Futbolçu qızlar Yeni ili uğurla qarşıladılar

"Azərbaycan Respublikasında Futbolun inkişafına dair Dövlət Proqramı (2005-2015-ci illər)"-nın tələblərinə uyğun olaraq digər təhsil müəssisələrində olduğu kimi, Bakı şəhərinin idman məktəblərində də çox mühüm işlər həyata keçirilir. Bu münasibətlə daxili imkanlar hesabına yeni futbol idman qrupları açılmış, bu sahədə kadr potensialı gücləndirilmiş, Bakı Şəhəri üzrə Təhsil İdarəsi tərəfindən idman məktəblərinə yeni idman qurğuları, lazımi avadanlıq verilmişdir.

Göstərilən diqqət və qayğının, məqsədyönlü tədbirlərin nəticəsində idman məktəblərində futbolun sürətli inkişafına, gənc futbolçuların peşəkarlığının artırılmasına nail olunmuşdur. Çox maraqlıdır ki, belə məktəblərdə futbol nəinki oğlanlar arasında, hətta qızlar arasında da geniş yayılmışdır. Bunu ötən ilin son həftəsində 1994-1995-ci il təvəllüdlü qızlardan ibarət futbol komandaları arasında keçirilən Azərbaycan kuboku uğrunda futbol yarışı bir daha təsdiqlədi. Futbolçu qızlar yüksək texnika nümayiş etdirdilər. Zonalar üzrə finala vəsiqə almış Zaqatala və Bakı şəhəri 9 nömrəli uşaq-gənclər idman məktəblərinin qızlardan ibarət futbol komandaları Şağan Olimpiya İdman Kompleksində keçirilən yarışda birinci və ikinci yerləri bölüşdülər. Daha çox hazırlıqlı Bakı şəhəri 9 nömrəli Uşaq-Gənclər İdman Məktəbinin qızlardan ibarət futbol komandası rəqibini 9:0 hesabı ilə məğlub edərək ölkə kubokuna sahib oldu.

Sevincimizi qaliblərlə bölüşdük. Söhbət əsnasında idman məktəbinin direktoru Zabil Orucov qələbənin qazanılmasında məşqçi-müəllimlər Zamin Əsədullayevin və Xalidə Nəsibovanın əməyini xüsusi vurğuladı. O, qeyd etdi: "1994-1995-ci il təvəllüdlü qızlardan ibarət futbol komandaları arasında dünya birinciliyi 2012-ci ildə Bakıda keçiriləcək. Birincilikdə qızlardan ibarət respublika yığması da iştirak edəcək. Məktəbimizin 6 nəfər yetirməsi bu komandada çıxış edir. Əminik ki, dünya birinciliyində də qələbə bizim olacaq".

Sizə yeni-yeni uğurlar arzulayırıq, futbolçu qızlar.

R.TALIBOĞLU

Azərbaycan müəllimi.- 2011.- 7 yanvar.- S.16.