Doktorantların və gənc tədqiqatçıların XVI Respublika elmi konfransı

21-22 dekabr tarixlərində Təhsil Nazirliyinin təşkilatçılığı ilə Azərbaycan Müəllimlər İnstitutunda doktorantların və gənc tədqiqatçıların XVI Respublika elmi konfransı keçirildi.

Konfransın dekabrın 21-də keçirilən açılış mərasimində təhsil naziri Misir Mərdanov, Azərbaycan Müəllimlər İnstitutunun rektoru, millət vəkili Aqiyə Naxçıvanlı, respublikanın tanınmış alimləri, pedaqoqları və digər qonaqlar adıçəkilən ali təhsil müəssisəsindəki Heydər Əliyev Mərkəzində oldular və ulu öndərin büstü önünə əklil qoyaraq əziz xatirəsini ehtiramla andılar. Sonra qonaqlar mərkəzdə ümummilli lider Heydər Əliyevin və ölkə başçısı cənab İlham Əliyevin ictimai-siyasi fəaliyyətlərinin ayrı-ayrı məqamları ilə bağlı hazırlanmış xüsusi fotostendlərə, guşələrə tamaşa etdilər.

Azərbaycan Respublikasının Dövlət himni səsləndirildikdən sonra institutun akt zalında keçirilən konfransı təhsil naziri Misir Mərdanov açaraq tədbirin əhəmiyyətindən danışdı. Konfransın doktorantların və gənc tədqiqatçıların elmi yaradıcılığını stimullaşdırmaq, habelə onların elmi nailiyyətlərini müzakirə etmək və gənclərin yaradıcılıq potensialını inkişaf etdirmək məqsədi ilə həyata keçirilən növbəti tədbirlərdən biri olduğunu söyləyən nazir onun əlamətdar bir vaxta-Azərbaycan Respublikasının dövlət müstəqilliyinin bərpasının iyirminci ildönümünün qeyd olunduğu dövrə təsadüf etdiyini xüsusi vurğuladı. Nazir müstəqilliyimizin 20 ili ərzində respublikamızın keçdiyi tarixi inkişaf yolundan bəhs edərək bu illərdə bütün sahələrdə olduğu kimi, təhsil və elmdə də bir sıra yeniliklərin tətbiq olunduğunu, əsaslı işlərin aparıldığını və nailiyyətlərin əldə edildiyini bildirdi.

Ulu öndər Heydər Əliyevin təhsilin və elmin inkişafına, Azərbaycanın istedadlı uşaq və gənclərinə göstərdiyi diqqət və qayğıdan danışan təhsil naziri bu işlərin hazırda ümummilli liderin layiqli davamçısı, ölkə başçısı cənab İlham Əliyev tərəfindən uğurla davam etdirildiyini söylədi.

