BSU-da çex dili və Mədəniyyət Mərkəzinin kitabxanası açılıb

Bakı Slavyan Universitetində (BSU) Çex Dili və Mədəniyyəti Mərkəzinin kitabxanası açılıb.

BSU-dan SalamNews-a bildiriblər ki, Çex Respublikasının Azərbaycandakı səfirliyinin maliyyə dəstəyi ilə təmir və texniki avadanlıqla təchiz olunmuş kitabxanada çex dili və mədəniyyətini daha mükəmməl öyrənmək üçün əlverişli şərait yaradılıb.

Kitabxanaya Çex Respublikası parlamentinin senatoru Martin Tesarjik tərəfindən 45, BSU-nun sıx əməkdaşlıq etdiyi Çexiyanın Ostrav Universitetinin fəlsəfə fakültəsindən isə 200 kitab hədiyyə edilib. Buraya bədii ədəbiyyat nümunələri, Çexiyanın tarixi, iqtisadiyyatı, coğrafiyası və çex dili üzrə nəşrlər, lüğətlər və ensiklopediyalar daxildir.

Açılış mərasimində BSU-nun rektoru, AMEA-nın müxbir üzvü, professor Kamal Abdullayev deyib: “Tələbələrimizin yüksək ixtisaslı kadrlar kimi yetişməsi üçün çexiyalı dostlarımızla birgə əlimizdən gələni etməyə hazırıq. Böyük hörmət və məhəbbət hissi ilə həyata keçirdiyimiz bu işdə bizə yaxından dəstək olduğuna görə səfir R.Matulaya və ölkəmizin Çexiyadakı səfiri Tahir Tağızadəyə dərin minnətdarlığımı bildirirəm. Mən çox sevinirəm ki, bizim Çexiya ilə əlaqələrimiz daha da güclənir və inkişaf edir. İnanıram ki, bu kitabxana sizin biliklərinizin dərinləşməsində əhəmiyyətli rol oynayacaq.”

Səfir Radek Matula Çex Dili və Mədəniyyəti Mərkəzinin fəaliyyətə başlamasından qısa müddət keçməsinə baxmayaraq çexşünas mütəxəssislərin hazırlanmasında gördüyü böyük işlərdən danışıb. O, yeni fəaliyyətə başlayan kitabxananın tələbələrin biliklərinin artmasına yardımçı olacağına inandığını bildirib.

Hacı Tofiq

Azad Azərbaycan.- 2013.- 23 may.-S .7.