"Təhsil" Respublika İdman Mərkəzinin yetirməsi Sinqapurdan qələbə ilə qayıdıb

Bu il avqustun14-dən 26-dək Sinqapurda keçirilən Yeniyetmələrin I Yay Olimpiya Oyunlarında Azərbaycan idmançılarının əldə etdikləri qələbələr hər birimizin qəlbində qürur hissi oyatdı. 204 ölkənin idmançılarının təmsil olunduğu bu oyunlarda respublikamız fərqləndi, sözün yaxşı mənasında seçildi. 12 Azərbaycan idmançısından 8-i medalla (5 qızıl, 3 gümüş) Vətənə qayıtdı. Həmin qalib idmançılarımızdan biri də "Təhsil" Respublika İdman Mərkəzinin Sumqayıt filialının yetirməsi Kənan Kamal oğlu Quliyevdir. Onu oxucularımızla daha yaxından tanış etmək, qələbə sevincini birlikdə paylaşmaq məqsədi ilə yolumuzu "Təhsil" Respublika İdman Mərkəzindən saldıq.

Elə Kənanla da "Təhsil" Respublika İdman Mərkəzinin direktoru Cəfər Hümbətovun kabinetində görüşdük. Cəfər müəllim Kənanın ümidverici bir idmançı olduğunu deyərək, artıq ölkəmizdə yeni nəsil idmançıların yetişdiyini və onların parlaq gələcəyinə inandığını bildirdi.

İdmançı ailəsində doğulan Kənan Quliyev elə məhz belə yeniyetmələrdən biridir. Hazırda Xızı Rayon Uşaq-Gənclər İdman Məktəbində direktor müavini kimi fəaliyyət göstərən atası Kamal Quliyev də uzun illər idmanla məşğul olub. Oğlunun idmana olan həvəsini görən atası 2002-ci ildə onu "Təhsil" Respublika İdman Mərkəzinin Sumqayıt filialına aparır. Kənan həmin vaxtdan taleyini idmanla bağlayır. Sərbəst güləşlə məşğul olan Kənan bir neçə ildən sonra artıq tanınmağa başlayır, əldə etdiyi nailiyyətlərin sayı getdikcə artır. Belə ki, idmançımız 2009-cu il 16-18 yanvar tarixlərində Bakı şəhərində keçirilən 20 Yanvar şəhidi Müşviq İsayevin xatirəsinə həsr olunmuş beynəlxalq turnirdə I yerə, elə həmin il 14-16 fevral tarixlərində paytaxtımızda keçirilən yeniyetmələrin Azərbaycan birinciliyində III yerə layiq görülüb. 2009-cu il 15-17 mart tarixlərində Belarusda sərbəst güləş üzrə keçirilən beynəlxalq turnirdə uğurla iştirak edən Kənan I yeri tutur. 2010-cu il isə Kənanın idman karyerasında xüsusilə yaddaqalan hadisələrlə zəngindir. Respublikamızda, eləcə də bir sıra xarici ölkələrdə keçirilən yarışlarda, beynəlxalq turnirlərdə yüksək nəticələr göstərən idmançımız ən böyük qələbəsinə bu ilin avqustunda Sinqapurda keçirilən Yeniyetmələrin I Yay Olimpiya Oyunlarında imza atdı. Olduqca gərgin keçən oyunlarda uğurla çıxış edərək II yerə layiq görüldü. Vətənə gümüş medalla dönən Kənan mötəbər yarışın qalibi olmasından sevinc hissi keçirdiyini bildirdi. Bunu həm özünün, həm də bütövlükdə Azərbaycanın uğuru hesab etdiyini söyləyən Kənan əldə etdiyi idman nailiyyətlərində respublikanın əməkdar məşqçisi Rövşən Süleymanovun böyük zəhməti olduğunu qeyd etdi. Ona hər zaman dəstək olan atasına, "Təhsil" Respublika İdman Mərkəzinin direktoru Cəfər Hümbətova, mərkəzin Sumqayıt filialının direktoru Bilal Məmmədova bir daha təşəkkür etdi.

Onun yaddaşında əbədi həkk olunan hadisənin ölkə başçısı cənab İlham Əliyev tərəfindən avqustun 30-da Sinqapurda keçirilən Yeniyetmələrin I Yay Olimpiya Oyunlarında iştirak etmiş idmançıların və mütəxəssislərin qəbul edilməsi olduğunu deyən Kənan bu şərəfə nail olmasından bir yeniyetmə kimi qürur və iftixar hissi keçirdiyini söylədi. Həmin günün onun üçün xoş xatirəyə çevrildiyini dedi. Kənan ölkəmizdə idmanın inkişafı üçün çox böyük işlər görüldüyünü, yeniyetmə və gənclərimizin idmanın demək olar ki, bütün sahələrinə meyil və maraq göstərdiklərini qeyd etdi. Kənan Quliyev idmançılarımızın beynəlxalq olimpiya oyunlarında əldə etdikləri ən yüksək nəticələrə görə onların və məşqçilərinin ölkə Prezidenti tərəfindən mükafatlandırılmasını yeniyetmə və gənclərə olan diqqət və qayğının daha bir bariz nümunəsi olduğunu dedi. O, idmançılar adından ölkə başçısı cənab İlham Əliyevə öz dərin təşəkkürünü bildirdi.

Bütünlüklə həyatını idmanla bağlayan Kənanın ən böyük arzusu Azərbaycanın tanınmış güləşçisi olmaq, ölkəmizi bütün dünyada layiqincə təmsil etməkdir.

Samirə KƏRİMOVA

Azərbaycan müəllimi.- 2010.- 3 sentyabr.- S.7.