Sonra təhsil naziri Misir Mərdanov doktorantların və gənc tədqiqatçıların XVI Respublika elmi konfransı barədə məlumat verərək ildən-ilə gənclərin konfransa marağının artdığını bildirdi. Onu da qeyd etdi ki, ali məktəblərdə yerinə yetirilmiş işlərin nəticələrini elmi ictimaiyyətə çatdırmaqda elmi nəşrlərin rolunu nəzərə alaraq onların təsis edilməsinə və müntəzəm nəşrinə xüsusi fikir verilir, yeni elmi tədqiqat nəşrlərinin sayı artırılır. Bu gün respublikada nəşr olunan 400-ə yaxın elmi jurnal və məcmuə Azərbaycan Respublikasının Prezidenti yanında Ali Attestasiya Komissiyası tərəfindən dissertasiyaların əsas elmi nəticələrinin dərc olunması tövsiyə edilən elmi nəşrlərin siyahısına daxil edilib. Onlardan 37-si Təhsil Nazirliyi sistemindəki ali təhsil müəssisələrinin nəşrləridir. Bu jurnallardan ikisi beynəlxalq, biri isə elektron jurnaldır. Son illər elmi əsərlərin nüfuzlu mətbu orqanlarında çap edilməsinə diqqətin artırıldığını söyləyən təhsil naziri bəzi ali təhsil müəssisələrində həyata keçirilən stimullaşdırıcı tədbirlər nəticəsində impakt-faktoru olan jurnallarda dərc olunan məqalələrin sayının 3 il ərzində 3 dəfə artdığını bildirdi. Qeyd olundu ki, hazırda respublikamızda 30041 nəfər elmi və elmi-pedaqoji kadr çalışır. Onlardan 1918-i elmlər doktoru, 8976-sı isə fəlsəfə doktorudur (elmlər namizədi). Bildirildi ki, 2010-cu ildən başlayaraq ölkəmizdə elmin maliyyələşməsinin yeni mexanizmi tətbiq olunmuşdur. Bu mexanizmi həyata keçirmək məqsədi ilə Azərbaycan Respublikasının Prezidenti yanında Elmin İnkişafı Fonduna son 2 ildə dövlət büdcəsindən xeyli vəsait ayrılır. 2010-2011-ci illərdə adıçəkilən fond tərəfindən elan olunmuş müsabiqələrdə ali məktəb alimləri 22 qrant layihələrinin qalibi olmuşdur.

Nazir daha sonra qeyd etdi ki, konfrans öz işini 2 gün ərzində müxtəlif elm sahələri əhatə olunmaqla 19 bölmədə davam etdirəcəkdir. Konfransın bölmələrində 17 ali təhsil müəssisəsindən və Azərbaycan Milli Elmlər Akademiyasının institutlarından daxil olmuş 300-ə yaxın məruzənin dinlənilməsi nəzərdə tutulub.

Elmi konfransda bölmələrə respublikanın tanınmış alim və pedaqoqlarının rəhbərlik etdiyini deyən təhsil naziri tədbirin keçirilməsində əməyi olanlara təşəkkürünü bildirdi. Nazir Misir Mərdanov çıxışının sonunda doktorantlara və gənc tədqiqatçılara bir sıra dəyərli tövsiyələr verərək onlara müvəffəqiyyətlər arzuladı.

Mərasimdə çıxış edən Azərbaycan Müəllimlər İnstitutunun rektoru, millət vəkili Aqiyə Naxçıvanlı ölkəmizdə elmin, təhsilin inkişafına, həmçinin gənclərə göstərilən diqqət və qayğıdan ətraflı söz açdı. Rektor keçirilən tədbirin əhəmiyyətinə toxunaraq belə bir nüfuzlu elmi konfransa ev sahibliyi etdiklərindən məmnunluq hissi keçirdiyini dedi və konfrans iştirakçılarına ən xoş istəklərini çatdırdı.

Bakı Dövlət Universitetinin doktorantı Rəşad Sadıqov çıxış edərək onların elmi, yaradıcılıq potensialının üzə çıxarılmasına, həmçinin tədqiqatçılıq bacarıqlarının inkişaf etdirilməsinə, elmi nailiyyətlərinin birlikdə müzakirə edilməsinə xidmət edən belə konfransların keçirilməsinin təqdirəlayiq olduğunu söylədi, respublikamızda gənclər üçün yaradılan hərtərəfli imkan və şəraitə görə ölkə başçısı cənab İlham Əliyevə gənclər adından minnətdarlıq etdi.

Onu da qeyd edək ki, iki gün davam edən elmi konfransın sonunda elmi işinin aktuallığı, yeniliyi və mövzusunu auditoriyaya çatdırmaq bacarığı ilə fərqlənən məruzəçilərə Təhsil Nazirliyinin sertifikatları təqdim olundu. Konfransın materiallarının hər il olduğu kimi bu il də kitab şəklində çap olunaraq iştirakçılara verilməsi qərara alındı.

Samirə KƏRİMOVA

Azərbaycan müəllimi.- 2011.- 23 dekabr.- S.6.