Sumqayıtda gənc müəllimlərlə görüş keçirildi

Sumqayıt ŞTŞ-nin müdiri Mahal Əliyev Sumqayıt şəhər Gənc Müəllimlər Şurasının ən fəal üzvləri və gənc müəllimlərlə görüşdü. "Dəyirmi masa" ətrafında keçən görüşdə M.Əliyev bildirdi ki, bu gün hər bir gənc müəllimin əsas vəzifəsi Azərbaycan dövləti qarşısında öz məsuliyyətini dərk edən, xalqının milli ənənələrinə və demokratiya prinsiplərinə, insan hüquqlarına və azadlıqlarına hörmət edən, vətənpərvərlik və azərbaycançılıq ideyalarına sadiq olan, müstəqil və yaradıcı düşünən vətəndaş və şəxsiyyət yetişdirməkdir. Bütün bunlara nail olmaq üçün, ilk növbədə, gələcəyimiz olan gənclər gələcək nəslə həmişə nümunə olmalı, təşəbbüskar və yenilikləri qiymətləndirməyi bacaran, nəzəri və praktiki bilikləri sintez edərək "açıq dərs"lər verməyi və elmi-praktik konfranslarda məruzələrlə və layihələrlə çıxış etməyi bacarmalıdırlar.

Tanışlıq xarakteri daşıyan bu görüşün məqsədi açıqlanandan sonra gənc müəllimlər təkliflərini və məktəbdə olan problemlərini səsləndirdilər.

Çıxışlarda problemlərlə yanaşı, maraqlı təşəbbüslər də diqqətə çatdırıldı. Gənc müəllimlər - Aygün Rəhimova (28 nömrəli məktəbin tarix müəllimi), Lalə Tarverdiyeva (15 nömrəli məktəbin laborantı), Aygün Əhmədova (TET gimnaziyanın biologiya müəllimi), Şəfa Rzayeva (13 nömrəli məktəbin ingilis dili müəllimi, GMŞ-nın sədri), Samirə Tağıyeva (39 nömrəli məktəbin informatika müəllimi), Sidqiyyə Xıdırova (25 nömrəli məktəbin ingilis dili müəllimi), Səidə Xəlilova (45 nömrəli uşaq bağçasının tərbiyəçisi), Leyla Bayramova (47 nömrəli uşaq bağçasının tərbiyəçisi) və başqaları çıxış edərək öz şəxsi təcrübələrindən danışdılar. Eyni zamanda onlar Mahal Əliyevi öz "açıq dərs"lərinə dəvət etdilər.

İşgüzar şəraitdə keçən bu görüşdə müəllimlərin qaldırdıqları problemlərin bəzi həlli yolları elə auditoriyada həm müəllimlər, həm də rəhbərlik tərəfindən cavablandırıldı.

Tədbirin sonunda Mahal müəllim bildirdi ki, bu gün təhsil sektoruna dövlət tərəfindən göstərilən xüsusi diqqət və qayğı göz qabağındadır. Respublikamızda gənclər siyasəti uğurla həyata keçirilir. Ölkə Prezidentinin təhsil sistemi qarşısında qoyduğu vəzifələrə uyğun olaraq Təhsil Nazirliyi ən ciddi problemlərlə bağlı strateji təhlillər əsasında inkişaf proqramlarını reallaşdırır. Təhsil tariximiz üçün yeni və çox əhəmiyyətli bir haldır ki, hazırda təhsil sisteminin müxtəlif sahələri üzrə çoxlu sayda Dövlət Proqramı hazırlanmış, təsdiq edilmiş və həyata keçirilməkdədir. Dövlət Proqramları təhsilin məzmununun yeniləşdirilməsi, yeni proqram, dərslik və dərs vəsaitlərinin hazırlanması, təhsilin idarə olunmasının təkmilləşdirilməsi, təhsil müəssisələrinin maddi-texniki və tədris bazasının möhkəmləndirilməsi, tədris prosesində müasir informasiya-kommunikasiya texnologiyalarından istifadə olunması, istedadlı uşaq və gənclərin yaradıcılıq potensialının inkişafı, xaricdə təhsil və digər əhəmiyyətli sahələri əhatə edir.

Bildirildi ki, Sumqayıt şəhərində yüksək intellektual səviyyəyə və praktiki iş qabiliyyətinə, yeni texnologiyalara yiyələnən, informasiya axınında çevik istiqamət tapmağı bacaran gənclər çoxdur. Güclü intellektual kadr potensialına ehtiyac həmişə var. Təbii ki, gənclər də öz növbəsində bu diqqət və qayğıya layiqli cavab verməli, onlara göstərilən yüksək etimadı bütün imkanlardan istifadə etməklə doğrultmalıdırlar.

Azərbaycan müəllimi.- 2013.- 1 fevral.- S.7.