İnformatika müəllimləri üçün zona seminarı keçirilib

Son illərdə informatika fənninin tədrisi ilə bağlı bir sıra məsələlər həllini tapmış, dövlət proqramları çərçivəsində məktəblərimiz kompüter texnikası ilə təmin edilmiş, fənn üzrə bütün siniflər üçün dərsliklər, o cümlədən yeni kurikulum əsasında ibtidai siniflər üçün dərslik komplektləri hazırlanıb şagirdlərin istifadəsinə verilmişdir. Buna baxmayaraq, yeni dərsliklərlə işləyən müəllimlərin, eləcə də məktəb rəhbərlərinin bu sahədə müəyyən metodiki köməyə ehtiyacı hiss olunur. Bu ehtiyacı nəzərə alaraq Təhsil Nazirliyinin Kənd rayonları üzrə ümumi təhsil şöbəsinin müdiri Aydın Əhmədovun təşəbbüsü və qabaqcıl informatika müəllimləri, "İnformatika" dərsliklərinin müəllifləri, həmin dərsliklərin hazırlanması ilə məşğul olan nəşriyyatların dəstəyi ilə fənnin tədrisinin aktual məsələlərinə həsr olunmuş zona seminarlarının keçirilməsi qərara alınmışdır.

İlk belə seminar Abşeron, Xızı, Siyəzən və Şabran rayonlarının müəllim və rəhbər işçiləri üçün 13 aprel 2012-ci ildə Xırdalan şəhəri 1 nömrəli tam orta məktəbdə keçirilmişdir. Seminarda "İnformatika" dərsliklərinin müəllifləri İsmayıl Sadıqov, Naidə İsayeva və "Bakı" nəşriyyatının direktoru Zaur İsayev iştirak etmiş, müəllimlərin fənnin tədrisi ilə bağlı müzakirələrdə verdikləri sualları cavablandırmışlar. Seminarda informatikanın məktəbdə tədrisinə həsr olunmuş www.informatik.az saytı, eləcə də sosial şəbəkədə informatika müəllimlərinin qrupu haqqında məlumat verilmişdir. Qeyd edilmişdir ki, nəinki informatika müəllimlərinin, eləcə də İKT sahəsində fəaliyyət göstərən şirkətlərin mütəxəssislərinin qrupda fəal iştirakı, onların texniki məsələlər, proqramlaşdırma ilə bağlı verdikləri məsləhətlər müəllimlər üçün çox faydalı olur. Seminar iştirakçılarına da göstərilən İnternet resurslarından istifadə etmələri tövsiyə olunmuşdur.

Seminarda müəllimlərin yeni kurikulum əsasında hazırlanmış dərslik komplektləri ilə bağlı rəy və təklifləri dinlənilmişdir.

Növbəti seminarın Quba, Xaçmaz və Qusar rayonlarının müəllimləri üçün Quba şəhərində keçirilməsi nəzərdə tutulub.

Azərbaycan müəllimi.- 2012.- 20 aprel.- S.4.