Heydelberq
Universiteti
Yerləşir: Almaniya, Heydelberq şəhəri
Yaranma tarixi: 1386-cı il
Tipi: Dövlət
İşçi heyətinin
ümumi sayı:
12399 nəfər
Tələbələrin
sayı:
28266 nəfər
İllik
büdcəsi: 603,8 milyon avro
Rəsmi saytı:
www.uni-heidelberg.de
Ruprext Karl Heydelberq Universiteti
(almanca Ruprecht-Karls-Universitat Heidelberg) Almaniya Federativ
Respublikasının beşinci ən böyük
şəhəri olan Heydelberq şəhərində
yerləşir. Bu ali təhsil müəssisəsi
Müqəddəs Roma imperiyasında yaranmış
dördüncü, Almaniyada isə ən qədim universitetdir.
Böyük Britaniyanın "Times Higher Education
Supplement - QS World Universities Rankings" jurnalının 2009-cu
ildə apardığı dünya universitetlərinin
reytinqinə əsasən Heydelberq Universiteti 100 ən
yaxşı ali məktəb arasında
57-ci yerdə olub. 2010-cu ildə dünyanın
ən nüfuzlu universitetləri arasında "Times Higher
Education World University Rankings"in açıqlamasına
əsasən Heydelberq Universiteti 83-cü yerdə, "QS World
University Rankings"in açıqlamasına görə
isə 51-ci yerdədir.
Heydelberq Universiteti Avropa Tədqiqat Universitetləri
Liqasının, Avropa Universitetləri Assosiasiyasının,
Koimbra qrupunun (Avropanın 39 universitet
şəbəkəsinin) üzvüdür.
Tarixi
1378-ci ildə
xristianlığın iki qolu arasında baş verən
parçalanmadan və papa XI Qreqorinin ölümündən
sonra iki papa seçilir. Onlardan biri Avinyonda (fransızlar
tərəfindən seçilmiş), digəri isə Romada
(italyanlar tərəfindən seçilmiş) fəaliyyət
göstərir. Bu zaman almanlar Romada
fəaliyyət göstərən papa VI Urbanı
dəstəkləyirlər. Kurfürst
(feodal Almaniyada imperator seçmək hüququna malik olan
nüfuzlu knyaz) I Ruprext papa VI Urbanın yaxın adamları
ilə danışıqlar apararaq universitet fondunun
yaradılması haqqında papa bullası (papa
tərəfindən möhürlənmiş sənəd)
almağa nail olur. 1385-ci il
oktyabrın 23-də papa VI Urban məktəb (lat. Studium
Generale) yaradılmasına icazə verir, 1386-cı il iyunun
26-da isə I Ruprext universitet yaradılması haqqında
əmr imzalayır. Papanın
nizamnaməsində göstərildiyi kimi, yeni universitet Paris
Universitetinə uyğun yaradılır və dörd
fakültədən (fəlsəfə, ilahiyyat, hüquq
və tibb) ibarət olur.
1386-cı il oktyabrın 18-də
xüsusi Papa messası (katolik ibadətlərindən birinin
adı və bu ibadət zamanı çalınan musiqi)
altında Heydelberq şəhərində Almaniyanın ilk
universitetinin açılışı baş tutur. Universitetin ilk rektoru orta əsrlər filosofu
İngenli Marsilius təyin edilir. Universitet
sürətlə inkişaf etməyə başlayır və
artıq 1390-cı ildə burada 185 tələbə təhsil
alırdı.
XV əsrin sonunda universitetin rektoru yepiskop İohann fon Dalberqin təşəbbüsü ilə
burada humanizm mədəniyyəti tədris edilir. Heydelberq Universitetində Alman humanizm məktəbinin
yaradıcılarından Rudolf Aqrikola, Konrad Setls, Yakob
Uimpfelinq, İohann Reyxlinin adlarını qeyd etmək olar. 1482-ci ildə papa IV
Sikst ruhani olmayan və evli şəxslərin papanın
razılığı ilə universitetdə adi tibb professoru
vəzifəsinə təyin olunmasına, 1553-cü ildə isə
papa III Yulius kilsə gəlirindən ruhani olmayan professorlara
vəsait ayrılmasına icazə verir.
