Almaniyanın Humboldt-Berlin Universitetində Azərbaycan tarixi kafedrası fəaliyyətə başlayıb

Xarici İşlər Nazirliyinin mətbuat xidmətindən AzərTAc-a bildirmişlər ki, Almaniyanın Humboldt-Berlin Universitetində Azərbaycan tarixi kafedrası fəaliyyətə başlamışdır.

Azərbaycanın Almaniyadakı səfirliyindən daxil olan məlumata görə, kafedranın açılmasına dair razılaşma keçən ilin dekabrında Humboldt-Berlin Universitetinin sabiq rektoru, professor Xristof Markşies və Azərbaycanın bu ölkədəki səfiri Pərviz Şahbazov arasında imzalanmışdır.

Kafedranın açılmasının əsas məqsədi Azərbaycan tarixinin tədqiqi, tədrisi, ölkəmizin tarixinə dair araşdırma və digər məsələlərdə Azərbaycanın müvafiq elmi qurumları ilə əməkdaşlıq, birgə elmi-tədqiqat işləri, elmi tədbirlərin keçirilməsi, o cümlədən diplom işlərinə və dissertasiyalara elmi rəhbərlik, qarşılıqlı tələbə, elmi işçi və müəllimlərin mübadiləsi, elmi nəşrlərin həyata keçirilməsi, Azərbaycan tarixinə dair kitabxananın yaradılması və sairdir.

Azərbaycan dövləti Humboldt-Berlin Universiteti ilə əməkdaşlıq çərçivəsində noyabrın 29-dan dekabrın 2-nə kimi sözügedən universitetdə "Azərbaycanın Elm və Mədəniyyət həftəsi" keçirməyi planlaşdırır.

Tədbirlər proqramına Azərbaycanla bağlı elmi araşdırmalar aparan məşhur avropalı alimlərin iştirakı ilə elmi konfransın, gənclər forumunun, çoxsaylı mədəni tədbirlərin, konsertlərin və sərgilərin keçirilməsi daxildir.

Kafedranın rəhbəri Azərbaycan üzrə mütəxəssis, ölkəmizin elmi mühitinə yaxşı bələd olan və elm-təhsil müəssisələri ilə sıx əməkdaşlıq edən professor Eva-Mariya Auxdur.

Azərbaycan müəllimi.- 2010.- 12 noyabr.- S.2.