"İnnovasiyaya doğru" mövzusunda seminar

Bu günlərdə Almaniyanın Mitra təşkilatının nümayəndələri paytaxtımızın qabaqcıl təhsil müəssisələrindən biri olan 7 nömrəli orta məktəbin dəvəti ilə şəhərimizə qonaq gəlib. Qonaqlar təhsil ocağı ilə tanış olduqdan sonra Fəxri xiyabanda ulu öndərimiz Heydər Əliyevin məzarını və Şəhidlər xiyabanını ziyarət ediblər. Almaniyalı qonaqlar məktəbin müxtəlif siniflərində dərslərdə iştirak edib istedadlı uşaqların əl işləri, rəsm əsərləri və bədii özfəaliyyət kollektivi ilə tanış olublar. Daha sonra qonaqlara 20 Yanvar və Xocalı faciəsi haqqında film nümayiş etdirilib və baş verən dəhşətli hadisələr barədə məlumat verilib. Azərbaycan təhsilinə maraq göstərən qonaqlar ADU-ya, Almaniyanın Azərbaycandakı səfirliyinə, Qala-Etimologiya muzeyinə, Qobustana səfər edib, şəhərin tarixi, mədəniyyəti və incəsənəti ilə tanış olublar.

Aprelin 5-də məktəbdə "İnnovasiyaya doğru" mövzusunda seminar keçirilib. Məktəbin direktoru Gülnaz Mehdizadə Azərbaycan təhsilinin dünya təhsilinə inteqrasiyası məqsədilə "Almaniya - Azərbaycan məktəblərinin əməkdaşlıq körpüsünün yaradılması" layihəsi haqqında ətraflı məlumat verərək qonaqları tədbir iştirakçılarına təqdim edib. Layihənin təsisçisi xanım Marina Burd gördükləri iş haqqında geniş məlumat verərək bildirib ki, layihə çərçivəsində 2 məktəb, 8 uşaq bağçası fəaliyyət göstərir. Bu təhsil ocaqlarında dərslər rus və alman dillərində aparılır. Yeni dərs ilinə 2 məktəb, 2 uşaq bağçası açmaq da nəzərdə tutulur. Xanım Burd çıxışında onu da qeyd edib ki, layihənin əsas məqsədi Avropa ölkələrində, o cümlədən müxtəlif məktəblərdə şagird və müəllimlərin təcrübə mübadiləsini təşkil etməkdir.

Marina Burd çıxışının sonunda 7 nömrəli məktəbin şagird və müəllimlərindən ibarət bir qrup nümayəndəni bu ilin noyabr ayında Berlində keçiriləcək olimpiadada iştirak etmək üçün Almaniyaya dəvət edib.

Mitra təşkilatının məktəblər üzrə iş sektorunun müdiri Aleksandr Ott layihənin bütün Avropada böyük maraq doğurduğunu və bir çox dövlətlərdə həyata keçirildiyini bildirib. O, öz çıxışında 7 nömrəli məktəblə də birgə əməkdaşlığın əhəmiyyətindən danışıb.

Çıxış üçün söz alan millət vəkili Ziyad Səmədzadə Azərbaycan təhsil sistemində son illərdə qazanılan uğurlardan, aparılan təhsil islahatlarının mahiyyətindən, təhsilin inkişafının dövlətin prioritetlərindən biri olduğundan bəhs edib. Layihənin əhəmiyyətli olduğunu söyləyən millət vəkili öz tərəfindən bu əməkdaşlığa dəstək olacağını da vurğulayıb. Səbail Rayon İcra Hakimiyyəti başçısının müavini Xalidə Bayramova da çıxışında həyata keçirilən layihəni bəyəndiyini və bu işdə məktəbə yardımçı olacağını qeyd edib.

Sonra qonaqlara verilən suallar cavablandırılıb.

Sifai SƏFƏROVA

Azərbaycan müəllimi.- 2011.- 15 aprel.- S.7.