Martin Lüterin disputları
1518-ci ilin aprelində universitetdə böyük
əks-səda doğurur, onun müəllim və alimlər
arasından olan tərəfdaşları tezliklə Almaniyanın
cənub-qərbində Reformasiya hərəkatının
aparıcı quvvələrinə çevrilirlər. 1563-cü
ildə Heydelberq Universitetinin İlahiyyat məktəbinin
əməkdaşları Heydelberq katexizisi (xristianların
sual-cavab şəklində olan şəriət kitabı)
hazırlayırlar. XVI əsrdə humanizmlə
yanaşı, universitetdə Kalvinizm cərəyanı da
tədris olunur və bu cərəyanın aparıcı
simalarından Pavel Sxede, Yan Qruter, Martin Opits və Matteus
Merianıni qeyd etmək olar. Bu dövrdə universitet
ölkənin mühüm mədəni və akademik
mərkəzinə çevrilir, ali
məktəbə çoxlu sayda alim cəlb edilir. Lakin 1618-ci ildə başlamış Otuz İllik müharibə
universitetin inkişafını dayandırır. 1622-ci ildə dünya üzrə tanınmış
Palatina kitabxanası universitetin kilsəsindən oğurlanaraq
Romaya gətirilir. 1693-cü ildə isə
XIV Lüdovikin qoşunları, demək olar ki, Heydelberq
Universitetinin binalarını tamamilə dağıdır.
Sonuncu Katolik
Reformasiyasının nəticəsi olaraq Heydelberq Universiteti
protestant xarakterini itirərək yezuitlər (mürtəce
katolik ruhaniləri cəmiyyətinin üzvü, katolik rahib)
tərəfə yönəlir. 1735-ci ildə həmin
dövrdə Domus Vilhelmina adlanan Universitet meydanında
qədim universitet binası tikilir. Yezuitlərin
səyləri nəticəsində burada hazırlıq
seminariyası açılır. 1773-cü
ildə yezuitlər ordeni yatırıldıqdan sonra
universitetdə məktəblərin əksəriyyəti
Fransız Lazaritlər Konqreqasiyasının əlinə
keçir. 1803-cü ildə Heydelberq
Universiteti Baden hersoqu Karl Fridrix tərəfindən bərpa
edilir və dövlət müəssisəsinə
çevrilir. Bu dövrdən başlayaraq
universitet I Ruprext ilə yanaşı, Karl Fridrixin də
adını daşıyır. Karl Fridrix
özünü universitetin rektoru elan edir və ali
məktəbi beş fakültəyə bölür. Həmin
onillikdə universitetdə romantizm, daha sonra isə liberalizm
inkişaf edir, bu öz əksini Klemens Brentano, Axim fon Arnim,
Lüdviq Tik, İosif Herres, Cozef fon Eyxendorffun, Fridrix
Şlosser, Georq Qotfrid Gervinusun yaradıcılığında
tapır.
1933-cü ildə Üçüncü Reyxin
yaranmasından sonra Heydelberq Universiteti Almaniyanın digər ali təhsil müəssisələri kimi
nasistləri dəstəkləyir. Bir çox
dissidentlər ölkəni tərk etmək
məcburiyyətində qalır, Almaniyada qalan yəhudi və
kommunist professorlar isə deportasiya edilir və ya nasist terrorunun
qurbanına çevrilirlər. 1933-cü il
mayın 17-də Heydelberq Universitetinin müəllim və
tələbələri Universitet meydanında kitab
yandırılması mərasimində iştirak edirlər
və həmin dövrdən universitet faşist ali
məktəbi kimi tanınır. Ali məktəbin
girəcəyində yazılmış "Canlı ruh"
şüarı "Alman ruhu" ilə əvəz olunur,
universitet nasist yevgenikasına (irqin təmizlənməsi,
əhalinin genetik tərkibinin yüksəldilməsi) cəlb
edilir, T4 evtanaziya proqramı (Hitlerin göstərişi ilə
həkimlər tərəfindən çoxlu sayda insanın
"sağalmaz xəstə" adı ilə inyeksiya və
dərmanlar, ac saxlama yolu ilə qaz kameralarında
öldürülməsi) həyata keçirilir.
