"Həmkara dəstək" proqramı çərçivəsində təlimlər keçirilir

Azərbaycanda "Həmkara dəstək" proqramı çərçivəsində müəllimlər üçün 1-5 mart tarixlərində beynəlxalq ekspert Les Foltos tərəfindən təlimlər keçirilir. "Mədəd" təşkilatının icraçı direktoru Elbrus Zərbaliyevdən aldığımız məlumata görə, Les Foltos "Həmkara dəstək" proqramının müəllifi olduğundan təlimlərin yüksək səviyyədə keçirilməsi gözlənilir.

Microsoft korporasiyasının təşəbbüsü olan, dünyanın bir sıra ölkəsində təbliğ edilən və müəllimlər üçün nəzərdə tutulmuş "Həmkara dəstək" proqramı Azərbaycanda "Mədəd" və "Microsoft Azərbaycan" təşkilatlarının təşəbbüsü və maliyyə dəstəyi ilə həyata keçirilir.

E.Zərbaliyev qeyd etdi ki, ölkəmizin bu proqramda iştirakı "Azərbaycan Respublikasında təhsil sisteminin informasiyalaşdırılması üzrə Dövlət Proqramı (2008-2012-ci illər)"na uyğun olaraq Təhsil Nazirliyinin "Microsoft Azərbaycan" ilə imzalanmış "Təhsildə əməkdaşlıq" Anlaşma Memorandumu çərçivəsində başlanmışdır. Artıq "Həmkara dəstək" proqramının tədris materialları Azərbaycan dilinə tərcümə edilmiş və layihədə iştirak etmək üçün seçilmiş müəllimlərə hazırlıq üçün paylanmışdır.

"Həmkara dəstək" proqramı məktəblərdə fəal müəllimlərin təlimçi rolunun yerinə yetirilməsinə və həmkarlarına dəstək göstərməsi məqsədi ilə yeni bilik və bacarıqlarının daha da təkmilləşdirilməsinə yönəlmişdir. Proqram çərçivəsində fəaliyyət göstərən təlimçi-müəllimlər məktəblərdə çalışan digər müəllimlərə informasiya və kommunikasiya texnologiyalarının tədrisdə istifadəsi üzrə praktiki məsləhətlər verəcəkdir. Hər bir məktəbdə belə təlimçi-müəllimin olması pedaqoji heyətə tədrisdə İKT-nin istifadəsini asanlaşdıracaqdır. Təlimçi-müəllimlərin seçimi zamanı təhsil müəssisələrində fəaliyyət göstərən metodistlərə üstünlük veriləcəkdir. Belə ki, metodistlərin həm tədris etdikləri fənn üzrə, həm də informasiya texnologiyalarının tədrisdə istifadəsi üzrə praktik məsləhətləri tədrisin keyfiyyətinin artmasına səbəb olacaqdır.

Proqramda iştirak etmək üçün informasiya-kommunikasiya texnologiyalarını tədrisdə daha effektiv tətbiq edən metodist-müəllimlər və təcrübəli müəllimlər cəlb olunmuşdur.

Azərbaycan müəllimi.- 2011.- 4 mart.- S.24.