Qafqaz Universitetində "IV Gənclik şənliyi"

Mayın 7-də Qafqaz Universitetində ümummilli lider Heydər Əliyevin anadan olmasının 89-cu ildönümünə həsr olunmuş "IV Gənclik şənliyi" keçirildi. Tələbələrin təşkilatçılığı ilə hazırlanmış tədbir çərçivəsində universitetin həyətində onların bədii və intellektual yaradıcılığının məhsulu olan rəsm əsərlərindən və əl işlərindən, maketlərdən ibarət sərgilər açılmış, köşklər quraşdırılmışdı. Qrup-qrup həmin köşklərdə əylənən tələbələr mahnı oxuyur, şeir söyləyirdilər.

Ənənəvi olaraq artıq dördüncü ildir ki, keçirilən bayram şənliyi ulu öndər Heydər Əliyevin ifasında Səməd Vurğunun "Azərbaycan" şeirinin bir bəndinin səsləndirilməsi ilə başlandı. Aparıcılar müasir Azərbaycan dövlətinin qurucusu və memarı, böyük siyasətçi və dövlət xadimi Heydər Əliyevə həsr olunmuş şeirlər söylədilər, onun xalqımız qarşısındakı misilsiz xidmətlərindən söz açdılar. Əsası ümummilli lider tərəfindən qoyulmuş quruculuq işlərinin, müdrik daxili və xarici siyasətin möhtərəm Prezidentimiz İlham Əliyev tərəfindən uğurla davam etdirildiyi, Azərbaycan həqiqətlərinin dünyaya çatdırılmasında, milli mədəniyyətimizin beynəlxalq aləmdə təbliğində YUNESKO-nun və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın xidmətləri vurğulandı.

Meydan istedadlı tələbələrə verildi. Azərbaycan Respublikası Gənclər və İdman Nazirliyinin təşkilatçılığı ilə bu ilin yazında Gəncədə keçirilmiş "Tələbə baharı" musiqi festivalında ayrı-ayrı nominasiyalar üzrə qalib olmuş Qafqaz Universitetinin qızlardan ibarət rəqs kollektivi, tələbələri mahnı və rəqslər ifa etdilər.

Sonra aparıcılar universitetdə 3000 tələbənin iştirakı ilə keçirilən "İlin adamı" sorğusunun nəticələri barədə məlumat verdilər. Məlumatdan bəlli oldu ki, aparılmış seçim zamanı "İlin müəllimi" nominasiyası üzrə Qafqaz Universitetinin eyni səs toplayan iki əməkdaşı - iş dünyası üzrə prorektor Təyyar Mustafayev və Azərbaycan dili və ədəbiyyatı bölməsinin baş müəllimi Rəhman Quliyev, "İlin idman adamı" nominasiyası üzrə ARDNŞ-ın prezidenti Rövnəq Abdullayev, "İlin yerli iş adamı" nominasiyası üzrə "Embawood" şirkətinin prezidenti Elşad Abbasov, "İlin xarici iş adamı" nominasiyası üzrə "Azercell Telekom"un prezidenti Əli Ağan, "İlin vətənpərvər millət vəkili" nominasiyası üzrə Milli Məclisin deputatı Qənirə Paşayeva, "Azərbaycanın beynəlxalq aləmdə tanıdılmasında xidmətlərinə görə ilin adamı" nominasiyası üzrə M.V.Lomonosov adına Moskva Dövlət Universitetinin Bakı filialının rektoru, professor Nərgiz Paşayeva qalib elan olunublar. Qafqaz Universitetinin rektoru, professor Əhməd Saniç professor Nərgiz Paşayevaya, digər qaliblərə ilin adamı seçilmələri barədə diplomları təqdim edərək onları təbrik etdi. Professor Əhməd Saniç professor Nərgiz Paşayevanın çoxcəhətli fəaliyyətinin bəzi məqamlarını diqqətə çatdıraraq Azərbaycanın xaricdə tanıdılması sahəsində böyük xidmətləri olduğunu, ölkələr və xalqlar arasında mehriban münasibətlərin möhkəmləndirilməsinə verdiyi töhfələrə görə bir sıra ölkələrin və təşkilatların ali mükafatlarına layiq görüldüyünü bildirdi.

Mərasimdə çıxış edən M.V.Lomonosov adına MDU-nun Bakı filialının rektoru, professor Nərgiz Paşayeva sorğuda onu Azərbaycanın beynəlxalq aləmdə tanınmasında göstərdiyi xidmətlərə görə ilin adamı seçdikləri üçün tələbələrə minnətdarlıq etdi, onlara təhsillərində uğurlar arzuladı. Professor Nərgiz Paşayeva ulu öndər Heydər Əliyevin keçdiyi şərəfli və mənalı həyat yoluna nəzər salaraq onun təhsil və gənclər siyasətinə böyük önəm verdiyini bildirdi.

Tədbir tanınmış müğənni Tünzalə Ağayevanın ifasında vətənpərvərlik mövzusunda mahnılarla davam etdirildi.

Yusif ƏLİYEV

Azərbaycan müəllimi.- 2012.- 11 may.- S.3.