II Dünya
müharibəsindən sonra Heydelberq Universitetində geniş
denasifikasiya (müharibədən sonra alman və Avstriya
cəmiyyətinin bütün sahələrinin nasist
ideologiyasından təmizlənməsi) işləri
aparılır. Universitet müharibə zamanı
dağıntıya məruz qalmadığı
üçün burada bərpa prosesi sürətlə gedir. Ali məktəbin
əvvəlki "Həqiqətin, ədalətin və
insanlığın canlı ruhu" şüarı
özünə qaytarılır. 1960-1970-ci
illərdə universitet sürətlə inkişaf edir,
şəhər kənarında Nyunheymer Feld ərazisində ali məktəbin
nəhəng tibb və dəqiq
elmlər kampusu açılır.
2007-ci ildə Heydelberq Universiteti Almaniya Federal Təhsil
və Elmi Tədqiqatlar Nazirliyi və Almaniya Tədqiqat Fondu
tərəfindən alman universitetlərinin beynəlxalq
təsirinin gücləndirilməsi, universitetlərdə
təhsil alan gənc alimlərə gözəl şərait
yaradılması məqsədilə təsis olunan Misilsiz Təşəbbüs
maliyyə proqramına qoşulur.
Büdcəsi
və təhsil haqqı
2009-2010-cu tədris ilində Heydelberq Universitetinin illik
büdcəsi 603,8 milyon avro təşkil edib. Ali
məktəbin illik gəlirləri həmin il 187,1 milyon avro, xərcləri isə 180,5 milyon
avro olub.
Heydelberq Universitetində təhsil haqqı hər
semestr 500 avro təşkil edir. Qeydiyyatdan
keçmək üçün tələbə 104 avro
ödəməlidir. Qeydiyyat
xərcləri ilə birgə təhsil haqqının
məbləği hər semestr 604 avrodur.
Universitet
tələbələrdən tibbi sığortadan
keçməyi tələb edir. Tibbi sığortanın
məbləği 6 ay üçün 296,55
avrodur. Avropa Birliyini təmsil edən
tələbələr öz vətənlərində tibbi
sığortadan keçmələri haqqında sənəd
(E 111 sertifikatı) təqdim edərlərsə, tibbi
sığortadan azad edilirlər.
Heydelberq Universitetinə qəbul olan
tələbələr qalmaq üçün
əvvəlcədən özlərinə yer
axtarmalıdırlar. Hazırda kampus
ərazisində otaqların aylıq qiyməti 200-500 avro
arasında dəyişir. Hər semestrin əvvəlində tələbə
120 avro ödəyərək semestr bileti əldə edir, bu da
semestr ərzində ona Heydelberq şəhəri
ərazisində bütün növ ictimai nəqliyyatdan pulsuz
istifadə etməyə imkan yaradır.
Universitetdə tələbələrə bir
neçə təqaüd (Curt Engelhorn, Heidemarie Engelhorn, Wild,
Ray and Elfie Carrell, DAAD)
təklif edilir. Təqaüdlərin
əksəriyyətinin, DAAD təqaüdü (400 avro) istisna olmaqla,
məbləği ayda 660
avrodur.
Universitet bu
gün
Almaniyanın beşinci
ən böyük şəhəri olan Heydelberq ölkənin
cənub-qərbində Nekkar çayının sahilində
yerləşir. Romantizmin beşiyi hesab edilən
şəhərin 145000 nəfər sakini var. Şəhərin
ən məşhur və turistlər tərəfindən
ziyarət olunan yeri Qədim Şəhər qalasıdır.
