ADU-da "Buta"nın

təqdimat mərasimi keçirildi

Azərbaycan Dillər Universitetinin İnformasiya Resurs Kompleksində "Buta" müasir Azərbaycan, Türkiyə və ABŞ qadın yazarlarının nəsr və poeziya toplusunun təqdimat mərasimi keçirildi. Təqdimat mərasimində "Sönməz məşəl" mədəni əlaqələr ictimai birliyinin sədr əvəzi Rəşad Həsənov bildirdi ki, bu toplunun ərsəyə gəlməsində birliyin keçirdiyi seminarların böyük rolu olub. Toplu haqqında qısa məlumat verərək, toplunun elektron versiyasının da oxucuların ixtiyarına verildiyini bildirib.

Mərasimdə iştirak edən Azərbaycan Yazıçılar Birliyinin katibi, "525-ci qəzet"in baş redaktoru Rəşad Məcid toplunun əhəmiyyətindən söz açdı. Qadın yazarlarının əsərlərinin bir topluda çap edilməsini əlamətdar hadisə hesab edən R.Məcid millətin, xalqın savadlı, intellektual olmasının həm də bilavasitə qadınlardan asılı olduğunu söylədi.

Sonra toplunun redaktorları və layihənin gerçəkləşməsində xidmətləri olan Şəhla Nağıyeva və Elison Məndəvil ilə birbaşa İnternet-əlaqə yaradıldı. Onlar gənc və perspektivli qadın yazıçılarla birgə iş görməkdən məmnun olduqlarını bildirdilər. Qeyd edildi ki, nəşr olunan bu toplu ADU-nun, eyni zamanda digər ali məktəblərin tərcümə və filologiya fakültələrində əyani vəsait kimi istifadə olunacaq. Azərbaycanın dünyaya tanıdılmasının, eləcə də ədəbiyyat incilərinin ingilis və başqa xarici dillərdə yayılmasının böyük hadisə olduğu və bu baxımdan da belə kitabların böyük əhəmiyyət daşıdığı xüsusi vurğulandı. Kitab haqqında fikir və mülahizələr bildirildi.

Şakir DAYANDUROĞLU

Azərbaycan müəllimi.- 2010.- 17 dekabr.- S.12.