Azərbaycan Dövlət Pedaqoji Universitetində tələbələr kompüter vasitəsi ilə imtahanları verdilər

2009-2010-cu tədris ilinin qış imtahan sessiyasında tələbələrin biliyinin qiymətləndirilməsində şəffaflığı və obyektivliyi təmin etmək, yarana biləcək neqativ halları dərhal aradan qaldırmaq məqsədilə Azərbaycan Dövlət Pedaqoji Universitetində lazımi tədbirlər görülüb. Bu barədə məlumat verən ADPU-nun rektoru, professor Yusif Məmmədov bildirdi ki, hazırda əyani şöbə üzrə bütün imtahanlar Boloniya prosesinin tələbləri səviyyəsində "Bir şagird- bir kompüter" layihəsi "2008-2012-ci illərdə Azərbaycan Respublikasının təhsil sisteminin informasiyalaşdırılması üzrə Dövlət Proqramı" çərçivəsində həyata keçirilir. Gələcəkdə qiyabi şöbədə oxuyan tələbələr üçün də bu sistemin tətbiqi nəzərdə tutulur. Şəbəkə İnternetə qoşulmaqla valideynlər də öz uşaqlarının imtahan vermələrini izləyə bilərlər.

Sonra keçirilən imtahanları yerində müşahidə etmək məqsədilə ADPU-nun tədris-metodika şöbəsinin müdiri, dosent Namiq Hacıyev və universitetin imtahan nəzarət qrupunun rəhbəri, dosent Qulaməli Balaşovla birlikdə tələbələrin imtahan verdikləri kompüter mərkəzinə daxil olduq. Tarix fakültəsinin 103 və 106-cı qrup tələbələri, qonşu otaqda isə riyaziyyat, riyaziyyat və informatika fakültələrinin I-IV kurs tələbələri imtahan verirdilər.

Tələbələrdən Şövqi Həsənli (riyaziyyat və informatika ), İlahə Soltanova (tarix ), Famil Soltanov (riyaziyyat) və başqaları imtahanlara verilən vaxt başa çatmasa da, yüksək nəticə əldə edərək imtahan otaqlarını tərk etdilər. Onlar bu anda imtahanların şəffaf keçməsi üçün göstərilən qayğıya və yaradılan şəraitə görə universitet rəhbərliyinə minnətdarlıqlarını bildirməyi də unutmadılar.

Şakir CƏFƏROV

Azərbaycan müəllimi.-2010.-8 yanvar.-S.2.