Heydelberq Universiteti üç kampusdan (Qədim
Şəhər, Yeni, Berqheym) ibarətdir. Yeni
Universitet adlanan ərazi Qədim
Şəhər kampusunun mərkəzi hesab edilir. Bu ərazi Universitet meydanında universitet
kitabxanası ilə əsas inzibati binaların
yaxınlığında yerləşir. Yeni
Universitetin rəsmi açılışı 1931-ci ildə
olub. Onun yaradılması Qoldman Saks, Morgan Kraysler və
Ford kimi zəngin Amerika ailələrinin maliyyə
dəstəyi, Heydelberq Universitetinin məzunu və
ABŞ-ın Almaniyada səfiri olmuş Yakob Qould
Şurmanın xeyriyyə kampaniyasına
ayırdığı vəsaitlər hesabına
maliyyələşib. Qədim Şəhər
kampusunda humanitar və sosial elmlər üzrə
fakültə və institutlar yerləşir. Fakültələr zəngin kitabxanalara və
tədqiqatçı tələbələr üçün
nəzərdə tutulmuş laboratoriyalara malikdir.
Yeni kampus
Heydelberq şəhərinin kənarında Nyunheymer Feld
ərazisində yerləşir. Hazırda bu kampus universitetin geniş ərazisini əhatə
edir və Almaniyada təbiət elmləri və biologiya elmi
üzrə mövcud olan ən iri
kampusdur. Demək olar ki, bütün
təbiət elmləri fakültələri və
institutları, Tibb məktəbi, Heydelberq Universiteti
xəstəxanası, Universitet kitabxanasının elm
bölməsi burada yerləşir. Nyunheymer
Feld kampusunda professor-müəllim heyəti və
tələbələrin, həmçinin
ziyarətçilərin nəqliyyat vasitələri
üçün uzunmüddətli və qısamüddətli
dayanacaqlar mövcuddur. Fizika və
Astronomiya fakültəsi adıçəkilən
kampusların heç birində yerləşmir. Fakültə Qədim Şəhər kampusundan
Nekkar çayı vasitəsilə ayrılır, Yeni kampusdan
isə 2 km-lik məsafədə yerləşir. Universitetin üç iri xəstəxanası da
daxil olmaqla, təbiət elmləri fakültələri və
Tibb məktəbi isə Yeni kampusun ərazisindədir.
Berqheym kampusu keçmiş Ludolf Krehl klinikası ərazisində
yerləşir. 2009-cu ilin martından etibarən burada
İqtisadiyyat, Politologiya və Sosiologiya institutları
fəaliyyət göstərir. Berqheym
kampusunda bir mühazirə zalı, bir neçə seminar
otağı, ən müasir universitet kitabxanaları və bir
kafe var.
2003-cü ildə Heydelberq
Universitetində həyata keçirilən struktur
dəyişikliklərindən sonra burada 12 fakültə
fəaliyyət göstərir. Fakültələr
bir neçə departament və institutlara bölünüb.
Onların əksəriyyəti yeni Avropa
standartlarına cavab vermək məqsədilə bakalavr,
magistratura və doktorantura dərəcələri üzrə
təhsil təklif edir. Hüquq, tibb,
stomatologiya və əczaçılıq sahələri
üzrə tələbə proqramı istisnadır. Belə ki, tələbələr bu sahələr
üzrə dövlət imtahanı verirlər. Magistr dərəcəsi üzrə
mərkəzləşdirilmiş imtahanlar isə
Baden-Vürtemberq tərəfindən həyata keçirilir.
Universitetin on iki
fakültəsindən biri Biologiya
fakültəsidir. Buraya Zoologiya, Bitkiçilik, Neyrobiologiya,
Əczaçılıq və Molekulyar Biotexnologiya institutları
daxildir. Fakültədə təqribən 2000
tələbə təhsil alır, 70 professor, 40
məruzəçi və 300 elmi işçi
çalışırlar.
