180 yaşlı məktəbin salnaməsi

XIX əsrin əvvəllərində Azərbaycanda ilk dünyəvi məktəblərdən biri musiqi incəsənətimizin mərkəzi sayılan, dünyaya tanınmış ziyalılar, elm və mədəniyyət xadimləri bəxş etmiş Şuşa şəhərində açılmışdır. Həmin məktəbin varisi Şuşa şəhər 1 nömrəli orta məktəbin bu il 180 yaşı tamam olur. Yubiley ərəfəsində məktəbin şərəfli fəaliyyət yolunun araşdırılması istiqamətində xeyli iş görülmüş və bir sıra maraqlı tədbirlər həyata keçirilmişdir. Onların ən diqqətçəkənlərindən biri bu şöhrətli təhsil ocağının qısa tarixini və fəaliyyətini əks etdirən kitabın çapdan buraxılmasıdır.

Məktəbin məzunu və müəllimi, Şuşa təhsilinin cəfakeşi və alovlu təbliğçisi, pedaqoq - şair, Şuşa Rayon Təhsil Şöbəsinin aparıcı məsləhətçisi Əyyub Əbdüləzimovun (Əyyub Şırlanlı) tədqiqatçılıq axtarışlarının və gərgin zəhmətinin nəticəsi olaraq meydana gələn "Şuşa Zaqafqaziyada müstəsna əhəmiyyət kəsb edən təhsil mərkəzi və ziyalılar şəhəridir" kitabı bu günlərdə işıq üzü görmüşdür.

Redaktoru və ön sözün müəllifi pedaqoji elmlər doktoru, professor Akif Abbasov olan kitabda Şuşa qəza məktəbinin keçdiyi tarixi yoldan, onun sələflərinin, xüsusən də indi Şuşa şəhər 1 nömrəli məktəb kimi tanınan təhsil ocağının fəaliyyətindən, yetirmələrindən, adlı-sanlı müəllimlərindən, məzunlarının uğurlarından, bütövlükdə Şuşa ziyalılarının pedaqoji fikrimizin inkişafındakı rolundan bəhs olunur.

Kitabda həmçinin Şuşanın tarixi, mədəniyyəti, memarlıq və incəsənət abidələri haqqında da maraqlı məlumatlar vardır.

Yusif ƏLİYEV

Azərbaycan müəllimi.- 2010.- 26 noyabr.- S.18.