Beynəlxalq müsabiqələr laureatı

Vüsalə Babayeva 1997-ci ildə Bakıda bəstəkar ailəsində dünyaya göz açıb. İstedad və bacarığını görən anası bəstəkar Sevda Məmmədli 2003-cü ildə onu Üzeyir Hacıbəyli adına Bakı Musiqi Akademiyasının Orta ixtisas musiqi məktəb-studiyasına - fortepiano ixtisası üzrə Ayişə Əliyevanın sinfinə gətirib. Qısa müddət ərzində bir- birindən gözəl mahnıların ifaçısına çevrilən Vüsalə 2006-cı ildə "Məktəb studiya-25" Uşaq musiqi festivalında II yer, 2007-ci ildə Qara Qarayev adına gənc pianoçuların IV Bakı musiqi müsabiqəsində III yer, 2008-ci ildə Qara Qarayevin anadan olmasının 90 illiyinə həsr olunmuş "Gənc musiqiçilər təhlil və ifa edir" I Respublika elmi ifaçılıq müsabiqəsində II yer, 2010-cu ildə isə Qara Qarayev adına pianoçuların I Beynəlxalq elmi-ifaçılıq müsabiqəsində II yeri tutub. 2011-ci ildə Vüsalə Bolqarıstanın Dobriç-Albena şəhərində keçirilən "Ümidlər, istedadlar, sənətkarlar" XVI Beynəlxalq müsabiqəsinin laureatı adını və I mükafatı qazanıb.

Azərbaycan bəstəkarlarının əsərlərini ifa etməkdən xüsusi zövq alıram, -deyən Vüsalə Şopenin, Listin və digər dahi bəstəkarların da əsərlərini sevə-sevə ifa etdiyini söylədi və gələcəkdə milli musiqimizin inkişafına töhfə verəcəyinə, yeni-yeni əsərlər bəstələyəcəyinə söz verdi.

Vüsalə Babayeva hazırda Bakıdakı "Zəngi" liseyinin və Üzeyir Hacıbəyli adına Bakı Musiqi Akademiyasının Orta ixtisas musiqi məktəb-studiyasının 10-cu sinif şagirdidir.

Azərbaycan Respublikasının Prezidenti İlham Əliyevin 29 mart 2012-ci il tarixdə imzaladığı "Gənc istedadların xüsusi təqaüdə layiq görülməsi haqqında" sərəncamı ilə Vüsalə Babayevanın adı Azərbaycanın gənc istedadlarının "Qızıl kitabı"na yazılmaqla o, xüsusi aylıq təqaüdə layiq görülüb.

V.Babayeva bütün istedad sahiblərinə göstərilən diqqət və qayğıya görə ölkə rəhbərinə və Heydər Əliyev Fondunun prezidenti Mehriban xanım Əliyevaya təşəkkürünü bildirdi.

Sifai SƏFƏROVA

Azərbaycan müəllimi.- 2012.- 27 iyul.- S.3.