"Oğul, bu Qurana and iç ki..."

Bu dünyada elə insanlar var ki, ömrü yaşadığı illərlə hesablanır. İnsanlar da var ki, nə qədər, neçə il yaşamağının fərqinə varılmadan gördüyü işlər, unudulmaz, əvəzsiz əməlləri, yazıb yaratdıqları əsərləri, təmənnasız yaxşılıqları ilə həmişə diqqət mərkəzində olur. Məncə bunun özü də böyük bir xoşbəxtlikdir. Belə bir xoşbəxtliyi qazanmaq isə heç də hamıya nəsib olmur. Haqqında söz açacağım Ələşrəf Niftiyev məhz belə xoşbəxtliyi zəhməti, dözümü, iradəsi, ən əsası isə bacarığı, istedadı və insanlığı ilə əldə edib.

Bu günlərdə Ələşrəf müəllimin gərgin əməyinin, yuxusuz gecələrinin məhsulu olan "Oğul, bu Qurana and iç ki..." kitabını birnəfəsə oxudum. Sanki onu yenidən kəşf etdim. Düşündüm ki, demək insan ömrü ilə həyatı keşməkeşli vəhdət təşkil etməsə, bəlkə də həyat maraqsız olar. Amma yaradıcı insanların həyatı bu keşməkeşlər içərisində göyərir, bitir və həmişəyaşıl bir ömrə çevrilir.

Ələşrəf Niftiyev də özünün yaradıcılığı ilə ürəklərdə yaşayan, ömür yollarında həmişəyaşıl iz qoyan şəxsiyyətlərdəndir. İnsanpərvərliyi, haqq-ədalət uğrunda mübarizə aparan həssas insani keyfiyyətləri ilə seçilən böyük bir ürək sahibi kimi yadda qalır.

Bir Quran ayəsində isə deyilir: "Dünyaya göz açan əməlisalehləri əbədi xoşbəxtliyə aparan bir işıq var. Bu işıq Allah nurundan yaranmışdır. Allah istədiyi adamı öz işığına yönəldir".

Bəli, haqqında oxuculara söhbət açmaq istədiyimiz "Oğul, bu Qurana and iç ki..." povesti III dərəcəli "Vətənə xidmətə görə" ordenli, dövlət qulluğu təqaüdçüsü və əmək veteranı, Azərbaycan Jurnalistlər Birliyinin üzvü Ələşrəf Niftiyevin ikinci kitabıdır. Onun "Ömür yolu nur yolu" adlı birinci kitabı haqqında da 2010-cu ildə yazı yazmışdım. Hələ o vaxt Ələşrəf müəllimin keçdiyi mənalı həyat yolu barədə ətraflı öyrənmişdim. O, 1945-ci ildə Masallı şəhərində dünyaya göz açıb, 1961-ci ildə N.Nərimanov adına Masallı şəhər 2 nömrəli orta məktəbini, 1963-cü ildə Lənkəran Pedaqoji Texnikumunu, 1970-ci ildə isə M.F.Axundov adına Xarici Dillər İnstitutunun rus dili fakültəsini bitirib. Ələşrəf müəllim müxtəlif məktəblərdə müəllim işləyib, metodist və ali kateqoriyalı müəllim, maarif əlaçısı, digər təltiflərə də layiq görülüb. Sonradan isə uzun illər müxtəlif məsul vəzifələrdə çalışıb.

Ə.Niftiyevin araya-ərsəyə gətirdiyi, "Elm və təhsil" nəşriyyatı tərəfindən işıq üzü görmüş, 100 səhifəlik "Oğul, bu Qurana and iç ki..." povestində baş qəhrəmanın çətin uşaqlıq illəri geniş yer alır. Yeniyetməlik və gənclik dövründə öz zəhməti ilə qazandığı uğurları gözü götürməyən və ona xəyanətkar və riyakarların bəd əməlləri xeyirxahlıqla tənqid olunur. Əsərdə uzun əzab-əziyyətlərdən, məşəqqətlərdən sonra bəraət almış, hüquqları bərpa olmuş gənc bir ziyalının taleyindən söhbət açılır, mehriban, səmimi, xeyirxah və mərhəmətli insanlar xatırlanır.

Onu da qeyd edək ki, əsər əyalət rayonlarından birində baş vermiş konkret bir hadisədən bəhs edir.

Ələşrəf müəllimin sanki, özünün keçdiyi həyat yolundan bəhs edən bu bədii əsər oxucular tərəfindən böyük maraqla qarşılanıb.

Ömrünün 68-ci baharını yaşayan, yazıb-yaratmaqdan doymayan, fikir və düşüncələrini əsərlərə çevirən Ələşrəf Nuru oğluna yeni-yeni yaradıcılıq uğurları arzulayır və inanırıq ki, o, hələ neçə-neçə belə dəyərli əsərlər yazacaq.

Ədalət DAŞDƏMİRLİ

Azərbaycan müəllimi.- 2013.- 22 fevral.- S.7.