Müəllim hazırlığı sahəsində problemlər müzakirə olundu

Oktyabrın 28-29-da Azərbaycan Müəllimlər İnstitutunda "Müəllim hazırlığının müasir problemləri" mövzusunda beynəlxalq elmi konfrans keçirilib.

Konfransın oktyabrın 28-də keçirilən plenar iclasında Azərbaycan Respublikasının təhsil naziri Misir Mərdanov, nazirliyin müvafiq şöbələrinin və struktur bölmələrinin rəhbərləri, Türkiyə, Rusiya, Ukrayna, Fransa və Gürcüstanın, eləcə də Azərbaycanın ali məktəblərinin nümayəndələri iştirak edirdilər.

İştirakçılar tədbirdən öncə institutda yaradılmış Heydər Əliyev Mərkəzi ilə tanış oldular. AMİ-nin rektoru Aqiyə Naxçıvanlı konfransı açaraq qeyd etdi ki, hazırda postsovet ölkələrinin təhsil sistemləri keçid dövrünü yaşayır. Bu dövrdə innovasiyaların mənimsənilməsi böyük əhəmiyyət kəsb edir. Bir tərəfdən sovet təhsil sisteminin köhnəlmiş prinsiplərindən əl çəkmək, digər tərəfdən o sistemin müsbət cəhətlərini qoruyub saxlamaq və inkişaf etdirmək müasir təhsil sisteminin qarşısında duran ən mühüm vəzifələrdən biridir. Hazırda Azərbaycanın təhsil sistemi dünya təhsil məkanına sürətlə inteqrasiya edir. AMİ-nin yaranma tarixi və fəaliyyətindən, mövcud problemlərdən söz açan rektor iştirakçıların diqqətinə çatdırdı ki, hazırda bu təhsl ocağında 10 min tələbə, 150 magistr təhsil alır, 700 nəfərdən artıq professor-müəllim heyəti çalışır.

Sonra təhsil naziri Misir Mərdanov "Müəllim hazırlığının aktual problemləri" mövzusunda məruzə ilə çıxış etdi.

Konfransın çox vacib bir məsələyə həsr olunduğunu deyən təhsil naziri bildirdi ki, hər bir ölkənin gələcəyi məktəbin və müəllimin bugünkü qlobal çağırışlara necə cavab verməsindən asılıdır. Danılmaz faktdır ki, müəllim cəmiyyəti yaxşılığa doğru dəyişdirməyə qadir olan həlledici qüvvədir. Bu səbəbdən hazırda ali məktəb qarşısında yeni nəsil müəllimlərin hazırlanması və pedaqoji kadrların ixtisasartmasının müasir, daha səmərəli modelinin yaradılması kimi mühüm vəzifələr durur.

Ölkəmizdə təhsilə və müəllimlərə daim yüksək dövlət qayğısı göstərildiyini vurğulayan nazir diqqətə çatdırdı ki, müstəqillik illərində pedaqoji işçilərin əməkhaqqı 10 dəfədən çox artmışdır. Son bir neçə il ərzində ölkə Prezidenti cənab İlham Əliyevin sərəncamları ilə 2500-ə yaxın müəllim müxtəlif mükafatlara layiq görülmüşdür. Müəllimlərin innovasiya fəaliyyətini inkişaf etdirmək məqsədilə 2008-ci ildən başlayaraq dövlət başçısının müvafiq sərəncamı ilə ölkəmizdə "Ən yaxşı müəllim" və "Ən yaxşı məktəb" müsabiqələri keçirilir.

Təhsil naziri ölkə Prezidentinin sərəncamına əsasən hazırlanmış "Təhsil müəssisələrində işin dövlət qulluğunun xüsusi növünə aid edilməsinə dair Konsepsiya" təsdiq edildikdən sonra müəllimin statusunun yüksəldilməsi və əməyinin stimullaşdırılması sahəsində müsbət dəyişikliklərin olacağına ümid etdiyini bildirdi. Qeyd etdi ki, müəllimin maddi cəhətdən stimullaşdırılması, sosial statusunun yüksəldilməsi və həyat şəraitinin yaxşılaşdırılması sahəsində görülən işlər pedaqoji kadr hazırlığı aparılan ali təhsil müəssisələrimizin statusunun da əsaslı şəkildə dəyişməsinə səbəb olacaqdır.

Nazirin məruzəsində daha sonra son illər ölkəmizdə müəllim hazırlığı ilə bağlı görülən işlərdən, bu sahədə mövcud olan problemlərdən və onların həlli istiqamətində həyata keçirilən tədbirlərdən bəhs olundu. Konfrans iştirakçılarına məlumat verildi ki, müəllim hazırlığı sahəsindəki problemləri kompleks şəkildə həll etmək məqsədilə Təhsil Nazirliyi tərəfindən Dünya Bankının ayırdığı kreditin bir hissəsinin fasiləsiz pedaqoji təhsilin konsepsiyasının, ibtidai sinif müəllimi hazırlığı kurikulumunun, habelə "Təhsilin əsasları" adlı yeni fənnin proqram və dərsliyinin hazırlanmasına yönəldilməsi qərara alınıb. Bu işə ölkəmizin aparıcı alim və mütəxəssisləri, beynəlxalq və milli ekspertlər cəlb olunub. Onların gərgin əməyi nəticəsində fasiləsiz pedaqoji təhsil sisteminə daxil olan tədris müəssisələrinin sosial statusunun möhkəmləndirilməsini, təlim və tərbiyə prosesinin vahidliyini, sistemin dövlət, ictimai və şəxsi prioritetlərini təmin edən "Fasiləsiz pedaqoji təhsil və müəllim hazırlığının konsepsiya və strategiyası" hazırlanıb.

Sonra Moskva Açıq Avrasiya İnstitutunun professoru, Psixologiya Elmləri Beynəlxalq Akademiyasının akademiki, psixologiya elmləri doktoru Aleksandr Morozov "Yeni tip müəllimin formalaşması müasir təhsilin inkişafının əsas faktoru kimi" mövzusunda məruzə-təqdimatla çıxış etdi.

Plenar iclasın sonunda Ukrayna Milli Bioresurslar və Təbiətdənistifadə Universiteti haqqında film nümayiş etdirildi.

Sonra konfransın işi bölmələrdə davam etdirildi.

***

Oktyabrın 29-da "Müəllim hazırlığının müasir problemləri" mövzusunda beynəlxalq elmi konfransın yekun iclası keçirildi. AMİ-nin rektoru Aqiyə Naxçıvanlı bu tədbirdə fəal iştirak edən nümayəndələrə, xüsusən də xarici ölkələrdən gələn qonaqlara minnətdarlığını bildirdi.

İclasda bölmə sədrlərinin hesabatları dinlənildi, müəllim hazırlığı sahəsində mövcud problemlər təhlil edildi, maraqlı təkliflər səsləndi.

Konfransın işinə qətnamənin qəbul edilməsi ilə yekun vuruldu. Xarici ölkələrdən gələn nümayəndələrə bu tədbirlə bağlı fotoalbom və hədiyyələr təqdim olundu.

Hicran ƏKBƏROVA

Azərbaycan müəllimi.- 2011.- 4 noyabr.- S.2.