Şamil Ağababa oğlu Qasımlı

Azərbaycanın elm və təhsil ictimaiyyətinə ağır itki üz vermişdir. Respublikamızın tanınmış alimi, fəlsəfə elmləri doktoru, əməkdar müəllim, Azərbaycan Müəllimlər İnstitutunun tədris işləri üzrə prorektoru, professor Şamil Ağababa oğlu Qasımlı 2012-ci il sentyabrın 16-da 71 yaşında vəfat etmişdir.

Şamil Qasımlı 1941-ci il sentyabrın 16-da Sabirabad rayonunda anadan olmuşdur. 1949-cu ildə Sabirabad rayon rus orta məktəbinə daxil olmuş, 1959-cu ildə həmin məktəbi bitirmişdir. O, 1960-cı ildə M.F.Axundov adına Azərbaycan Pedaqoji Dillər İnstitutuna qəbul olunmuş, 1965-ci ildə həmin institutun rus dili və ədəbiyyatı fakültəsini bitirmişdir.

Gənc mütəxəssis Şamil Qasımlı institutu bitirdikdən sonra qısa müddət Azərbaycan Kommunist Gənclər İttifaqı Mərkəzi Komitəsi aparatında təlimatçı və Abşeron rayonunun məktəblərində rus dili müəllimi vəzifələrində işləmişdir.

Professor Şamil Qasımlı 1966-cı ildə Azərbaycan Xalq Təsərrüfatı İnstitutunda əmək fəaliyyətini davam etdirmişdir. O, 1991-ci ilə qədər həmin institutda müxtəlif vəzifələrdə çalışmışdır. 1969-1971-ci illərdə prorektorun və rektorun köməkçisi, müəllim və baş müəllim vəzifələrində işləmiş, 1975-ci ildən dosent vəzifəsini tutmuş və doktorluq dissertasiyasını başa çatdırmaq məqsədilə baş elmi işçi vəzifəsinə köçürülmüşdür.

O, 1972-ci ildə Azərbaycan Dövlət Universitetində namizədlik, 1989-cu ildə M.V.Lomonosov adına Moskva Dövlət Universitetində doktorluq dissertasiyaları müdafiə etmişdir.

İstedadlı alim Şamil Qasımlı M.V.Lomonosov adına Moskva Dövlət Universitetində müvəffəqiyyətlə doktorluq dissertasiyası müdafiə etdikdən sonra Azərbaycan Xalq Təsərrüfatı İnstitutunda fəlsəfə kafedrasının dosenti, 1991-ci ildə həmin kafedranın professoru vəzifəsinə seçilmişdir. Hələ gənc yaşlarından kollektivin etibarını qazanmış Şamil Qasımlı ictimai həyatda da fəal iştirak edərək institutun partiya komitəsi katibinin müavini, həmkarlar komitəsinin, xalq nəzarəti komitəsinin sədri vəzifələrində işləmişdir.

Bir neçə monoqrafiya və müxtəlif kitabların, 80-dən artıq elmi əsərin müəllifi olan professor Şamil Qasımlının əsas tədqiqat sahələri şəxsiyyətin sosiallaşması, formalaşması və hərtərəfli inkişafı, cəmiyyətin tərəqqisində insan amili, insanın mahiyyəti, mövcudluğu və müasir cəmiyyətdə inkişaf meyilləri, Azərbaycanda kadr hazırlanmasının aktual problemləri və s. olmuşdur.

Professor Şamil Qasımlı 1991-ci ildə Bakı Sosial İdarəetmə və Politologiya İnstitutunun professoru vəzifəsində çalışmağa başlamışdır. 1999-cu ildən 2005-ci ilədək Azərbaycan Respublikasının Prezidenti yanında Dövlət İdarəçilik Akademiyasında dekan, 2005-ci ildən ömrünün sonunadək isə Azərbaycan Müəllimlər İnstitutunda tədris işləri üzrə prorektor vəzifələrində işləmişdir.

Son illərdə professor Ş.A.Qasımlı bir neçə beynəlxalq, regional və respublika elmi konfrans və simpoziumlarında olduqca maraqlı problemlər üzrə çıxış və məruzələr etmiş, onun Türkiyə, Moskva və Bakıda yeni düşüncə tərzinə əsaslanan və mövcud reallığı əks etdirən maraqlı əsərləri çap olunmuşdur.

Şamil müəllim öz intellektual potensialı, yüksək mədəniyyəti və mənəvi keyfiyyətləri ilə tanınırdı. Nəinki yaxınları, dostları, iş yoldaşları, hətta bircə dəfə onunla ünsiyyətdə olanlar da Şamil müəllimin yüksək mədəniyyətinə, intellektual potensialına, sağlam düşüncəsinə hörmətlə yanaşırdılar, onun bu keyfiyyətlərini yüksək qiymətləndirirdilər. O, insanları sevirdi, gənclərə böyük məhəbbət bəsləyirdi, ağıllı, bilikli, bacarıqlı və vicdanlı adamları dəyərləndirirdi.

Şamil Qasımlı qayğıkeş və nümunəvi ailə başçısı idi. Vətənpərvər ruhda böyütdüyü övladlarının yüksək ixtisaslı mütəxəssis kimi yetişməsinə çalışırdı.

Professor Şamil Qasımlını tanıyanlar onun çoxillik elmi və pedaqoji fəaliyyətini və təşkilatçılıq qabiliyyətini yüksək qiymətləndirirdilər. O, 2009-cu ildə "Əməkdar müəllim" fəxri adına layiq görülmüşdü.

Görkəmli alim, sevimli müəllim, böyük insan, mənəvi bütövlüyünə daima sadiq olmuş Şamil Ağababa oğlu Qasımlının əziz xatirəsi onu tanıyanların qəlbində həmişə yaşayacaqdır.

Allah rəhmət eləsin!

Azərbaycan Respublikası Təhsil Nazirliyi, Azərbaycan Müəllimlər İnstitutu

Azərbaycan müəllimi.- 2012.- 21 sentyabr.- S.4.