Təsviri incəsənət dərsliklərdə

Şagirdlərin inkişaf etmiş intellektual şəxsiyyət kimi formalaşmasında hər bir fənnin öz yeri var. Ümumtəhsil məktəblərində tədris olunan təsviri incəsənət fənni isə şagirdin psixoloji inkişafındakı roluna görə xüsusilə fərqlənir.

Təsviri incəsənət fənni şagirdin emosional hissiyyatını inkişaf etdirir, gözəllik yaratmaq və onu qiymətləndirmək bacarığını artırır. Təsviri incəsənət uşaqların təsəvvürünü, yaradıcılıq bacarığını inkişaf etdirir.

Müasir təhsilimizdə ibtidai siniflərdə tətbiq olunan təsviri incəsənət fənni şagirdlərin maraq göstərdiyi, sevdiyi fənlərdəndir. Şagirdlər bu dərslərdə öz bacarıqlarını nümayiş etdirmək üçün xüsusi həvəs göstərirlər. Kurikulum əsasında hazırlanmış dərsliklər əsasında şagirdlər doğma yurdumuzun, müxtəlif xalqların incəsənəti ilə yaxından tanış olurlar.

İncəsənət haqqında, incəsənət dili haqqında şagirddə yaranan təsəvvür, anlayış onun gələcəkdə yüksək intellektual səviyyəli bir şəxsiyyət kimi formalaşmasında böyük rol oynayır. Şagirdin hər bir xalqın özünəməxsus əşya formasını, ornamentini, obraz və motivləri, simvolları, rəng uyğunluğunu tanıması, fərqləndirməsi çox təqdirəlayiqdir.

Hər bir mövzunu şagirdlərə tədris etdikcə onların marağı, həvəsi daha da artır. Dərslikdə verilən istiqamətlər hətta rəssamlıq qabiliyyəti olmayan hər bir şagirddə də müəyyən bacarıqların formalaşmasına çox böyük kömək edir.

Şagirdlər hər dərsdə yeni terminlər öyrənir. Terminlərin izahı isə dərslikdə və müəllim üçün metodik vəsaitdə çox gözəl açıqlanır (izah edilir).

Şagirdlər ibtidai siniflərdən artıq təsviri incəsənətin növ və janrları haqqında ətraflı məlumat alır, onları bir-birindən fərqləndirmək yollarını öyrənir.

Dərslikdə hər bir mövzu üzrə yaradıcı tapşırıq və sualların verilməsi də şagirdlərin bədii yaradıcılıq bacarıqlarının inkişaf etdirilməsində mühüm əhəmiyyətə malikdir.

Mən artıq 14 ildir ki, təsviri incəsənət fənnini tədris edirəm. Bu illər ərzində şagirdlərə bu fənnə maraq oyatmağa çalışmışam. Açıq demək lazımdır ki, bu illər ərzində ənənəvi üsulla yazılan dərsliklərlə tədris edərkən çox çətinliklərlə qarşılaşırdım. Əyani vəsaitlər yox dərəcəsində idi. Kurikulumla yazılan təsviri incəsənət dərslikləri ilə işlədiyim 5 il ərzində şagirdlərin bu fənnə marağının necə dəyişdiyini aşkar izləmək mümkündür. Eyni zamanda yaradıcı şagirdlərin sayı artmış, onların əl işləri müxtəlif sərgilərdə mükafatlara layiq görülmüşdür.

Kurikulumla yazılan dərsliklərin bir üstünlüyü də müəllim üçün metodik vəsaitin və iş dəftərinin olmasındadır. Bu vəsaitlər müəllimə dərsin keçilməsində, şagird nailiyyətinin qiymətləndirilməsində, meyarların seçilməsində çox gözəl istiqamət verir.

Ümumiyyətlə, kurikulumla yazılan dərsliklər çox keyfiyyətli, səmərəli və uğurlu dərsliklərdir. Buna görə müəlliflərə razılıq hissini çatdırmaqla, növbəti dərsliklərin hazırlanmasında uğurlar diləyirəm.

Gülnar ƏLİYEVA,

Bakıdakı 6 nömrəli məktəb-liseyin müəllimi

Azərbaycan müəllimi.- 2013.- 29 mart.- S.6.