Avstriyanın səfiri Dövlət İdarəçilik

Akademiyasının qonağı olub

Noyabrın 23-də Azərbaycan Respublikasının Prezidenti yanında Dövlət İdarəçilik Akademiyasında Avstriya mədəniyyət günlərinin keçirilməsi ilə əlaqədar Avstriya Respublikasının ölkəmizdəki fövqəladə və səlahiyyətli səfiri xanım Silvia Mayer-Kaybiç və sabiq səfir Alfred Missonqla görüş keçirildi.

Azərbaycan Respublikasının Prezidenti yanında Dövlət İdarəçilik Akademiyasının tədris işləri üzrə I prorektoru, professor Əlikram Abdullayev tədbiri giriş sözü ilə açaraq qonaqları ali təhsil ocağında görməsindən məmnunluq hissi keçirdiyini bildirdi. Ölkələrimiz arasında siyasi, iqtisadi, mədəni, elm sahələrində əməkdaşlığın uğurla inkişaf etməsində ölkə başçısı cənab İlham Əliyevin xidmətlərini xüsusi qeyd edən prorektor daha sonra xalqlarımızın dostluq əlaqələrindən ətraflı danışdı. Avstriyanın dövlət qulluğu və kadrların idarəolunması sahəsində böyük təcrübəyə malik olduğunu bildirən professor Ə.Abdullayev bu sahədə iki ölkə arasında əlaqələrin genişləndirilməsinin zəruriliyini vurğuladı. Prorektor səfir xanım Silvia Mayer - Kaybiçə ölkəmizdə həyata keçirdiyi bu yüksək missiyada uğurlar arzuladı.

Avstriya Respublikasının ölkəmizdəki fövqəladə və səlahiyyətli səfiri xanım Silvia Mayer- Kaybiç çıxışında keçirilən tədbiri yüksək qiymətləndirdi, bunun ölkələrimiz arasında elm sahəsində əməkdaşlığın gələcək inkişafına öz gərəkli töhfəsini verəcəyinə ümidvar olduğunu söylədi. O, eyni zamanda ölkələrimizin daha da yaxınlaşması, mövcud olan əməkdaşlığın gələcəkdə də inkişaf etməsi üçün səfir kimi əlindən gələni edəcəyini dedi.

Sonda səfir Silvia Mayer- Kaybiç və Alfred Missonq səmimi dostluq şəraitində keçən görüşə görə ali təhsil ocağının rəhbərliyinə və kollektivinə minnətdarlıqlarını bildirdilər.

Samirə KƏRİMOVA

Azərbaycan müəllimi.- 2010.- 26 noyabr.- S.8.