Yeni qəbul olunan müdavimlərlə görüş

Sentyabrın 27-də Azərbaycan Respublikasının Prezidenti yanında Dövlət İdarəçilik Akademiyasında cari tədris ilində rəhbər kadrların ixtisasının artırılması fakültəsinə qəbul edilən 75 dövlət qulluqçusu ilə görüş keçirildi. Tədbiri Azərbaycan Respublikasının Prezidenti yanında Dövlət İdarəçilik Akademiyasının tədris işləri üzrə I prorektoru, professor Əlikram Abdullayev açaraq yeni qəbul olunan müdavimləri təbrik etdi, onlara təhsil illərində uğurlar arzuladı.

Ali təhsil ocağının respublikamız üçün idarəçilik sahəsində peşəkar kadrların hazırlanması istiqamətində önəmli rolu olduğunu xüsusi qeyd edən prorektor akademiyanın ötən müddət ərzində əldə etdiyi nailiyyətlərdən danışdı. Qeyd olundu ki, bu gün Azərbaycan sürətlə inkişaf edən bir ölkə olaraq dövlət qulluqçuları qarşısında mühüm vəzifələr qoyur. Həmin vəzifələri uğurla və səmərəli icra etmək üçün dövlət qulluqçularının dünyanın və cəmiyyətin sürətlə yeniləşən biliklərindən geniş məlumatı olmalıdır.

Dövlət qulluqçusu öz biliyi və xidməti davranışı ilə başqalarına nümunə olmalı və dövlət maraqlarını hər şeydən ali tutmalıdır. Bu isə ancaq elmi biliklərin idarəetmədə tətbiqi yolu ilə mümkün ola bilər. Məhz zəruri olan bilikləri və keyfiyyətləri qazanmaq və artırmaq üçün dövlət qulluqçusunun yeni bilgiləri mənimsəməsi zəruridir. Görüş iştirakçılarına bununla bağlı bir sıra tövsiyələr verən Əlikram Abdullayev Azərbaycan Respublikasının Prezidenti yanında Dövlət İdarəçilik Akademiyasında həyata keçirilən tədbirlərdən söz açdı. Ulu öndər Heydər Əliyevin təhsilə və elmə göstərdiyi diqqət və qayğıdan danışan natiq ölkə başçısı cənab İlham Əliyev tərəfindən təhsilimizin inkişafı istiqamətində görülən işləri diqqətə çatdırdı.

Çıxışının sonunda ölkəmizin gələcəyinin bugünkü gənc kadrlardan asılı olduğunu qeyd edən prorektor bu işə akademiyada təhsil alan müdavimlərin ciddi yanaşacaqlarına, əldə etdikləri bilik və bacarıqları ilə idarəçilik sahəsinin inkişafına öz töhfələrini verəcəklərinə əmin olduğunu bildirdi.

Sonra akademiyanın Fəlsəfə və sosial psixologiya kafedrasının müdiri, professor Tofiq Rəsulov, Politologiya və siyasi idarəetmə kafedrasının müdiri, professor Nigar Ələkbərova, Tarix kafedrasının dosenti Musa Quliyev, İqtisadiyyatın dövlət tənzimlənməsi kafedrasının müdiri, dosent Roza Əliyeva, Dövlət quruculuğu və hüquq kafedrasının müdiri, dosent Fəxrəddin Nağıyev, Dövlət idarəçiliyində informasiya texnologiyaları kafedrasının dosenti Ağamehdi Mehtəliyev, Beynəlxalq münasibətlər və xarici siyasət kafedrasının dosenti Elçin Əhmədov, Dillər kafedrasının müdiri, professor Akif Bayramov, Dövlət idarəetməsi və menecment kafedrasının müdiri, dosent Eldar Azadov və Dövlət qulluğu və kadr siyasəti kafedrasının baş müəllimi Eldar Aslanov tərəfindən təqdimatlar edildi. Çıxış edənlər hər bir kafedranın fəaliyyət istiqamətləri barədə ətraflı məlumat verməklə yanaşı , onlara dərs deyəcək professor-müəllim heyəti ilə müdavimləri tanış etdilər.

Çıxış üçün söz alan Rəşad Babayev ilk gündən belə səmimi qarşılandıqlarına, onlar üçün yaradılan şəraitə görə Azərbaycan Respublikasının Prezidenti yanında Dövlət İdarəçilik Akademiyasının rəhbərliyinə müdavimlər adından təşəkkür etdi. O, üzərlərinə düşən məsuliyyəti dərk etdiklərini və qarşılarında duran mühüm vəzifələrin öhdəsindən layiqincə gəlməyə çalışacaqlarını bildirdi.

Görüşdən sonra müdavimlər ayrı-ayrı kafedralar tərəfindən hazırlanaraq nəşr olunmuş kitablardan ibarət sərgi ilə tanış oldular.

Samirə KƏRİMOVA

Azərbaycan müəllimi.- 2010.- 1 oktyabr.- S.3.