"Azəri inciləri" Türkiyədən qayıdıb

Bakının Nizami rayonundakı Uşaq-Gənclər Yaradıcılıq Mərkəzinin "Azəri inciləri" rəqs kollektivi, hər il olduğu kimi, bu il də Türkiyədə keçirilən 23 Nisan Beynəlxalq Uşaq Festivalında iştirak edib. Bu günlərdə rəqs qrupu Türkiyənin Fəthiyə şəhərindən qayıdıb. Minlərlə tamaşaçının toplaşdığı şəhər stadionunda "Qızıl günəş" adı altında keçirilən rəqs yarışmasında 20 ölkənin uşaq rəqs kollektivi iştirak edib. Kipr, Bolqarıstan, Rumıniya, Yunanıstan, İndoneziya, Rusiya, Gürcüstan, Litva və başqa ölkələrdən gələn rəqs qrupları milli geyimlərdə rəngarəng proqramla ən gözəl rəqslərini nümayiş etdiriblər.

"Azəri inciləri"nin 3 rəqsi -" Nəlbəki", "Naz eləmə", "Qaytağı"nı özündə birləşdirən kompozisiya ilə çıxışı tamaşaçıların alqışları ilə qarşılanıb. 20 kollektivin içərisindən bizim rəqqaslar ilk üçlüyə daxil olaraq, yüksək pillələrdən birini - III yeri qazanıb, ödül və medallara sahib olublar.

Rəqs qrupumuz Fəthiyə şəhərində keçirilən böyük qala konsertində də iştirak edib. Konsertin əvvəlində mərkəzin dram dərnəyinin üzvü Elnur Əliyev xalq şairi Bəxtiyar Vahabzadənin "Azərbaycan-Türkiyə" şeirini söyləyib. Tamaşaçılar Elnurun çıxışını sürəkli alqışlarla qarşılayıblar. Sonra rəqs qrupu konserti öz şux rəqsləri ilə açıb. Çıxışdan sonra şəhərin bələdiyyə başqanı səhnəyə qalxaraq kollektivin üzvlərinə ödül və medallar təqdim edib. Beləliklə, "Azəri inciləri" Vətənə bu il də qələbə ilə qayıdıb.

Sifai SƏFƏROVA

Azərbaycan müəllimi.- 2010.- 14 may.- S.6.