Bu il Bakıdakı 3 nömrəli bağçadan 50 uşaq məktəbə gedəcək

Bakının Sabunçu qəsəbəsində yerləşən 3 nömrəli "Səadət" körpələr evi-uşaq bağçasında 5 qrupda 100-dən çox uşaq tərbiyə olunur. Onların 50-si 2010-2011-ci dərs ilində ilk dəfə əlinə çanta alıb məktəbə gedəcək. Bu münasibətlə iyunun 9-da bağçada məzunların məktəbə yola salınması mərasimi keçirildi. Mərasimdə valideynlər də iştirak edirdilər.

Yeri gəlmişkən qeyd edək ki, yola salmaqda olduğumuz dərs ili "Səadət" körpələr evi-uşaq bağçasının pedaqoji kollektivi, burada tərbiyə alan fidan balalar üçün çox uğurlu olub. Uzun müddətdən bəri təmirinə ciddi ehtiyac duyulan bağça bu il dövlət vəsaiti hesabına əsaslı təmir olunub. Müəssisəyə müasir uşaq mebelləri, bərk və yumşaq avadanlıq, vəsaitlər və oyuncaqlar verilib. Bağçanın rəhbərliyi, tərbiyəçilər və valideynlər yüksək səviyyədə aparılmış təmirdən, yaradılmış əlverişli təlim mühitindən çox razıdırlar və bu şəraiti yaradan dövlətimizə, onun başçısına minnətdarlıq edirlər. Həmin minnətdarlıq duyğuları şənlikdə də dilə gəldi.

Bağçada yaradılmış nümunəvi təlim mühitindən səmərəli istifadə edən pedaqoji kollektiv uşaqlarla aparılan tərbiyə-təlim işlərinin, altıyaşlıların məktəb təliminə hazırlanmasının keyfiyyətini yüksəltməyə nail olub. Bunu bağçadan bu il məktəbə gedəcək uşaqların bayram şənliyindəki çıxışları da aydın göstərirdi. Olduqca zəngin mündəricəli ssenari üzrə reallaşdırılan tədbirdə söylədikləri şeirlərlə, oxuduqları mahnılarla, ifa etdikləri rəqslərlə, göstərdikləri səhnəciklərlə uşaqlar mövcud proqram çərçivəsində bilik və bacarıqlara, şifahi nitq vərdişlərinə yiyələndiklərini, saymağı, hesablamağı, sadə əməlləri yerinə yetirə bildiklərini nümayiş etdirdilər.

Bağçanın rəngarəng şarlarla, bayraqcıqlarla bəzədilmiş həyətində keçirilən "Əlvida, bağça, salam məktəb" mərasimini balaca aparıcılar Rasim və Fidan açdılar. Məzunlar xorla Dövlət himnini ifa etdilər. Aparıcılar azadlığı tərənnüm edən şeir dedilər və bu böyük nemətin xalqımıza bəxş edilməsində ulu öndər Heydər Əliyevin xidmətlərindən şirin uşaq dili ilə söz açdılar, ona həsr olunmuş şeirlər söylədilər.

Ələkbər, Aytac, Nicat, Aytən, Nihad, Əlisafa və b. uşaqlar meydanda bir-birlərini əvəz edərək şeir deməklə, mahnı oxumaqla, rəqs etməklə öz məharətlərini göstərdilər.

3 nömrəli "Səadət" körpələr evi-uşaq bağçasının müdiri, bütün ömrünü bu məktəbəqədər müəssisəyə, körpə fidanlara həsr edən Şahnaz Abdullayeva məzunları təbrik etdi, onların valideynlərinə gözaydınlığı verdi.

Möhtərəm Prezidentimiz İlham Əliyevin xüsusi sərəncamı ilə cari ilin ölkəmizdə "Ekologiya ili" elan olunduğunu deyən Ş.Abdullayeva bununla əlaqədar uşaqların ekoloji tərbiyəsinə xüsusi fikir verdiklərini, aparılan təlim-tərbiyə işinin keyfiyyətini yüksəltmək qayğısına qalmaqla bərabər onlara ətraf mühitin ekologiyası haqqında ilkin təsəvvürlər yaratmaq, uşaqları ekologiyanın qorunması ilə əlaqədar gücləri çatacaq işlərə cəlb etmək istiqamətində də ardıcıl iş apardıqlarını, çoxlu tərbiyəvi tədbirlər keçirdiklərini diqqətə çatdırdı.

Sonra meydan yenidən uşaqlara verildi. Xorun ifasında Müslüm Maqomayevin "Azərbaycan" mahnısı səsləndi. Balaca istedad Mirsahil mahnının solo hissəsini məharətlə təqdim etdi. Lalə bağçaları üçün çox darıxacağını söylədi. Uşaqlar bağçaya, məktəbə, müəllimlərə, tərbiyəçilərə həsr olunan şeirlər söylədilər.

Milli geyimli qızlar və oğlanlar Adil Gərayın "Azərbaycanım", Rəşid Şəfəqin "Göyərçinik biz", "Ana" mahnılarını oxudular, milli rəqs nümayiş etdirdilər.

Cırtdanla Tıq-tıq xanımın dostluğuna həsr olunmuş səhnəcik isə mərasim iştirakçılarını valeh etdi.

Qızlardan ibarət rəqs qrupunun ifa etdiyi "Cücələrim" rəqsi, Rasim, Tehran, Elçin, Sahilin oxuduqları "Dostlar" mahnısı, Sehran, Elçin, Selcan, Fatimə və Əfsanənin müəllimə aid söylədikləri şeirlər də bir çox digər nömrələr kimi tədbir iştirakçılarının alqışları ilə qarşılandı. Tərbiyəçilər Həmayıl Sultanova, Tamara Quliyeva uşaqları təbrik edib, xoş arzularını çatdırdılar.

Maraqlı keçən, iştirakçılara xoş anlar bəxş edən tədbirdə balaca fidanların məharətli çıxışları bu tərbiyə ocağında istedadların aşkara çıxarılması və inkişafı yönündə məqsədyönlu iş aparıldığını sübut edirdi. Bu işdə tərbiyəçilər Füruzə Abdullayeva, İrina Kasatkina və Sevinc Qasımovanın, musiqi rəhbəri Firəngiz Quliyevanın böyük zəhməti vardır.

Bayram mərasimi məzun olacaq uşaqlara hədiyyələrin verilməsi ilə başa çatdı.

Yusif ƏLİYEV

Azərbaycan müəllimi.- 2010.- 18 iyun.- S.4.