Qocaman jurnalist, əsl ziyalı

Teymur Əhmədov - 90

Tanınmış, qocaman jurnalist “Respublika” qəzetinin baş redaktoru Teymur Əhmədovun 90 yaşı tamam olur. Teymur Əhmədov 25 dekabr 1930-cu ildə Şəmkir şəhərində anadan olub. 1936-cı ildə ailəlikcə valideynlərinin vaxtilə deportasiya olunduğu İrəvana köçüblər.

1949-cu ildə Qərbi Azərbaycanın Zəngibasar rayonunda orta məktəbi qızıl medalla bitirib, təhsilini Bakı Dövlət Universitetinin filologiya fakültəsində davam etdirib.

Teymur Əhmədov sonradan AEA-nın Nizami adına Dil və Ədəbiyyat İnstitutunda aspirantura təhsili alıb, "Nəriman Nərimanovun dramaturgiyası" mövzusunda namizədlik, "Nəriman Nərimanovun yaradıcılıq yolu" mövzusunda doktorluq işi müdafiə edib.

1984-cü ildə nəşr edilən "Nəriman Nərimanov" kitabı rus, ingilis, fransız və ərəb dillərində kütləvi tirajla nəşr edilib.

1965-ci illərdə "Azərbaycan" jurnalı redaksiyasında şöbə müdiri, sonra isə AEA Nizami adına Dil və Ədəbiyyat İnstitutunda baş elmi işçi, Cənubi Azərbaycan ədəbiyyatı şöbəsində müdir müavini, 1988-ci ildən aparıcı elmi işçi olub.

Azərbaycanda bir neçə qəzetin baş redaktoru kimi fəaliyyət göstərib. 1995-ci ildən isə "Respublika" qəzetinin baş redaktorudur.

2007-ci ildən başlayaraq Azərbaycan mətbuatında dərin iz qoymuş "Füyuzat" jurnalının 100 il sonra yenidən təsisinə başlayan Teymur Əhmədov həm də "Füyuzat" jurnalının baş redaktorudur.

T.Əhmədovun hələ İrəvanda ikən dərc etdirdiyi məqalə və kitablarda Azərbaycanın zəngin ədəbi və mədəni sərvətə, soydaşlarının yüksək intellektə malik olmalarından gələn qürur hissi həmin milli-mənəvi keyfiyyətlərlə rus, erməni, gürcü, ukrayn və digər xalqların kifayət qədər savad və nüfuz sahibi olan nümayəndələrindən ehtiramla bəhs edirdi. O, Azərbaycan şair və ədiblərinin bədii irslərindən bəhrələnmələrini həm də sözdə təsdiqləmələrindən də güc alır. Ona görə bu cür tarixi və ədəbi faktları öz yazılarında - məqalə və kitablarında diqqət mərkəzində saxlayıb xüsusi vurğulayır. Sovetlər Birliyinə daxil olan xalqların həm ziyalı elitasının, həm də sıravi nümayəndələrinin Azərbaycanın ədəbiyyat və mədəniyyət təmsilçiləri, ayrı-ayrı nümayəndələri ilə yaranıb formalaşan qarşılıqlı dostluq və əməkdaşlıq duyğularının kökündə daha çox Azərbaycanın intellektual zənginliyi, mənəvi- əxlaqi kamil, istedad və səmimiyyəti dayandığını görür və vurğulayırdı.

Professor Teymur Əhmədov elmi kadrların hazırlanması işində də səmərəli fəaliyyət göstərir. Onun elmi rəhbərliyi ilə iyirmidən çox adam müxtəlif mövzularda dissertasiya müdafiə edib. O, onlarla gənc tədqiqatçının rəsmi opponenti olmuş və ya dissertasiyanın avtoreferatına rəy verib. Otuzdan artıq kitabın (elmi və ədəbi) redaktoru və ya rəyçisi olub. Respublikada ədəbiyyatşünaslıq elminin təşkilində Əlaqələndirmə Şurasının elmi katibi kimi səmərəli fəaliyyət göstərib.

Teymur müəllim elmi-nəzəri və təcrübi toplama və tərtibat işini digər sahələr və istiqamətlər üzrə də aparmaqdadır. Onun səbrlə, elmi-metodiki səriştə ilə toplayıb tərtib etdiyi hər biri iki və üç cilddən ibarət "XIX əsr Azərbaycan ədəbiyyatı müntəxəbatı", "XX əsr Azərbaycan ədəbiyyatı müntəxəbatı", "Azərbaycan uşaq ədəbiyyatı antologiyası", Nəriman Nərimanovun, X.R.Ulutürkün, Əndəlib Qaracadağinin seçilmiş əsərləri və bu kimi digər nəşrlər, həmçinin "Jurnalist olmaq istəyirsənsə..." kitabı səriştəli, təcrübəli, zəhmətkeş, alim əməyinin qiymətli bəhrələridir.

Təsadüfi deyil ki, onun hərtərəfli səmərəli fəaliyyəti mətbuatda və ictimai-elmi mühitdə yüksək qiymətləndirilib, müxtəlif mükafatlara, o cümlədən, dövlət tərəfindən "Tərəqqi medalına" layiq görülüb. Teymur Əhmədova səmərəli elmi, ictimai fəaliyyətinə görə Azərbaycan Respublikası Prezidentinin fərdi təqaüdü də təyin edilib.

Ömür yolunun şüurlu həyat və fəaliyyət tarixinə nəzər salanda bütün hallarda adamda onun həmin tələblərə uyğun gəldiyi qənaəti hasil olur; orta məktəbi qızıl medalla bitirəndə də, ali məktəbdə təhsil alanda da, İrəvanda, Bakıda jurnalist, publisist, alim və yazıçı kimi fəaliyyət göstərəndə də, Teymur müəllim birinci növbədə vətəndaş olaraq qalıb.

Yubilyarın jurnalistikasına nəzər saldıqda görürük ki, “Sovet Ermənistanı” qəzetində çalışdığı dövrdən onun amalı Ermənistanda Azərbaycan ədəbi mühitinin formalaşmasına hesablanıb. Yubilayırımız bu gün jurnalistikada hamımıza nümunə olmağı bacaran ictimai xadimdir. Ağsaqqal, müəllim, ən əsası gözəl insan Teymur müəllimi təbrik edir, ona can sağlığı arzulayırıq.

Azad Azərbaycan.- 2020.- 24 dekabr. S. 3.