Empirik
Tədqiqatlar Fakültəsinə Psixologiya, Sosial və Mədəni
Antropologiya institutları, Təhsil departamenti, İdman və
idman Elmləri İnstitutu və Gerontologiya İnstitutu
daxildir.
Hüquq fakültəsi (həmçinin Heydelberq Hüquq
Məktəbi kimi tanınır) universitetin əsas
fakültələrindən hesab olunur. Məktəb
1386-cı ildə I Ruprext tərəfindən təsis olunub
və Almaniyanın ən qədim hüquq məktəbidir.
Kimya və Yer
haqqında elmlər Fakültəsinə Qeyri-üzvi kimya, Üzvi
kimya, Fiziki kimya, Coğrafiya, Geologiya və Paleontologiya
institutları, həmçinin Mineralogiya və Geokimya
institutları daxildir. Kimya fakültəsi 1817-ci
ildə ayrıca bir institut kimi təsis olunub. Coğrafiya İnstitutunun yaranma tarixi isə 1895-ci
ildən hesablanır.
Tibb fakültəsi 1386-cı ildə təsis olunan dörd
fakültədən biridir. Heydelberq Tibb
Məktəbi Almaniyanın ən qədim və güclü
tibb məktəbidir. Onun tibb dərəcəsi
üzrə təhsil proqramı (tələbələr
üçün iki il və 4 il
doktorantura) 2001-ci ildə əsaslı dəyişikliyə
uğrayıb. Həmin ildən fakültənin bütün
tələbələri təhsillərini 6 il
müddətində davam etdirirlər. Bu gün
22 institutu fəaliyyət göstərən fakültə
Heydelberq Universiteti xəstəxanası ilə sıx əməkdaşlıq
edir.
Manheym Tibb fakültəsi 1964-cü ildə yaradılıb
və Manheym şəhərində yerləşir. Fakültə
11 institutdan ibarətdir, əsasən tibbi texnologiyalar
sahəsində araşdırmalarla məşğul olur və
Manheym Tətbiqi Elmlər Universiteti ilə sıx
əməkdaşlıq edir. Burada əsasən optik
ölçü texnikasının inkişaf etdirilməsi,
proqram təminatının işlənib hazırlanması
və s. həyata keçirilir.
Riyaziyyat və Kompüter elmləri fakültəsinə Riyaziyyat, Tətbiqi Riyaziyyat
və Kompüter Elmləri institutları daxildir.
Müasir dillər fakültəsi alman dili, ingilis dili,
alman dili əcnəbi dil kimi, tərcüməçilik
və interpretasiya, kompüter
linqvistikası, Roman dilləri,
Orta əsrlər və Neo-Latın filologiyası və
Slavyan dilləri üzrə kursları əhatə edir.
Fəlsəfə və Tarix fakültəsi 23 institut və
departamentdən ibarətdir. Fakültə 2002-ci
ildə keçmiş Tarix və Fəlsəfə
fakültələri ilə Şərqşünaslıq
və Klassik Tədqiqatlar fakültələrinin
birləşməsi nəticəsində yaranıb.
Fizika və
Astronomiya fakültəsinə Kirxhof adına
Fizika İnstitutu (Kirchhoff Institute of Physics), Fizika,
Nəzəri Fizika və Nəzəri Astrofizika institutları
daxildir.
Teologiya (İlahiyyat) fakültəsi universitetin 1386-cı
ildə təsis olunan ən qədim
fakültələrindən biridir.
İqtisadiyyat
və Sosial Emlər fakültəsi Politologiya, Sosiologiya, Alfred Veber adına İqtisadiyyat İnstitutlarını
əhatə edir.
