Təcrübəçi tələbələr üçün ustad dərsi

Bakı Slavyan Universiteti Məktəb-Lisey Kompleksində davamlı olaraq tədbirlərlə yanaşı "açıq dərs"lər də keçilir. Oktyabr ayına planlaşdırılmış "açıq dərs"lər 2009-2010 və 2010-2011-ci dərs illərində "Ən yaxşı müəllim" müsabiqəsinin qalibləri tərəfindən aparıldı. "Açıq dərs"lərin keçilməsində məqsəd Məktəb-Lisey Kompleksində təcrübədə olan Bakı Slavyan Universiteti tələbələrinin gələcəkdə daha hazırlıqlı pedaqoq kimi yetişmələrinə, yeni təlim texnologiyaları və metodlarına yiyələnməkdə onlara kömək göstərməkdən ibarət idi. Ənənəyə sadiq qalaraq "açıq dərs"lərdən birini də biologiya müəllimi Gülnar Rüstəmova VI sinifdə "Kökün şəkildəyişmələri" mövzusunda keçdi. Dərs təməl sualla başlandı və məzmunla bağlı suallarla davam etdirildi.

Müasir metodların tələblərinə cavab verən dərsdə İKT vasitələrindən istifadə olundu və BLUM texnologiyasının (şagirdlərdə yüksək səviyyəli düşüncə qabiliyyətinin inkişaf etdirilməsi) bütün mərhələləri gözlənildi. İnteraktiv metodlardan istifadə nəticəsində şagirdlər dərs prosesində fəal iştirak etdilər və keçilən mövzunu mükəmməl şəkildə qavradılar. Dərsdə digər fənlərlə inteqrasiya da müşahidə olundu. Belə ki, nağıl nümunəsinin verilməsi nəticəsində ədəbiyyat fənni də dərs prosesinə inteqrasiya olundu.

Dərsdə mövzuya uyğun videomaterial (sənədli film) nümayiş etdirildi və bunun nəticəsində şagirdlər canlı olaraq bölünmə zona hüceyrələrinin mitoz yolla çoxalması prosesini müşahidə etdilər. Dərs qruplarla aparıldı və uşaqlar qabaqcadan hazırlanmış işçi vərəqlərdə işləməklə nəticələrini hər bir qrupa aid olan lövhədə yerləşdirdilər. Yeni mövzu izah olunarkən onun sxem şəklində nümunəsi şagirdlərin hər birinə paylandı. İzahatdan sonra şagirdlərlə birgə dərsin nəticələri və dərsdə istifadə olunan resurslar haqqında hesabat aparıldı. Dərsin yekun hissəsində uşaqlarla refleksiya həyata keçirildi və şagirdlər dərsə öz münasibətlərini xüsusi hazırlanmış kartlar vasitəsilə bildirdilər. Sonra şagirdlər müəllim tərəfindən qiymətləndirildi. Şagirdlərə ev tapşırığı verildi və sonda qruplar musiqi sədaları altında bir-birlərinin işini alqışladılar. Dərs uğurla başa çatdı.

Dərs bitdikdən sonra iştirakçı müəllimlər və təcrübəçi tələbələr arasında müzakirə aparıldı, dərslə bağlı fikirlər irəli sürüldü.

Leyla ƏMİRASLANOVA

Azərbaycan müəllimi.- 2010.- 12 noyabr.- S.5.