"Əlvida, bağça, salam, məktəb"

Bakıdakı 175 nömrəli uşaq bağçasında 6 qrupda 150-dən çox uşaq tərbiyə olunur. Onlardan 38-i 2010-2011-ci dərs ilində ilk dəfə əlinə çanta alıb məktəbə gedəcək. Bu münasibətlə iyunun 24-də tərbiyə ocağında "Əlvida bağça, salam məktəb" adı altında tədbir keçirildi. Tədbirdə Təhsil Nazirliyindən, yerli icra hakimiyyətindən nümayəndələr, millət vəkilləri və digər qonaqlar iştirak edirdilər.

Tədbiri giriş sözü ilə məktəbə hazırlıq qrupunun tərbiyəçisi Sevinc Behbudova açaraq balaca fidanları və onların valideynlərini təbrik etdi. Tədbir iştirakçıları alqışlarla balacaları səhnəyə dəvət etdilər. Fidan məzunlar bir-birindən maraqlı rəqs nömrələri, səhnəciklər göstərərək tədbiri unudulmaz xatirəyə çevirdilər.

Tədbirdə iştirak edən Təhsil Nazirliyi Aparatının rəhbəri İlham Pirməmmədov balaca fidanları və onların valideynlərini təbrik etdi. Bu gözəl tədbirin yüksək səviyyədə hazırlanmasına görə tərbiyə ocağının rəhbəri Zemfira xanıma və kollektivə təşəkkürünü bildirdi.

Mərasimin sonunda balacalar "Əlvida bağça" şeiri ilə tərbiyə ocağına əlvida dedilər.

Rəşad ZİYADOV

Azərbaycan müəllimi.- 2010.- 25 iyun.- S.11.