Nəğməkar şairlə görüş

 

Yanvarın 26-da Bakıdakı Osman Mirzəyev adına 190 nömrəli tam orta məktəbdə  əməkdar incəsənət xadimi, nəğməkar şair Baba Vəziroğlu ilə  görüş keçirilib.

 

Tədbirə Bakı Şəhəri üzrə Təhsil İdarəsinin İctimaiyyətlə əlaqələr şöbəsinin müdiri Zəminə Əliqızı, metodmərkəzin metodisti Ahu Məmmədova, "Azərbaycan məktəbi" jurnalının baş redaktoru, əməkdar müəllim Nəcəf Nəcəfov, xalq artisti, bəstəkar Faiq Sücəddinov, aktyor  Əbdül  Mahmudbəyov, Azərbaycan Yazıçılar Birliyinin katibi  Ədalət Əsgərov,  TİAHİ Səbail Rayon Komitəsinin sədri Mükafat Abbasov və digər qonaqlar dəvət olunmuşdular. Məktəbin direktoru, əməkdar müəllim Afət Bakıxanova pedaqoji kollektiv adından qonaqları, eyni zamanda nəğməkar şairi salamlayaraq Azərbaycan poeziyasının görkəmli söz sahiblərindən biri olan Baba Vəziroğlunun yaradıcılığından söz açdı.

"Ən yaxşı müəllim" müsabiqəsinin qalibi, pedaqogika üzrə  fəlsəfə doktoru, tədris işləri üzrə  direktor müavini Qənirə Əmircanova  şairin şeirlərindən parçalar söylədi və onun poeziyasının  məziyyətlərindən ətraflı bəhs etdı. Vurğulandı ki, söz mənəvi qidadır! Sözün qüdrəti ondadır ki, o milyonlarla insanın ürəyinə yol tapır. Şeir isə fikrin, duyğunun poetik ifadəsidir. Poeziya qəlb çırpıntısıdır. Poeziya  gizli dünyanın sirr dağarcığının açarıdır. Baba Vəziroğlu məhz belə söz sahiblərindəndir.

Sonra şagirdlərin ifasında şeirlər, şairin sözlərinə bəstələnmiş mahnılar səsləndi. Şairin "Ocaq" povestindən kiçik bir səhnəcik nümayiş  olundu. Məktəbin  "Təbəssüm" rəqs qrupu "Nəlbəki" rəqsini ifa etməklə iştirakçılarda xoş ovqat yaratdı. Musiqi müəllimi, bir neçə müsabiqənin qalibi, bəstəkar Reyhan Hacızadə ilk dəfə olaraq şairin sözlərinə bəstələdiyi "Bağışladım" mahnısını ifa etdi.

Bəstəkar Faiq Sücəddinov  sənət dostunun söz bayramında  şeirlərinə bəstələdiyi mahnılardan danışdı, gələcəkdə də bu əməkdaşlığı  davam etdirəcəyinə söz verdi, sonra isə mahnılarından birini ifa etdi.

BŞTİ-nin İctimaiyyətlə əlaqələr şöbəsinin müdiri Zəminə Əliqızı Baba Vəziroğlunun yaradıcılığı haqqında, onun gənc nəslə örnək ola biləcək kitabları barədə danışarkən xalqımızın görkəmli şairi  Səməd Vurğunun kitab haqqında söylədiyi bir bəndi  xatırlatmağı da unutmadı:

 

Hər sözü bir ulduz, bir şəffaf almaz,

Mənalar dünyası qaranlıq deyil,

Bu böyük kitablar yaranır az-az,

Çünki ömürlükdür, bir anlıq deyil.

 

Mərasimdə şair maraqlı görüşə görə  təhsil ocağının rəhbərliyinə və təşkilatçılara təşəkkürünü bildirdi.

Sonda gənc müğənni Ülviyyə Tağıyeva şairin sözlərinə bəstələnmiş "Nə vaxtsa dönəcəyəm" mahnısını ifa etdi.

 

 

Sifai SƏFƏROVA

 

Azərbaycan müəllimi.- 2013.-  1 fevral.- S.7.