Fakültələrlə yanaşı, Heydelberq
Universiteti Fundamental Fizika, Heydelberq Riyaziyyat və Hesablama
Metodları Elmləri, Harmut Hoffman-Berlinq Molekulyar və
Hüceyrə Biologiyası ali məktəbləri, "Hüceyrə
Şəbəkələri" qabaqcıl təcrübə,
"Asiya və Avropa Qlobal Kontekstdə" elmi-tədqiqat
mərkəzlərindən ibarətdir.
Heydelberq Universitetinin kitabxanası Almaniyanın
ən zəngin kitabxanalarından biridir. İstifadəçilərinin
sayına görə kitabxana ölkədə birinci yeri tutur.
Kitabxana sistemi fakültə və
institutların kitabxanaları daxil olmaqla, ümumilikdə 7
milyona yaxın kitab və digər materiallara malikdir.
Universitetin əsas kitabxanasında 3,2 milyon cild kitab, 50000
mikrofilm və videokaset, 10732 dövri nəşr, 6600
əlyazma, o cümlədən 1304-cü ilə aid
"Manessye Kodeksi" rəsmli əlyazması, 1800 inkunabula
(kitab çapı icadının ilk dövründə
yığma hərflərlə çap olunmuş ilk kitab),
110500 avtoqraf, qədim xəritə və şəkillər
mövcuddur. Əsas kitabxanadan əlavə universitetin 83
fakültə və institut kitabxanalarında 3,5
milyondan çox kitab var. Tibb və dəqiq elmlər
kitabxanası 1978-ci ildən Nyunheymer Felddə
yerləşən Yeni kampusa köçürülüb.
2007-ci ilin oktyabrından
etibarən Heydelberq Universitetinin rektoru, professor Bernhard Ayteldir. Universitetdə
ümumilikdə 12399 nəfər işçi
çalışır. Onlardan 4824
nəfər akademik, qalanları isə inzibati heyətdən
ibarət əməkdaşlardır.
Heydelberq Universitetində
ümumilikdə 28266 nəfər təhsi alır. Onların 16264 (57,5%)
nəfərini qızlar, 5225 nəfərini
əcnəbilər, 3271 nəfərini magistrantlar, 1133
nəfərini doktorantlar təşkil ediblər.
Heydelberq Universiteti dünyaya
çoxlu sayda filosof, hüquqşünas, ilahiyyatçı,
şair və yazıçı, alim bəxş edib. Universitetin məzunları
arasında 30 Nobel, 18 Leybnits, 2 Oskar mükafatları
laureatları var. Almaniyanın bir neçə federal və
baş nazirləri ilə yanaşı, ölkənin beş kansleri də bu universitetdə təhsil
alıblar. Onlardan sonuncusu adı tarixə
Almaniyanı birləşdirən kansler kimi
düşmüş Helmut Kol olub. Bundan əlavə,
Belçika, Bolqarıstan, Yunanıstan, Nikaraqua, Serbiya,
Taylandın dövlət və hökümət
rəhbərləri, Britaniya taxtının vəliəhdi,
NATO-nun Baş katibi və Beynəlxalq Sülh Bürosunun
direktoru Heydelberq Universitetində təhsil alıblar.
Universitetin keçmiş dini fakültələrinin
məzunları arasında Papa II Piy, kardinallar, yepiskoplar və
protestant reformasiyasının iki əsas lideri Filip Melanxton
və Zakariya Ursinin adları da var. Almaniyanın Federal
Konstitusiya Məhkəməsinin 16 hakimi, Almaniya Federal
Ədalət Məhkəməsinin, Federal Əmək
Məhkəməsinin,
Beynəlxalq Ədalət Məhkəməsinin
prezidentləri, İnsan Haqları üzrə Avropa Məhkəməsinin
iki prezidenti, Dəniz Hüququ üzrə Beynəlxalq
Tribunalın prezidenti, Beynəlxalq Cinayət
Məhkəməsinin vitse-prezidenti, Almaniyanın iki baş
prokuroru, Avropa Ədalət Məhkəməsinin baş
vəkili və Britaniya Lordlar Palatasının hakimi
universitetin hüquq fakültəsinin məzunlarıdırlar.
