Məktəbdə təhsilin keyfiyyətinin yüksəldilməsi

istiqamətində uğurlu işlər aparılır

Ölkəmizdə təhsilin keyfiyyətinin yüksəldilməsi, inkişafının təmin olunması istiqamətində bir sıra ciddi addımlar atılıb. Məktəbdə müasir tədris-təlim prosesinin qurulmasında həlledici faktorlardan biri olan keyfiyyətin idarə olunması məsələsinə xüsusi yer verilir. Təlim keyfiyyətinin yüksəldilməsi bilavasitə müəllimlərin fəaliyyəti və tədris prosesini müasir tələblərə uyğun qurması ilə bağlıdır.

Rəhbərlik etdiyim Qax şəhər 2 nömrəli orta məktəb-liseydə bu məsələ daim diqqətdə saxlanılır. Məktəbdə 2 kompüter kabineti var, məktəb İnternet şəbəkəsinə qoşulub, 6 informatika müəllimindən 3-ü Rabitə və İnformasiya Texnologiyaları Nazirliyi tərəfindən keçirilən müsabiqədə I-III yerləri tutub. Təhsilin keyfiyyətinin monitorinqi aparılır. Bircə faktı demək kifayətdir ki, martda keçirilmiş pedaqoji şura ərəfəsində komissiyanın hazırladığı plana uyğun olaraq 38-45 saat dərs dinlənilmiş, fənn birləşmələri xətti ilə 8 müəllimin nümunəvi dərsləri təşkil olunmuş, qarşılıqlı dərs dinləmələrinə geniş yer verilmişdir. IX-XI siniflərdə sınaq imtahanları keçirilmiş, digər siniflərdə isə yazılı və şifahi yoxlamalar aparılmışdır. Hər il aprel-may aylarında bütün siniflərdə proqramın keyfiyyətlə yerinə yetirilməsi vəziyyəti öyrənilir. Bu məqsədlə siniflərdə monitorinqlərin keçirilməsi təmin edilir. Müəllimlər apardıqları diaqnostik, formativ, summativ qiymətləndirmə üzrə ümumi cədvəllər hazırlamaqla nəticələr çıxarılır. Bu isə növbəti ilin başlanğıcı üçün fəaliyyətdə əsas rol oynayır.

Milli Kurikulumla işləyən I, II sinif şagirdləri arasında oxumağı,yazmağı, hesablamağı bacarmayan şagirdlər yoxdur. Tədris prosesinin müşahidələri göstərir ki, şagirdlər qısa zamanda xeyli biliklərə və vərdişlərə yiyələniblər. Onlar xüsusilə dərsin motivasiya mərhələsində, tədqiqatın aparılması və nəticənin söylənilməsində fəallıq göstərirlər.

Tədris ocağında işinin ustası olan müəllimlər çoxdur. Onlar dərslərdə müasir təlim metodlarından geniş istifadə edir, İKT-nin tədqiqat işinin aparılması, layihələrin hazırlanması və s. tətbiqinə xüsusi fikir verirlər. Dərslərdə tapşırıqların verilməsi şagirdlərin məntiqi təfəkkürünün inkişafına kömək edir. Məktəbin fizika, riyaziyyat, biologiya, kimya, tarix və ədəbiyyat fənləri üzrə tədqiqat işi ilə məşğul olan 6 nəfər şagirdi diplomlarla mükafatlandırılıb.

Məktəbimizdə "Qüvvət elmdədir, elmsiz heç kəs, heç kəsə üstünlük eyləyə bilməz" mövzusunda keçirilən yaradıcılıq gecəsi şeir yazmaq və mahnı bəstələmək sahəsində istedadların üzə çıxarılmasına imkan verib. 2010-cu ilin fevralında "Həyatın cövhəri yalnız əməkdir, zəhmətsiz bir insan nəyə gərəkdir?" mövzusunda keçirilən əmək gecəsində 5 nəfər, "Riyaziyyat - sirli bir aləmdir" gecəsində 4 nəfər, "Kimya - fantastik yaradıcılıq gücü" mövzusunda keçirilən gecədə isə 2 nəfər xüsusi qabiliyyəti olan şagird aşkar edilib və onların adları "İstedad bankı"na daxil olunub.

Maraqlı tədbirlərimizdən biri də incəsənət məktəbinin müəllimlərinin də iştirakı ilə keçirilən "Muğamlarımız milli sərvətimizdir" mövzusunda festivalı 6 istedadlı muğam ifaçısının üzə çıxması ilə nəticələnib.

Şagirdlərin müstəqil fəaliyyətinin, idarəetmə qabiliyyətinin formalaşmasında hər il keçirilən "Şagird özünüidarə günü"nün xüsusi yeri vardır.

Məktəbdə keçirilən tədbirlərlə əlaqədar şagirdlərin hazırladıqları müxtəlif növ əyaniliklərdən 100-ə qədəri "Odlar yurdu" klubuna hədiyyə verilmişdir.

Bu tədbirlərdə də 10-dan çox şagirdin xüsusi qabiliyyətə malik olması üzə çıxdı. İnşa yazı müsabiqələrini bura əlavə etmək olar. Təkcə onu qeyd etmək kifayətdir ki, 8 şagirdin yazısı respublika üzrə hazırlanmış xüsusi kitablara daxil olunmuşdur.

Məktəbdə həm təbiət və həm də humanitar fənn üzrə 2 dəfə intellekt yarışları təşkil olunmuşdur ki, bu yarışlarda 3 nəfər yeni liderin müəyyən olunmasına imkan yaranmışdır.

Şagirdlərimiz idman yarışlarında da fəal iştirak edirlər. Rayon üzrə keçirilən yarışda "Cəsurlar" komandası ötən dərs ilində II yerə, "Şahin" komandası isə I yerə çıxmışdır. "Şahin" komandası zona mərhələsində də uğurla iştirak etmiş və I yerə çıxaraq respublika mərhələsinə vəsiqə almışdır.

Valideynlərlə əlaqəyə xüsusi fikir verilir. Oktyabr ayında keçirilən valideyn konfransında "Xüsusi istedada malik olan uşaqların formalaşmasında valideyn-məktəb əməkdaşlığı" mövzusunda məsələ müzakirə olunmuşdur.

Məzunlarımız ali məktəblərə qəbulda da rayon üzrə ən yüksək göstəricilərə malikdir. Son on ildə məktəbimiz hər dəfə TQDK-nın tələbə qəbulunun nəticələrinə əsasən seçilən 100 ən yaxşı ümumtəhsil məktəbi sırasına düşür. Məktəb üzrə keyfiyyət faizi 67%-dir. XI sinfi bitirən 118 nəfər şagirddən 55-60%-i universitetlərə daxil olub. Məhz bütün bu işlərin nəticəsidir ki,məktəbimiz ölkə Prezidentinin müvafiq sərəncamına əsasən 2008-2009-cu tədris ilində keçirilən "Ən yaxşı ümumtəhsil məktəbi" müsabiqəsinin qalibi olmuşdur. Biz əminik ki, bu ilin uğurları daha çox olacaq.

Şəkər ABDULLAYEVA

Azərbaycan müəllimi.- 2010.- 26 noyabr.- S.12.