2006-cı ilin əvvəllərində Gəncə şəhərindəki "kolxoz" bazarında Şəlalə adlı bir qızla tanış oldum. Şəlalə mənə evdən qaçdığını, qalmağa yeri olmadığını bildirdi. Buna görə də Şəlaləni evimə apardım və 10 gün bizdə qaldı. Həmin vaxt hamilə olan Şəlalə mənimlə birlikdə bazara gedib xadiməlik edirdi. Şəlalə ünvanlarını mənə demədiyindən sahə inspektoru Zaura müraciət edib evimdə bir qız qaldığını bildirdim. Zaur evə gələrək sənədləşmə apardı və Şəmkir rayonuna bununla bağlı məlumat verdi".
Bir neçə gün sonra Zaur Sədaqətlə Şəlaləni Şəmkir prokurorluğuna çağırdıqlarını bildirir. "Prokurorluğa gedəndə Şəlalənin atası, anası və Esmira adlı bacısı da orada idi. Qızı təhvil verib Gəncəyə qayıtdım. Bir neçə müddət keçdikdən sonra Şəlalə yenə də Şəmkirdən qaçıb bizə gəldi. Şəlaləni anasının evinə aparanda qadın bildirdi ki, onun üçün bir adam tapım və Şəlaləni ərə verək. Bundan sonra Şəlaləni götürüb Gəncəyə qayıtdım", - deyə S.Muxammetyazova ifadəsində bildirib.

Sədaqətin qızı Gülşirin Zeynal adlı oğlanla görüşür, Zeynal isə dostu Bayramla tez-tez S.Muxammetyazovagilə gəlirmiş. "Bayrama təklif etdim ki, Şəlaləni alsın. Bayram da razılaşdı. Şəlalə evlərinə qayıdandan sonra Bayram və Zeynalla birgə Şəlalənin valideynlərinin yanına elçi getdik. Bayram bir ay ərzində Şəlaləgildə qalıb. Təxminən bir ay sonra Bayram və Şəlalənin bacısı Esmira axşamüstü bizə gəldi. Bayram bildirdi ki, Şəlalə ruhi xəstədir, Esmiranı istəyir. Bundan sonra Esmira ona dedi ki, otaqların birini ona ya satım, ya da kirayə verim. Mən isə bununla razılaşmadım", - deyə S.Muxammetyazova qeyd edib.

Məhkəmədə təqsirləndirilən şəxs qismində dindirilən Bayram İsgəndərov özünü qismən təqsirli bilib: "Sədaqət Muxammetyazovanı təxminən üç ildir tanıyıram. Bir gün Sədaqət mənə bildirdi ki, evində Şəlalə adlı qız qalır və o, hamilədir. Sədaqət təklif etdi ki, biabırçılığın qarşısını almaqdan ötrü onunla birlikdə Şəlalənin yaşadığı kəndə gedim. Özümü Şəlalənin, guya, Rusiyada yaşayan əri kimi təqdim etdim ki, onun problemi olmasın. Şəlaləni, onun bacıları Esmira və Şəhlanı, onların valideynlərini birinci dəfə orada gördüm. Sonradan bildim ki, Şəlalə, Esmira və Şəhla Sədaqətin yanında fahişəliklə məşğul olurlar.

Şəlaləgilin evində 15 gün qaldıqdan sonra Gəncəyə qayıtdım. Gəncədə Esmiranın razılığı ilə Sədaqətin evində onunla görüşürdük. Sonradan Esmira möhkəm xəstələndi və buna görə də onu Gəncə şəhəri, Hərbi şəhərcik-38-də kirayə tutduğum evə apardım. Bir müddət sonra ona dərman almaq üçün pul tapa bilmədiyimi görüb Esmiranı əvvəllər tanıdığım Çiçək Ələsgərovaya verdim".

Təqsirləndirilən Anar Rzaquliyev də ona elan edilən ittiham üzrə özünü təqsirli bilməyib: "Bayram İsgəndərov mənim dostumdur. Bir dəfə Bayramgilə gedəndə məni Esmira ilə tanış edib. Lakin mən nə Esmiraya yemək aparmışam, nə də onunla yaxınlığım olub".

Məhkəmədə təqsirləndirilən şəxs qismində ifadə verən Çiçək Ələsgərova isə özünü təqsirli bilib: "Maddi vəziyyətim pis olduğundan uşaqları dolandırmaq üçün məcbur olub fahişəliklə məşğul olmuşam. Esmira ilə məni Bayram tanış edib. O bildirdi ki, Esmira xəstədir, onu saxlamağa, müalicə etməyə və ev kirayəsinin pulunu verməyə imkanı yoxdur. Mən də Esmiranı öz evimə gətirdim. Həmin vaxt Bayram məndən 50 dollar borc pul aldı və bir həftədən sonra qaytardı. Həmin pulu Esmiranın müalicəsinə xərclədim. Sağalandan sonra Esmira da mənimlə birlikdə fahişəliklə məşğul olurdu.