Heydelberq universitetinin Biznes fakültəsinin məzunları
ABB Qrup, Astor korporativ müəssisəsi, BASF, BDA, Daimler AG,
Deutsche Bank, EADS, Krupp AG və Siemens AG şirkətlərinin
təsisçisi, həmtəsisçisi və ya
rəhbərləridir.
Dahi alman bəstəkarı Robert Şumanın, filosoflar
Lüdviq Feyerbax və Edmund Montgomerinin, şair Yozef Frayer fon
Eyxendorfun, yazıçılar Kristian Fridrix Hebbel, Qotfrid
Keller, Henri Qofman, Məhəmməd İqbal, Xose Rizal, Uilyam
Somerset Moem və Jan Polun adları universitetin məşhur
məzunları sırasındadır. Bundan əlavə, universitetin
digər sahələr üzrə məşhur
məzunları içərisində eksperimental psixologiyanın
banisi hesab edilən Vilhelm Vundt, kimyəvi termodinamikanın
banisi Uillard Qibbs, müasir antropologiyanın banilərindən
sayılan Frans Boas, velosiped ixtiraçısı Karl Drez
və qitələrin dreyfi nəzəriyyəsinin banisi Alfred
Veqenerin adlarını qeyd etmək olar. Məşhur filosoflar
Georq Vilhelm Fridrix Hegel, Karl Yaspers,
Hans-Georq Qadamer və Yurgen Habermas, novator alimlər Herman
fon Helmholç, Robert Vilhelm Bunzen, Qustav Robert Kirxhof,
psixologiyanın banilərindən biri hesab edilən Emil Krepelin
və müasir sosiologiyanın banilərindən olan Maks Veber
kimi məşhur alimlər universitetdə professor kimi
çalışıblar. Rusiyanın
görkəmli kimyaçı alimi, elementlərin dövri
cədvəlinin yaradıcısı Dmitri Mendeleyev
dövrünün məşhur professoru Robert Vilhelm Bunzenin
universitetdə fəaliyyət göstərən
laboratoriyasında işləyib.
Hazırda universitetin professor heyətinin tərkibində
tibb elmi üzrə Nobel mükafatı laureatları Bert Zakman
(1991) və Harald zur Hauzen (2008), 7 Leybnits laureatı, Almaniya
Federal Konstitusiya Məhkəməsinin keçmiş hakimi Paul
Kirxhof və Dəniz Hüququ üzrə Beynəlxalq
Tribunalın sabiq prezidenti Rüdiger Volfrum da var.
Universitetin
məşhur məzunları
Papa II Piy Roma Papası
Helmut Kol Almaniyanın keçmiş
kansleri
Robert Şuman dahi alman bəstəkarı
Karl Drez velosiped ixtiraçısı
Uillard Qibbs kimyəvi termodinamikanın banisi
Vilhelm Vundt
eksperimental psixologiyanın banisi
Alfred Veqener qitələrin dreyfi
nəzəriyyəsinin banisi
Harald zur Hauzen tibb üzrə Nobel mükafatı laureatı
Bert Zakman
tibb üzrə Nobel
mükafatı laureatı
Albrext Kossel tibb üzrə Nobel
mükafatı laureatı
Otto Meyerxof
tibb üzrə Nobel
mükafatı laureatı
Georq Vittiq
kimya üzrə Nobel
mükafatı laureatı
Karl Ziqler
kimya üzrə Nobel
mükafatı laureatı
Riçard Kun kimya üzrə Nobel
mükafatı laureatı
Hans Yensen
fizika üzrə Nobel mükafatı
laureatı
Valter Bote fizika üzrə Nobel mükafatı laureatı
Filipp Lenard fizika üzrə Nobel mükafatı laureatı
Hazırladı:
Lamiyə ƏLİYEVA
Azərbaycan
müəllimi.- 2010.- 17 dekabr.- S.10.