Yeni “Bibliopoisk” (“Библиопоиск”) sistemi istifadəyə verilib

Yasamal rayon MKS-inə axtarış sistemindən istifadə etmək hüququq verilib

Bakı şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminə (MKS) “Библиопоиск” (“Biblioaxtarış”) axtarış sistemindən istifadə etmək hüququ verilmişdir.

“Библиопоиск” sistemində məlumatlar xronoloji ardıcıllıqla 1600-cü ildən bu günə qədər toplanmışdır.

“Библиопоиск” axtarış sistemi Elektron kataloqların axtarış sistemindən fərqlidir. Burada axtarış üçün daha geniş imkanlar yaradılıb, biblioqrafik təsvirlərin bazası daha dolğundur və kitabxanaların Elektron kataloqlarında olmayan biblioqrafik təsvirlərin bir çox elementləri mövcuddur. Məhz “Библиопоиск” vasitəsilə oxucular onlar üçün əlyetərliyitəmin edilmiş bütün sənədlər massivinə, o cümlədən ixtisaslaşdırılmış kitabxana repozitarilərinə və İnternet saytlarında axtarış aparmaq imkanı qazanırlar.

“Библиопоиск” kitab və sənəd haqqında məlumatların daha asan yolla, tez tapılması üçün müasir və rahat axtarış sistemidir. Burada kitablar haqqında, jurnal məqalələri, dissertasiya və avtoreferatlar haqqında ətraflı məlumat mövcuddur. Məlumatları (təsvirləri) həm online rejimdə oxumaq, həm də köçürmək mümkündür.

Axtarışın nəticələrini sosial şəbəkələrdə də paylaşmaq mümkündür. Arayışın köməyi ilə axtarışa verilən məlumatın dəqiq yazılması izah edilir. (müəllif adı, sərlövhə və jurnalın adının yazılması)

Sənədlərlə açıq axtarış sistemi (openacces) – kitabxanada məlumat axtarışlarından ən vacib şərtdir. Google və Yandex kimi standard axtarış sistemləri dəqiq nəticələrlə yanaşı, çoxlu “informasiya tullantısı” meydana gətirir: istifadəçiyə lazımlı materialları tapmağa əngəl yaradan reklam, yoxlanmamış, dəqiq olmayan materiallar və s. Belə vəziyyət elmi materialların axtarışında problem yaradır. Məhz buna görə kitabxanada ixtisaslaşmış axtarış sisteminin və ya “discovery” sisteminin olması vacibdir.

“Discovery” axtarış sistemləri dünyanın bir çox kitabxanalarında geniş yayılmışdır. Library Jurnal saytının məlumatlarına görə ABŞ və Kanadanın 60% kitabxanalarında ixtisaslaşmış axtarış sistemi mövcuddur.

Azərbaycan kitabxanalarında “Библиопоиск” sisteminin istifadəsi kitabxanaların müasir informasiya texnologiyalarına yaxınlaşması üçün mütərəqqi addımdır.

“Библиопоиск” sisteminin bazasında kitab və sənədlərin biblioqrafik təsviri yerləşdirilib. Burada müxtəlif janrlarda kitabları axtarmaq üçün geniş imkanlar yaradılıb. “Библиопоиск” sistemi 2017-ci ilin yayında istifadəyə verilmiş yeni və müasir layihədir.

Sistemdən Rusiya Federasiyasının, Belarus, Ukrayna, Qazaxıstanın və bir sıra xarici ölkələrin kitabxanaları istifadə edir. Hal-hazırda “Библиопоиск” sistemi rus və ingilis dillərini dəstəkləyir. Sistemin interfeysinin Azərbaycan dilinə tərcümə edilməsi barədə danışıqlar aparılır.

Bundan başqa, Azərbaycan Respublikası Prezidentinin 20 aprel 2017-ci il tarixli Sərəncamı ilə yaradılan “Azərbaycan ədəbiyyatının virtual kitabxanası”nın linkinin “Библиопоиск” yerləşdirilməsi barədə danışıqlar aparılır.

Azərbaycan Respublikası Prezidentinin "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı"nın icrası ilə əlaqədar 2009-cu ildə yaradılmış Milli Toplu Kataloqun linkinin “Библиопоиск” yerləşdirilməsi barədə razılıq əldə edilib.

Hacı Tofiq

Azad Azərbaycan.- 2019.- 5 fevral.- S.5