"Milli kurikulum
və qiymətləndirmə
fəaliyyəti - 2010" mövzusunda
beynəlxalq konfrans
Bu günlərdə
Gürcüstanın elm və təhsil naziri Dmitri Şaşkin konfrans iştirakçılarını salamladı və konfransın işinə uğurlar arzuladı. Gürcüstan Milli Kurikulum və Qiymətləndirmə Mərkəzinin direktoru Natiya Cokadze rəhbərlik etdiyi təşkilatın strukturu və fəaliyyət istiqamətləri haqqında ətraflı məlumat verdi. Bildirildi ki, Milli Kurikulum və Qiymətləndirmə Mərkəzi Elm və Təhsil Nazirliyi nəzdində fəaliyyət göstərən altı böyük mərkəzdən biridir. Mərkəzin fəaliyyət dairəsinə kurikulumların hazırlanması, sınaqdan keçirilməsi və tətbiqi, eləcə də ümumtəhsil məktəblərində tədris-təlimin qiymətləndirilməsi sisteminin yaradılması, tətbiqi, milli və digər səviyyələrdə qiymətləndirmələrin həyata keçirilməsi daxildir.
Natiya Cokadze "Milli kurikulumun hazırlanması, sınaqdan keçirilməsi, tətbiqinin dəstəklənməsi və fasiləsiz inkişaf" mövzusunda geniş hesabat da təqdim etdi. O, orta ümumi təhsil pilləsində tədris edilən fənlər, onlara ayrılmış saatlar, ayrı-ayrı fənlərin tədrisinin keyfiyyətinin yüksəldilməsi üçün görülmüş işlər haqqında ətraflı məlumat verdi. N.Cokadze məktəbəqədər tərbiyə və inklüziv təhsil üzrə aparılmış işlər haqqında da danışdı, xarici ölkələrdə yaşayan və təhsil alan, öz xalqının tarixi, mədəniyyəti haqqında kifayət qədər məlumatı olmayan və öz ana dilində sərbəst danışa bilməyən uşaqlar üçün nəzərdə tutulmuş "Şənbə məktəbləri"nin fəaliyyəti haqqında ətraflı məlumat verildi. Dərsliklərin tərtibinə verilən yeni tələblər və müəllim hazırlığı istiqamətində görülmüş işlər də konfrans iştirakçılarının diqqətinə çatdırıldı.
Sonra Milli Kurikulum və Qiymətləndirmə Mərkəzinin direktor müavini Zea Paiçatdze Gürcüstanda orta ümumi təhsil səviyyəsində tədris edilən yeni fənlər haqqında məlumat verdi. "Milli Kurikulum və Qiymətləndirmə Mərkəzində layihələr və proqramlar" mövzusunda məruzəsində natiq göstərdi ki, Orta Mülki müdafiə və təhlükəsizlik, İnformasiya və kommunikasiya texnologiyaları, Dünya mədəniyyəti və Rəqs dərsi kimi fənlərin tədrisini uşaqların hərtərəfli formalaşmasında əhəmiyyətli hesab edirlər. Müqayisə üçün bildirək ki, İnformasiya və kommunikasiya texnologiyaları fənni Azərbaycanda da ümumtəhsil səviyyəsində birinci sinifdən başlayaraq müstəqil fənn kimi tədris edilir. Mülki müdafiə və təhlükəsizlik fənnində əhatə edilən məsələlərin tədrisi isə Azərbaycanda Həyat bilgisi fənn kurikulumunda "Sağlamlıq və təhlükəsizlik" məzmun xəttində nəzərdə tutulmuşdur. Bununla yanaşı təbiət fənlərinin tədrisi imkanları daha da genişləndirilmiş, fiziki tərbiyə fənni idman fənni ilə əvəz edilmiş, ingilis dili fənni birinci sinifdən başlayaraq tədris edilmişdir.
Dünya mədəniyyəti fənni üzrə tədrisi nəzərdə tutulan məsələlər dünyada qloballaşma getdiyi bir zamanda cəmiyyətin və öyrənənin ehtiyaclarının təmin olunması baxımından çox əhəmiyyətlidir.
Riyaziyyat, elm və texnologiyalar şöbəsinin müdiri Yekaterina Slavinskaya "Riyaziyyat, təbiət fənləri və İKT-nin məzmununda dəyişikliklər", Humanitar və ictimai elmlər şöbəsinin müdiri Tamar Cakeli "Çoxdilli təhsil" mövzularında məruzə etdilər.
Konfransda milli qiymətləndirmə və onun həyata keçirilməsi istiqamətində görülmüş işlər müzakirə olundu.
Gürcüstan Milli Kurikulum və Qiymətləndirmə Mərkəzinin direktoru Natiya Cokadze "Milli qiymətləndirmə (məsələyə ümumi baxış)", Milli qiymətləndirmənin keçirilməsi üzrə beynəlxalq məsləhətçi, Niderlandın təhsilin qiymətləndirilməsi üzrə CİTO Beynəlxalq İnstitutunun rəhbəri Henk Moelands "Milli qiymətləndirmə və kurikulum, Milli qiymətləndirmə nümunə kimi", həmin institutun əməkdaşı Frans Kleyntces isə "Gürcüstan Milli Kurikulum və Qiymətləndirmə Mərkəzi və Niderlandın CİTO qrupu" mövzularında təqdimat etdilər.
Konfransda Gürcüstan Milli Kurikulum və Qiymətləndirmə Mərkəzinin şöbə müdirləri ana dili və ədəbiyyat, riyaziyyat, təbiət fənləri üzrə milli qiymətləndirmənin nəticələri haqqında ətraflı məlumat verdilər.
Sonda əldə edilən nəticələr
ətrafında müzakirələr
aparıldı və konfrans öz işini yekunlaşdırdı.
Konfrans başa çatdıqdan sonra Gürcüstan televiziyasına müsahibə
verdim. Gürcüstanlı
həmkarlarımızın kurikulum islahatı sahəsində əldə
etdikləri təcrübəni
bu şəkildə
dost ölkələrin təhsil
işçiləri ilə mübadilə
etmələrini yüksək
dəyərləndirdiyimizi və bu baxımdan keçirilən
beynəlxalq konfransın
böyük əhəmiyyət
daşıdığını bildirdim.
Gürcüstan Milli Kurikulum və Qiymətləndirmə
Mərkəzinin direktoru
Natiya Cokadze azərbaycanlı həmkarları
ilə yaxından əməkdaşlıq etmək
arzusunda olduğunu bildirdi.
A.SÜLEYMANOVA
Azərbaycan
müəllimi.- 2010.- 17 dekabr.- S.11.