Məktəblilərin 2009-2010-cu dərs ilində
keçirilmiş fənn
olimpiadalarının nəticələri barədə
Azərbaycan Respublikası təhsil nazirinin əmri
2009-2010-cu dərs ilində
məktəblilərin fənn olimpiadalarını yüksək
səviyyədə keçirmək, bu işi daha da təkmilləşdirmək,
istedadlı şagirdləri üzə çıxarmaq,
onların yaradıcılıq qabiliyyətlərini inkişaf
etdirmək sahəsində müəyyən işlər
görülmüş, müvafiq təşkilati tədbirlər
həyata keçirilmiş, xərclər smetası
tutulmuş, fənlər üzrə olimpiada materialları hazırlanıb yerlərə
göndərilmişdir.
Azərbaycan
Respublikası Prezidentinin 17 aprel 2006-cı il tarixli, 1414
nömrəli Sərəncamı ilə təsdiq edilmiş
"Xüsusi istedada malik olan uşaqların (gənclərin)
yaradıcılıq potensialının inkişafı üzrə
Dövlət Proqramı (2006-2010-cu illər)"nın
icrası ilə bağlı "Elementar riyaziyyatın əlavə
fəsilləri və olimpiadalar. I kitab", "Riyaziyyatdan
olimpiada iştirakçıları üçün 200
variant", "Kimyadan olimpiada məsələləri",
"Uşaqlarda istedadın müəyyənləşdirilməsi
və inkişaf etdirilməsi", "İstedadlı
uşaqların psixoloji təminatı",
"İstedadın psixoloji diaqnostikası" adlı kitablar
çap olunmuş, müəllim və şagirdlərin
istifadəsinə verilmişdir.
Fənn
olimpiadalarının rayon (şəhər) mərhələsinin I turunda
49301, II turunda 8616, Respublika
turunda 1138 nəfər
iştirak etmişdir.
Yerlərdə
olimpiadalara hazırlıq mərkəzləri
yaradılmış, xüsusi istedadı ilə fərqlənənlərin
obyektiv seçimi aparılmışdır. Bu səbəbdən
də fənn olimpiadalarının yekun turunda şagirdlərin
əksəriyyəti yüksək nəticə göstərmişdir.
Respublika turunda
Naxçıvan MR-in, Bakı, Sumqayıt, Şirvan şəhərlərinin,
İsmayıllı, Quba, Hacıqabul, Neftçala, Şəmkir,
Qazax, Abşeron, Qax, Tovuz, Cəlilabad,
Ucar, Ağdaş, Balakən, Qəbələ, Şəki,
Oğuz rayonlarının şagirdləri daha çox fərqlənmiş,
mükafata layiq yerləri tutmağa nail olmuşlar.
Bakı şəhəri
27, 83, 171, 264, 304 nömrəli məktəblərin, 287
nömrəli "Zəkalar" liseyinin, Bağça-məktəb-lisey
kompleksinin, Heydər Əliyev adına Müasir Təhsil
Kompleksinin, Sumqayıt şəhəri
təbiət və texniki elmlər liseyinin, Təbiət elmləri təmayüllü
gimnaziyanın, Balakən rayonu texniki və humanitar liseyin, Culfa
rayonu Bənəniyar kənd, Ağcabədi şəhər
3, Zərdab şəhər 1, Neftçala rayonu Xıllı qəsəbə 1
nömrəli, İsmayıllı rayonu Mican kənd orta məktəblərinin,
bilavasitə nazirlik nəzdindəki
akademik Zərifə Əliyeva adına orta məktəbin, Heydər
Əliyev adına, kimya-biologiya təmayüllü, "Zəngi",
"Tərəqqi" liseylərinin, S.C.Pişəvəri
adına humanitar fənlər, S.Bəhlulzadə adına xarici
dillər təmayüllü gimnaziyaların şagirdləri daha yaxşı nəticələr
göstərərək qaliblər sırasında olmuşlar.
