Kimyaçı qadınlar BDU-da "dəyirmi masa" keçirdilər

Bakı Dövlət Universitetində Ailə, Qadın və Uşaq Problemləri üzrə Dövlət Komitəsinin təşəbbüsü və təşkilatçılığı ilə "Azərbaycan kimyaçı qadınları "Beynəlxalq Kimya ili"ndə: problemlər və perspektivlər" mövzusunda "dəyirmi masa" keçirilib. Tədbiri giriş sözü ilə açan universitetin rektoru, akademik Abel Məhərrəmov YUNESKO tərəfindən 2011-ci ilin "Kimya ili" elan edilməsinin əhəmiyyətindən danışıb. "Dəyirmi masa"da iştirak edən kimyaçıların bu sahənin inkişafı istiqamətində gördüyü işlərə diqqət çəkən rektor, qadınların ictimai-siyasi, elmi və digər sahələrdə oynadıqları xüsusi rolu da yüksək qiymətləndirib.

Daha sonra Ailə, Qadın və Uşaq Problemləri üzrə Dövlət Komitəsinin sədri Hicran Hüseynova çıxış edərək "dəyirmi masa"nın ölkədə kimya elminin inkişafında qadın alimlərin roluna həsr olunduğunu qeyd edib. Bildirilib ki, ulu öndər Heydər Əliyev tərəfindən əsası qoyulmuş dövlət siyasətinin məntiqi nəticəsi kimi bütün sahələrdə qadınların fəaliyyəti üçün geniş imkanlar yaradılıb və bu istiqamətdə Prezident İlham Əliyevin rəhbərliyi altında yeni uğurlu addımlar atılmaqdadır. Hicran Hüseynova onu da qeyd edib ki, Azərbaycanın birinci xanımı, Heydər Əliyev Fondunun prezidenti, millət vəkili Mehriban Əliyevanın qadınların problemlərinə, onların ictimai həyatda aktiv rolunun təmin edilməsinə diqqəti bütün cəmiyyət üçün nümunədir.

Daha sonra ombudsman Elmira Süleymanova və digər çıxış edənlər Azərbaycan kimyaçı qadınlarının elmimizə verdiyi dəyərli töhfələrdən danışıblar.

Azərbaycan müəllimi.- 2010.- 28 yanvar.- S.5.