Yeniyetmə ifaçımız beynəlxalq müsabiqədə uğurla çıxış edib

Bakı şəhəri G.Şaroyev adına 35 nömrəli 11 illik Musiqi məktəbinin VII sinif şagirdi, Prezident təqaüdçüsü Nəriman Əmiraslanov və onun müəllimi Siala Sinamdzqvarişvili bu ilin 16-23 avqust tarixlərində Avstriyanın paytaxtı Vyanada pianoçuların XII beynəlxalq müsabiqəsində iştirak ediblər.

Qeyd edək ki, Vyana şəhər rəhbərliyinin sponsorluğu və "Panmusica Austria" Assosiasiyasının təşkilatçılığı ilə gerçəkləşdirilən müsabiqə çərçivəsində ustad dərsləri də təşkil olunub.

Avstriya, Rusiya, ABŞ, Yaponiya, Koreya, Çin, Qazaxıstan və digər ölkələrdən ifaçıların iştirak etdiyi üç yaş qrupu və iki mərhələdə keçirilən müsabiqənin A qrupunda (12 yaşadək) Azərbaycanı Nəriman Əmiraslanov təmsil edib.

Birinci mərhələdən öncə tanınmış professor Chung Leedən ustad dərsləri alan 12 yaşlı pianoçumuz V.A.Motsartın Do minor sonatasının birinci hissəsini və Lya major sonatasının üçüncü hissəsini - "Türk marşı"nı ifa edib. Bu mərhələdə uğurla çıxış edən Nəriman 7 iştirakçı ilə birlikdə ikinci mərhələyə vəsiqə qazanıb.

Müsabiqənin finalı avqustun 23-də List zalında keçirilib. Kipr, Yaponiya, Argentina və Macarıstandan olan münsiflər heyətinin qərarı ilə A qrupunda ikinci mərhələdə çıxış edən yeddi iştirakçıdan birinci yerə Çin, ikinci yerə Yaponiya nümayəndələri, üçüncü yerə isə Azərbaycanı təmsil edən Nəriman Əmiraslanov layiq görülüb.

Sənət yarışmasının sonunda qaliblərə diplom və xüsusi hədiyyələr təqdim olunub.

Samirə KƏRİMOVA

Azərbaycan müəllimi.- 2012.- 7 sentyabr.- S.7.