Harvard Universitetində Azərbaycanın

sürətli inkişafı misal gətiriləndə

xoş hisslər yaşayıram

Xaricdə təhsil alan tələbələrimiz

Bəhruz Balayev 1983-cü ildə Lənkəran səhərində anadan olub. 2001-ci ildə Bakıdakı Məmməd Rahim adına 7 nömrəli tam orta məktəbi fərqlənma attestatı ilə bitirib. Elə həmin il yüksək balla Azərbaycan Respublikasının Prezidenti yanında Dövlət İdarəçilik Akademiyasına qəbul olunub. Akademiyanı bitirdikdən sonra 2005-ci ildə ABS-ın Florida statındakı St.Tomas Universitetinin hüquq fakültəsinin mağistr bölməsinə qəbul olunub. 2012 -ci ildə həmin universitetdə hüquq elmləri doktoru dərəcəsi alıb. Uzun illər beynəlxalq təskilatlarda çalışıb. 2013-cü ildən etibarən Harvard Universitetində Edvard S. Mason proqramı üzrə təhsilini davam etdirir və eyni zamanda dövlət idarəçiliyi üzrə magistr dərəcəsinə yiyələnir.

Orta məktəb illərində çox aktiv şagird olmuşam. Qiymətlərim hər zaman əla olub. 1999-cu ildə IX sinifdə oxuyarkən Amerika Birləşmiş Ştatlarının dəstəyi ilə qardaşlaşmış məktəblər pilot proqramında istirak etmiş, şagird mübadiləsi çərçivəsində ABS-a göndərilmişəm. Müxtəlif fənn olimpiadalarında iştirak edərək təhsil aldığım məktəbi təmsil etmişəm.

"2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində 2013-2014-cü tədris ili üçün tələbələrin seçim prosesi çox səffaf və səmərəli həyata keçdi. Uzun illər ABS-da təhsil aldığım zaman şahidi olduğum və Qərb ölkələrində rast gəldiyim müsahibə metodlarından istifadə olunmasını alqışlayıram. Qeyd edim ki, xarici ölkədən baxdıqda son dövrdə Azərbaycan təhsilinin nəzərəçarpacaq dərəcədə inkişaf etdiyini görə bilərik. Təhsil Nazirliyi tərəfindən aparılan islahatlar, müsbət dəyişikliklər bu inkişafın davamlı olacağına ümid yaradır. Azərbaycan mətbuatını daim izləyirəm və təhsil sistemimizdə baş verən dəyişiklikləri alqışlayıram. Bu il böyük sayda Azərbaycan gəncinin "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində xaricə göndərilməsini, məncə, ölkəmizin uğurlu investisiyalarından biri kimi qiymətləndirmək olar. Hər bir ölkənin gələcək inkişafı onun istedadlı kadrlara malik olması və onların təhsil səviyyəsindən asılıdır.

Qeyd edim ki, əsası 1636-cı ildə qoyulmuş Harvard Universiteti ABŞ-ın ən qədim ali təhsil ocağıdır. Universitetin kampusu Massaçusets ştatının Kembric şəhərində yerləşir. Burada 2300 müəllim fəaliyyət göstərir. Onların arasında 43 Nobel mükafatı laureatı var. Dünya elminə ən çox Nobel mükafatı laureatı bəxş edən universitet də Harvarddır.

Tələbə həyatım çox maraqlı və intensivdir. Əsasən dərslərimlə məşğulam. Müxtəlif sahələrdə apardığım araşdırmalarım və müxtəlif səmərəli görüşlər dövlət idarəçiliyi sahəsində yeniliklərlə tanış olmağa şərait yaradır. Tələbə həyatımın çox hissəsi kitabxanada və ya birlikdə təhsil aldığım gənclərin əhatəsində keçir. Boş vaxtlarımı üzgüçülüklə və Çarlz çayı boyunca velosiped idmanı ilə məşğul olmaq, kitab oxumaqla keçirirəm. Asudə vaxtlarımda çalışıram ki, Harvard Universitetinin verdiyi ən dəyərli imkanlardan biri olan, maraqlandığım sahələr üzrə ekspertlər səbəkəsini inkişaf etdirim. Bununla yanaşı, ailəmə da vaxt ayırmağı özümə borc bilirəm. Azərbaycan mətbəxini anamdan öyrənmişəm və xarici yoldaşlarımı tez-tez qonaq dəvət etməyi və şam yeməyi zamanı səmərəli danışıqlar aparmağı xoşlayıram.

Hazırda yaşadığım Boston şəhəri Massaçusets ştatının paytaxtıdır və Amerika tarixinin yazıldığı şəhərlərdən biridir. Tarixdən məlum olan məşhur Boston çay dəsgahı da burada baş vermişdir. Şəhərin tarixiliyi, özünəməxsusluğu, Avropa sayağı arxitekturası insanı valeh edir. Havası Bakıdan soyuqdur və qış aylarında adətən qar ilə örtülür. Şəhər boyu keçən Çarlz çayının ətrafi çox gözəl və sonu görünməyən bir parkdır. Bostonun kənarında yerləşən Kembric şəhəri Harvard Universiteti tələbələrinin sevimli məkanıdır.

Amerikadakı Azərbaycan diasporası ilə sıx əlaqələrimiz var. Bostonda Azərbaycan diasporası qonaqpərvərliyi ilə seçilir. Tez-tez Nyu-Yorka səfər edirəm və yaxından tanıdığım Tomris Azəri xanımla (Amerika Azərbaycanlıları Cəmiyyətinin sədri) görüşür, Nyu-Yorkda Azərbaycan diasporasının təşkil etdiyi yığıncaqlarda və Dağlıq Qarabağ problemi barədə əsl həqiqətlərin dünya ictimaiyyətinə çatdırılmasına həsr olunmuş aksiyalarda iştirak edirəm.

Qeyd edim ki, ABŞ-a ilk dəfə gəldiyim 1999-cu ildən bəri yerli əhalinin nə dərəcədə Azərbaycanı tanımalarında və bizim diasporanın bir araya gəlməsində müsbət tendensiyaların olmasının şahidi olmuşam. Tez-tez Harvard Universitetində keçilən müxtəlif dərslərdə Azərbaycanın inkişaf sürətinin misal gətirilməsini gördükdə xoş hisslər yaşayıram.

Harvardda dərslər çox maraqlı keçir, dünya üzrə tanınmış professorların çıxışları isə qiymətsizdir. Universitetin tarixi və ənənələri bu gün nəinki tələbələri, hətta başqa ölkələrdən gələn turistləri də cəlb edir. Universitet rəsmi olaraq turist məkanı sayılır. Müxtəlif dövlət başçıları, nazirlər, beynəlxalq təşkilatların başçıları və məşhur alimlərlə universitetdə tez-tez görüşlər keçirilir. İxtisasım idarəçiliyin səmərəliliyini artırmaq, inkişaf yollarının axtarılması, dövlət və ictimai xadimlərin təcrübəsinin öyrənilməsindən ibarətdir.

Gələcəkdə xalqımıza xidmət etmək və Azərbaycanın daha da inkişafı naminə səmərəli fəaliyyətlə məşğul olmağı planlaşdırıram.

Bəhruz BALAYEV,

Harvard Universitetinin tələbəsi

Azərbaycan müəllimi.- 2013.- 13 dekabr.- S.10.