Ötən illərdə
olduğu kimi, cari ildə də respublikada fəaliyyət göstərən
"Çağ" Öyrətim İşlətmələri
Şirkətinin Azərbaycan-Türkiyə özəl liseylərinin şagirdləri fənn
olimpiadalarının yekun turunda üstünlük təşkil
etmiş, bu liseylərin 47 nəfər şagirdi I-IV yerlərə
layiq görülmüşdür.
Bir sıra rayonlarda
(Samux, Bərdə, Sabirabad, Biləsuvar, Göygöl,
Şamaxı) seçimin qeyri-obyektiv aparılmasının nəticəsidir
ki, olimpiadanın yekun turunun iştirakçılarından
39(3,4%) nəfəri "0", 77(6,8%) nəfəri isə
"1-10" bal
toplamışdır.
Göstərilənləri
nəzərə alaraq
ƏMR EDİRƏM:
1. Məktəblilərin 2009-2010-cu dərs ilində fənn
olimpiadalarının nəticələri haqqında münsiflər heyətləri
sədrlərinin təqdimatları
nəzərə alınsın.
2. Fənn olimpiadalarının
Respublika turunda Naxçıvan MR-in, Bakı,
Sumqayıt, Şirvan şəhərlərinin,
İsmayıllı, Quba,
Hacıqabul, Neftçala,
Şəmkir, Qazax, Abşeron, Qax, Tovuz, Cəlilabad, Ucar, Ağdaş, Balakən, Qəbələ, Şəki,
Oğuz rayonlarının və respublikada fəaliyyət göstərən "Çağ"
Öyrətim İşlətmələri
Şirkətinin Azərbaycan-Türkiyə
özəl liseylərinin
şagirdlərinin uğurlu
nəticələri qeyd
edilsin.
3. Samux, Bərdə, Sabirabad, Göygöl, Şamaxı, Ağsu, Salyan, Masallı, Qobustan, Xocavənd rayon, Naftalan şəhər təhsil şöbələrinin
fənn olimpiadalarına
hazırlıq sahəsində
lazımi əməli
tədbirlər həyata
keçirmədikləri həmin
rayonların təhsil
şöbə müdirlərinin
nəzərinə çatdırılsın.
4. Fənn
olimpiadalarına şagirdlərin hazırlanmasında səmərəli
fəaliyyət göstərmiş və 2010-cu ildə keçirilən olimpiadalarda
şagirdləri I dərəcəli diploma layiq
görülmüş müəllimlərin hər birinə
115 (yüz on beş) manat məbləğində mükafat
verilsin (əlavə 1)
5.
Fənn olimpiadalarının keçirilməsi,
materialların hazırlanması, işlərin
yoxlanılması və yerlərin müəyyənləşdirilməsində
xüsusi əmək sərf edən Respublika münsiflər
heyəti sədrlərinin hər
biri 110( yüz on) manat, məsul
katiblərin hər biri 90 (doxsan) manat, üzvlərin hər
biri 50(əlli) manat pulla mükafatlandırılsınlar (əlavə
2).
6. Naxçıvan
MR Təhsil Nazirliyinə,
Bakı Şəhəri üzrə Təhsil İdarəsinə,
Gəncə Şəhər Təhsil İdarəsinə,
bütün rayon (şəhər) təhsil şöbələrinə
tapşırılsın ki, əmrin məzmununu təhsil
müəssisələrinin pedaqoji
kollektivlərinə çatdırsınlar, istedadlı
şagirdlərin aşkara çıxarılmasına, onlar
üçün səmərəli təhsil şəraitinin
yaradılmasına, fənn olimpiadalarının təşkili
və keçirilməsinə
xüsusi diqqət yetirsinlər.
7.
İctimaiyyətlə əlaqə şöbəsi
(B.Hüseynzadə) əmrin "Azərbaycan müəllimi"
qəzetində dərc olunmasını təmin etsin.
8. Əmrin
icrasına nəzarət nazir müavini İ.İsgəndərova
həvalə edilsin.
Misir MƏRDANOV,
Azərbaycan Respublikasının təhsil
naziri
24 iyun 2010-cu il
Azərbaycan
müəllimi.- 2010.- 2 iyul.- S.2.