Jurnalistlər arasında təhsil mövzusunda keçirilmiş müsabiqənin nəticələri açıqlandı

Əməkdaşımız müsabiqə qalibi oldu

Azərbaycan milli mətbuatının 135 illiyi ilə əlaqədar Azərbaycan Respublikası Təhsil Nazirliyinin, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Azərbaycan Mətbuat Şurasının birlikdə "Təhsil və media: peşəkarlığın artırılmasına dəstək" mövzusunda jurnalistlər arasında keçirdikləri müsabiqə başa çatıb. İyulun 6-da Təhsil Nazirliyində müsabiqənin nəticələrinin açıqlanmasına və qaliblərin mükafatlandırılmasına həsr olunmuş mərasim keçirilib.

Tədbir iştirakçılarını salamlayan təhsil naziri Misir Mərdanov Təhsil Nazirliyinin Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu və Azərbaycan Mətbuat Şurası ilə əməkdaşlığından söz açıb, bu əməkdaşlıq çərçivəsində dəfələrlə birgə tədbirlər keçirildiyini, bu silsilədən növbəti tədbirə yığışdıqlarını qeyd edib. İlk dəfə keçirilən müsabiqədə əsas məqsədin Azərbaycan təhsilində gedən proseslərin geniş ictimaiyyətə daha yaxından çatdırılmasında peşəkar jurnalist yaradıcılığını stimullaşdırmaq, təhsil sahəsindən yazan ixtisaslaşmış jurnalistlər qrupunun formalaşmasına dəstək göstərmək, kütləvi informasiya vasitələrinin təhsil orqanları ilə səmərəli əməkdaşlıq prinsiplərini təbliğ etməkdən, təhsil mövzusunun mediada geniş şəkildə işıqlandırılmasına şərait yaratmaqdan ibarət olduğunu deyən təhsil naziri müsabiqənin nəticələrini açıqlayıb. Bildirib ki, sənədlərin qəbulu üçün nəzərdə tutulmuş vaxt ərzində - iyunun 10-dan iyulun 1-dək müsabiqəyə 45 yazı təqdim edilib. Təqdim olunmuş yazıların təcrübəli ekspertlər tərəfindən qiymətləndirildiyini söyləyən Misir Mərdanov nəticədə 1 nəfərin I yerə, 2 nəfərin II yerə, 3 nəfərin III yerə, 10 nəfərin isə həvəsləndirici yerə layiq görüldüyünü qeyd edib. Nazir diqqətə çatdırıb ki, qalib gəlmiş 16 jurnalist müsabiqənin şərtlərinə uyğun olaraq müxtəlif məbləğdə pul mükafatlarına layiq görülüb, onlar həmçinin Azərbaycan Respublikası Təhsil Nazirliyinin, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Azərbaycan Mətbuat Şurasının xüsusi diplomları ilə təltif olunublar.

Təhsil naziri çıxışının sonunda müsabiqənin uğurla başa çatdırılmasında əməyi olanlara təşəkkürünü bildirib.

Tədbirdə iştirak edən Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli və Azərbaycan Mətbuat Şurasının sədri Əflatun Amaşov təbrik çıxışlarında müsabiqənin əhəmiyyətini qeyd edərək onun yüksək səviyyədə keçirildiyini vurğulayıb, belə tədbirlərin gələcəkdə də təşkil ediləcəyinə ümidvar olduqlarını bildiriblər. Təhsil Nazirliyinin təşəbbüsü ilə keçirilən müsabiqəyə qatılmış jurnalistlərin tutduqları yerlərdən asılı olmayaraq, hər birinin qalib olduğunu nəzərə çatdıran qurum rəhbərləri qazandıqları böyük uğurlara görə jurnalistləri təbrik ediblər.

Sonra müsabiqədə qalib gəlmiş jurnalistlərə diplomlar və pul mükafatları təqdim edilib, onlara yeni-yeni yaradıcılıq uğurları arzu olunub.

Yeri gəlmişkən qeyd edək ki, müsabiqədə iştirak edən qəzetimizin şöbə redaktoru Yusif Əliyev II yerə layiq görülüb. Əməkdaşımızı bu uğuru münasibətilə təbrik edir, ona daha böyük qələbələr arzulayırıq.

Azərbaycan müəllimi.- 2010.- 9 iyul.- S.2.