"Dəmiryol nəqliyyatı və təsərrüfatı mühəndisliyi ixtisası üzrə suallar-cavablar və özünü yoxlama testləri"

Bu günlərdə ali təhsil ocaqlarında dəmiryolçu ixtisasına yiyələnmək istəyən müdavimlər üçün yeni dərs vəsaiti - "Dəmiryol nəqliyyatı və təsərrüfatı mühəndisliyi ixtisası üzrə suallar - cavablar və özünü yoxlama testləri" işıq üzü görüb. Ktabın müəllifləri "Azərbaycan Dəmir Yolları" Qapalı Səhmdar Cəmiyyətinin sədr müavini, respublikanın əməkdar mühəndisi, texnika elmləri namizədi Qurban Nəzirov və Azərbaycan Texniki Universitetinin professoru, texnika elmləri doktoru Səyavuş Bağırovdur.

Kitab ali təhsilin bakalavr və magistr pillələri üçün "Dəmir yolu ümumi kurs" fənnindən əlavə vəsait kimi çap olunub. Dərsliyin elmi redaktoru "Azərbaycan Dəmir Yolları" Qapalı Səhmdar Cəmiyyətinin sədri A.Əsgərov, rəyçilər Azərbaycan Texniki Universitetinin dosenti R.Məmmədov və "Azərbaycan Dəmir Yolları" QSC-nin baş mütəxəssisi H.Quliyevdir.

Kitabda dəmiryolu nəqliyyatı və təsərrüfatı mühəndisliyi ixtisası üzrə suallar və cavablar öz əksini tapıb. Testlər müvafiq olaraq "Daşıma proseslərinin idarəetmə", "Lokomotiv və lokomotiv təsərrüfatı", "Yol təsərrüfatı və onun istismarı", "Dəmiryolunun elektrik təchizatı və elektromexaniki sistemləri", "İşarəvermə və rabitə sistemləri", "Vaqon təsərrüfatı", "Sərnişin daşıma təsərrüfatı", "Dəmiryolu nəqliyyatında texniki qurğular və tikililər", "Dəmiryollarının təhlükəsizliyi" bölmələrində verilib.

Dərsliyin sonuncu bölməsi "Dəmiryolu nəqliyyatı üzrə ümumi yoxlama Testləri" adlanır. Bu testlər çox dolğun və əhatəlidir. Burada ümumilikdə dünyada dəmiryolu nəqliyyatının yaranma tarixindən tutmuş, bugünkü texniki yeniliklərə qədər bütün sahələr əhatə olunub və ayrıca cədvəldə testlərin düzgün cavabları verilib.

"Nurlan" nəşriyyat-poliqrafiya müəssisəsində nəfis tərtibatla çap olunan kitab Azərbaycan Respublikası Təhsil Nazirliyinin 6 iyul 2010-cu il tarixli 1005 saylı əmri ilə dərs vəsaiti kimi təsdiq edilmişdir.

Vasif SÜLEYMAN

Azərbaycan müəllimi.- 2010.- 12 noyabr.- S.7.