ADNA-nın əcnəbi vətəndaşlar üçün hazırlıq fakültəsinin 50 illik yubileyinə həsr olunan tədbir keçirildi

Dekabrın 27-də Azərbaycan Dövlət Neft Akademiyasının əcnəbi vətəndaşlar üçün hazırlıq fakültəsinin 50 illik yubileyinə həsr olunan tədbir keçirildi.

Azərbaycan Respublikasının Dövlət himni səsləndirildikdən sonra ali təhsil müəssisəsinin akt zalında keçirilən mərasimi ADNA-nın rektoru, akademik Siyavuş Qarayev açaraq bu gün əlamətdar bir tarixi günün qeyd olunduğunu bildirdi. Rektor rəhbərlik etdiyi ali məktəbdə 50 il öncə əcnəbi vətəndaşlar üçün hazırlıq fakültəsinin yaradıldığını deyərək onun fəaliyyəti barədə ətraflı məlumat verdi. İftixar hissi ilə bildirdi ki, adıçəkilən fakültə Moskvadakı Patris Lumumba adına Xalqlar Dostluğu İnstitutundan sonra keçmiş SSRİ məkanında əcnəbi vətəndaşlar üçün nəzərdə tutulmuş ikinci tədris mərkəzi olub.

Qeyd olundu ki, 50 il ərzində 13 min məzunu olan fakültə dünyanın 103 ölkəsi üçün dövlət və aparıcı elm xadimləri, istehsalat rəhbərləri, neft və neft-kimya mütəxəssisləri yetişdirib. Siyavuş Qarayev rəhbər vəzifələrə çatmış və fakültənin fəaliyyətini həmişə yüksək qiymətləndirən məzunlar arasında daim doğma ali təhsi müəssisəsi ilə əlaqə saxlayan Anqola Respublikasının indiki prezidenti Joze Eduardu Duş Santuşun, onlarla əməkdaşlıq edən "Petrovyetnam" Dövlət Neft-Qaz şirkətinin rəhbərliyinin və digərlərinin xüsusi yer tutduğunu dedi.

Çıxışının sonunda rektor qazanılan nailiyyətlərdə əcnəbi vətəndaşlar üçün hazırlıq fakültəsinin müəllimlərinin xüsusi əməyi olduğunu söyləyərək onları fakültənin 50 illik yubileyi münasibəti ilə təbrik etdi.

Sonra çıxış üçün söz təhsil naziri Misir Mərdanova verildi.

İştirakçıları salamlayan təhsil naziri onları bu tədbirdə görməsindən məmnunluq hissi keçirdiyini bildirdi. Nazir ölkəmizdə ilk texniki ali təhsil ocağı kimi çağdaş elm və təhsil tarixində özünəməxsus yer tutan, respublikamızda sənaye və iqtisadiyyatın müxtəlif sahələri üçün yüksək ixtisaslı milli mühəndis kadrların yetişdirilməsinə sanballı töhfələr verən Azərbaycan Dövlət Neft Akademiyasının dövlət və millət qarşısında böyük xidmətlərinin olduğunu xüsusi qeyd etdi. Çıxışda ali təhsil müəssisəsinin fəaliyyət göstərdiyi 91 il ərzində təkcə Azərbaycan üçün deyil, keçmiş Sovetlər Birliyinin müxtəlif respublikaları ilə yanaşı, xarici ölkələr üçün də yüksək savada, bacarığa malik elm və mühəndis kadrlarının hazırlığı ilə bağlı mühüm işlər gördüyü bildirildi. Bu gün 50 illiyi qeyd olunan ADNA-nın əcnəbi vətəndaşlar üçün hazırlıq fakültəsinin fəaliyyət göstərdiyi müddətdə böyük inkişaf yolu keçdiyini söyləyən təhsil naziri fakültənin xarici ölkələr üçün peşəkar kadr hazırlığı işindəki əhəmiyyətli rolundan danışdı.

Nazir yola salmağa hazırlaşdığımız 2011-ci ilin ölkəmizin ictimai-siyasi həyatında bir sıra əlamətdar tarixi hadisələrlə, o cümlədən bir çox ali təhsil müəssisələrinin yubileylərinin keçirilməsi ilə yadda qaldığını tədbir iştirakçılarının diqqətinə çatdırdı. Nazir Misir Mərdanov xüsusilə respublikamızın həyatında bu il baş vermiş ən önəmli hadisənin-Azərbaycan Respublikasının BMT-nin Təhlükəsizlik Şurasına qeyri-daimi üzv seçilməsini ölkə başçısı cənab İlham Əliyevin apardığı daxili və xarici siyasətin uğurlu nəticəsi olduğunu qürur hissi ilə qeyd etdi.

Təhsil naziri Azərbaycan Dövlət Neft Akademiyasına rəhbərlik edən Siyavuş Qarayevin fəaliyyətini yüksək qiymətləndirərək əcnəbi vətəndaşlar üçün hazırlıq fakültəsinin müəllim və tələbələrini yubiley münasibəti ilə öz adından, bütövlükdə Azərbaycanın təhsil işçiləri adından təbrik edərək onlara yeni-yeni nailiyyətlər arzuladı. Nazir Misir Mərdanov daha sonra yüksək ixtisaslı kadrların hazırlanması sahəsində səmərəli elmi-pedaqoji fəaliyyətinə görə və akademiyanın əcnəbi vətəndaşlar üçün hazırlıq fakültəsinin 50 illiyi münasibəti ilə "Azərbaycan Respublikasının qabaqcıl təhsil işçisi" döş nişanı və Fəxri fərmanlara layiq görülmüş əməkdaşların adlarını açıqladı.

Səhnəyə dəvət olunan təhsil işçilərinə layiq görüldükləri mükafatlar təqdim edildi.

Çıxış üçün söz alan əcnəbi vətəndaşlar üçün hazırlıq fakültəsinin dekanı Rafiq Kazımov, fakültənin dillər kafedrasının müdiri, əməkdar müəllim Aida Yakovleva çalışdıqları ali təhsil müəssisəsində əcnəbi tələbələrlə aparılan işlərdən söz açaraq bundan sonra da yüksək ixtisaslı kadrların hazırlanmasında var qüvvələrini əsirgəməyəcəklərini dedilər.

Sonda əcnəbi gənclər çıxış edərək ali təhsil müəssisəsində onların yüksək bilik və savad almaları üçün yaradılan şəraitdən razılıq hissi ilə danışdılar, göstərilən diqqət və qayğıya görə ADNA-nın rəhbərliyinə, professor-müəllim heyətinə öz minnətdarlıqlarını bildirdilər.

Samirə KƏRİMOVA

Azərbaycan müəllimi.- 2011.- 30 dekabr.- S.5.