Layihənin yekun konfransı
Fevralın
8-də "Hyatt" otelində Avropa İttifaqı tərəfindən
maliyyələşdirilən "Peşə təhsili və
təlimi sahəsində islahatlar strategiyası və Azərbaycanın
seçilmiş rayonunda pilot icrası" (AzVET) layihəsinin
yekun konfransı keçirildi.
Qeyd
edək ki, AzVET layihəsinin reallaşdırılmasında
qarşıya qoyulan əsas vəzifə Azərbaycanın
qeyri-neft sektorunun rəqabət qabiliyyətinin yüksəldilməsi
və ilk peşə-ixtisas təhsili (İPİT) məzunları üçün
iş imkanlarının artırılmasıdır. Bu məqsədlə
İPİT-in müasirləşdirilməsi üzrə
strategiyanın və fəaliyyət proqramının
hazırlanması, səriştəyə əsaslanan
müasir İPİT sisteminin formalaşdırılması nəzərdə
tutulur.
Tədbirdə
təhsil naziri Misir Mərdanov, nazir müavinləri, Azərbaycanın
dövlət qurumlarının, beynəlxalq və
qeyri-hökumət təşkilatlarının nümayəndələri,
sahibkarlar, Təhsil Nazirliyinin müvafiq şöbə və
struktur bölmələrinin, təhsil müəssisələrinin
rəhbərləri və KİV təmsilçiləri
iştirak edirdilər.
Konfransı
giriş sözü ilə açaraq
iştirakçıları salamlayan təhsil naziri Misir Mərdanov
bu tədbirin Azərbaycan təhsili üçün çox
böyük əhəmiyyət kəsb etdiyini bildirdi. Nazir bu
layihənin həyata keçirilməsi nəticəsində
Azərbaycanda İPİT üçün yeni milli
strategiyanın formalaşdırılması, işəgötürənlərin
ehtiyacları üzərində qurulmuş yeni İPİT
proqramlarının hazırlanması və sınaqdan
keçirilməsi sahəsində əldə olunmuş nailiyyətlərdən
söz açdı.
Sonra
təhsil naziri "İlk peşə-ixtisas təhsilinin
mövcud vəziyyəti, problemlər və perspektivlər"
mövzusunda təqdimatla çıxış etdi. Təqdimatda
öncə ölkənin İPİT müəssisələri,
şagird qəbulunun vəziyyəti, bu sahənin 2005-2011-ci
illərdə maliyyələşdirilməsi, peşə təhsili
müəssisələrində mövcud olan problemlər
haqqında ətraflı məlumat verildi.
Ölkə
Prezidenti cənab İlham Əliyevin Sərəncamı ilə
"Azərbaycan Respublikasında texniki peşə təhsilinin
inkişafı üzrə Dövlət Proqramı (2007-2012-ci
illər)"nın təsdiq edilməsindən sonra bu sahədə
ciddi dəyişikliklərin baş verdiyini vurğulayan Misir Mərdanov
daha sonra Proqram çərçivəsində həyata keçirilmiş tədbirləri
konfrans iştirakçılarının diqqətinə
çatdırdı.
Qeyd
olundu ki, ötən müddət ərzində 11 peşə
təhsili müəssisəsi əsaslı təmir edilmiş
və müasir avadanlıqlarla təchiz olunmuşdur. Nazirlər
Kabinetinin qərarı ilə Qəbələ Turizm və
Otelçilik üzrə Peşə Tədris Mərkəzi və
İsmayıllı Peşə Tədris Mərkəzi
yaradılmışdır. 2008-2011-ci illər ərzində
20-dən artıq İPİT müəssisəsinin müasir
informasiya-kommunikasiya texnologiyaları, xidmət, inşaat,
radiotexnika və s. sahələr üzrə maddi-texniki
bazası gücləndirilmiş, 9 adda dərslik
hazırlanaraq və pulsuz bu müəssisələrə
çatdırılmış, elektron peşə təhsili
portalı yaradılaraq istifadəyə verilmişdir və s.
Sonra
təqdimatda ilk peşə-ixtisas təhsili sahəsində
işəgötürənlər və peşə təhsili
müəssisələri ilə əməkdaşlıq çərçivəsində
həyata keçirilən layihələr haqqında məlumat
verildi. Nazir təqdimatın sonunda ilk peşə-ixtisas təhsilinin
təkmilləşdirilməsi ilə əlaqədar təkliflər
irəli sürdü.
Avropa
İttifaqının Azərbaycandakı nümayəndəliyinin
rəhbəri Rolan Kobiya çıxışında təmsil
etdiyi təşkilatın Azərbaycanda İPİT sisteminin
inkişafında rolundan bəhs etdi. Layihənin rəhbəri
Ann Castis, beynəlxalq ekspertlər Devid Hardi və Aleksandr
Siboni öz təqdimatlarında İPİT sisteminin gələcək
inkişafını təmin etmək üçün tətbiq
edilən proses və prosedurlar barədə ətraflı məlumat
verdilər.
İsmayıllı
Rayon İcra Hakimiyyətinin başçısı Nizami Ələkbərov
yeni yaradılmış İsmayıllı Peşə Tədris
Mərkəzi haqqında təqdimat etdi.
Konfrans
iştirakçıları daha sonra İmproteks Şirkətlər
Qrupunun vitse-prezidenti Vüqar Ələkbərov, Tacirlər və
İstehsalçılar Birliyinin sədri Sevgim Rəhmanov və
Azərbaycan Respublikası Sahibkarlar (İşəgötürənlər)
Təşkilatları Milli Konfederasiyasının prezidenti Məmməd
Musayevin biznesin inkişaf etməsi və uğur
qazanılmasında İPİT sisteminin vacibliyi barədə təqdimatlarını
dinlədilər.
Konfrans
təhsil nazirinin yekun sözü ilə başa
çatdı.
Hicran ƏKBƏROVA
Azərbaycan müəllimi.- 2011.-
11 fevral.- S.4.