"Dayanıqlı inkişaf və idarəetmə" mövzusunda beynəlxalq konfrans

Lənkəran Dövlət Universitetində "Dayanıqlı inkişaf və idarəetmə" mövzusunda beynəlxalq elmi seminar-konfrans keçirilmişdir. Konfransdan əvvəl iştirakçılar universitetdə fəaliyyət göstərən Heydər Əliyev muzeyinin eksponatları ilə tanış olmuşlar.

Konfransı universitetin rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov açaraq Azərbaycanın dayanıqlı inkişafının əsasını təşkil edən Heydər Əliyev siyasətinin tarixi dövrün yeni mərhələsində dövlət başçısı İlham Əliyev tərəfindən uğurla davam etdirilərək Azərbaycanın inkişaf modelinin yaradıldığını, bu modelin daim müzakirə olunduğunu və öyrənildiyini bildirdi.

Lənkəran Şəhər İcra Hakimiyyəti İctimai-siyasi məsələlər şöbəsinin müdiri Əlimərdan Əliyev icra hakimiyyətinin başçısı Tofiq İbrahimovun təbrikini çatdırdı və konfransın işinə uğurlar arzuladı.

Konfransda təbiətşünaslığın, humanitar elmlərin, dövlət idarəçiliyinin, iqtisadiyyatın dayanıqlı inkişafı ilə bağlı müasir problemlərə dair məruzələr dinlənildi. Bu mövzularda çıxış edən Qafqaz Universitetinin rektoru, professor Ahmet Saniç, Azərbaycan Turizm İnstitutunun rektoru, professor Cəfər Cəfərov, M.V.Lomonosov adına Moskva Dövlət Universitetinin professorları - fizika-riyaziyyat elmləri doktoru Anatoli Qriqoryeviç Yaqola və kimya elmləri doktoru Gülnara Marafovna Kuramşina dayanıqlı inkişaf və dayanıqlı idarəetmənin müxtəlif elm sahələri tərəfindən tarix boyu öyrənildiyini bildirməklə yanaşı, həm də bu tədqiqatların nəzəri və praktik əhəmiyyətini təhlil etdilər.

Tədbirdə Lənkəran Şəhər İcra Hakimiyyətinin başçısı Tofiq İbrahimov, rayon ictimaiyyətinin, elm, təhsil müəssisələrinin nümayəndələri iştirak edirdilər.

Hacı Etibar ƏHƏDOV

Azərbaycan müəllimi.- 2010.- 8 oktyabr.- S.5.