Bir dəfə Esmira ilə birlikdə "müştəri"nin yanından qayıdarkən Zeynal maşınımızı saxladıb Esmiranın saçından tutub döyməyə başladı. Sonra məni də maşından çıxarıb döydü və Esmiranı öz avtomobilinə oturdub harayasa apardı. Həmin vaxt Zeynalı tanımadığımdan Esmiranı tapa bilmədim. İki gündən sonra Zeynal mənim qaldığım evə gəldi və hədə-qorxu ilə Esmiranın paltar və sənədlərini götürdü. Bundan sonra Esmiranı görməmişəm".

Məhkəmədə təqsirləndirilən şəxs qismində dindirilən Zeynal Zeynalov özünü təqsirli bilməyib: "Taksi sürücüsü işləyirdim. Tanışım Sədaqət Muxammetyazovanın xahişi ilə idarə etdiyim avtomaşınla Sədaqəti, Bayram İsgəndərovu və Esmiranı Şəmkir rayonunun Düyərli kəndinə aparmışam. Orada Bayram deyib ki, Esmiranın əridir. Esmiranın qohumları onlar üçün toy edib və bundan sonra Sədaqətlə geri qayıtmışıq. Bayram isə Şəmkirdə qaldı. Bundan sonra mən Esmiranı görməmişəm".

Məhkəmədə təqsirləndirilən şəxs qismində dindirilən Nazim Zeynalov, Namiq Həsənov, Rafiq Əliyev də özlərini elan edilən ittiham üzrə təqsirli bilməyiblər. Məhkəmədə təqsirləndirilən şəxs qismində dindirilən Sənubər Məmmədova özünü təqsirli bilməyərək deyib ki, Rafiq Əliyev onun rəsmi əridir və ondan bir uşağı var: "Lakin uzun müddətdir faktik olaraq birgə yaşamırdıq. Bir gün Rafiq bacısı Mətanət və Esmira adlı bir qızla yaşadığım evə gəldi. Mətanət Esmiranı Şəmkirdə yaşayan baldızının qızı kimi təqdim etdi. Mətanət bildirdi ki, Esmiranı narkoman əri döyüb, onu rəsmi ərindən boşatdırmaq istəyir. Onlar bir gün bizdə qaldıqdan sonra çıxıb getsələr də, üç gündən sonra yenidən qayıtdılar. Mətanət xahiş etdi ki, Esmiranın boşanması üçün sənədlər hazır olana qədər bizim evdə qalsın. Bir neçə gün sonra Mətanət və bacısı Şəfəq gələrək Esmiranı özləri ilə apardılar. Bundan sonra nə Esmiranı, nə də Rafiqi görmüşəm".

Məhkəmədə zərərçəkmiş şəxs qismində dindirilən Esmira Bayramova bacıları Şəlalə və Şəhlanın fahişəliklə məşğul olduğunu təsdiqləyib: "Gəncə şəhərində Sədaqət Muxammetyazovanın evində yaşayırdıq. Sədaqət bizim üçün müştəri tapır və pulu həmişə özü alırdı. Bir gün Sədaqət bildirdi ki, guya, Bayram Şəlaləni ailə qurmaq məqsədilə qaçırıb. Sonradan Şəlalə bildirdi ki, hamilədir. Bayram və Sədaqət onu qaçırandan sonra fahişəliklə məşğul olmağa məcbur ediblər. Sonra Bayram məni zorla maşına mindirərək başqa bir ünvana apardı. Məni hədələyərək evdən çıxmamağı tapşırdı, özü isə evdən çıxarkən qapını bağlayırdı.

Bayram evdə olmayanda dostu Anara tapşırırdı ki, mənə nəzarət etsin. Bayram mənim dəyəri 40 manat olan telefonumu, 100 manatlıq qızıl əşyaları əlimdən alıb. Sonralar məni Asəf və Çiçək adlı şəxslərə satdı. Bir müddət keçdikdən sonra Nazim və Zeynal qardaşları məni zorla Mətanət adlı qadının evinə apardılar. Zeynal dedi ki, məni Mətanətə satıb. Sonradan Mətanət və Namiq məni Türkiyənin Düzcə rayonuna gətirib fahişəliklə məşğul olmağa məcbur etdilər".

Məhkəmənin hökmü ilə Sənubər Məmmədova 4 il, Bayram İsgəndərov 9 il, Anar Rzaquliyev 8 il 6 ay, Zeynal Zeynalov 9 il, Nazim Zeynalov 5 il, Namiq Həsənov 5 il, Rafiq Əliyev 9 il, Sədaqət Muxammetyazova 5 il, Çiçək Ələsgərova isə 2 il sınaq müddətinə azadlıqdan məhrum edilib.

Zeynalov, H.

Ayna.-2009.-24 yanvar.-S.18.