Bakı Slavyan Universiteti Bolqarıstanın

Sofiya Universitetində yeni mərkəz açıb

Bu günlərdə Bolqarıstan Respublikasının 125 illiyini qeyd edən Müqəddəs Kliment Oxridski adına Sofiya Universitetində Bakı Slavyan Universiteti tərəfindən yaradılmış Azərbaycan Dili və Mədəniyyəti Mərkəzinin təntənəli açılış mərasimi keçirilib. Mərkəzin açılışında Sofiya Universitetinin rektoru, professor İ. İlçev, Bakı Slavyan Universitetinin nümayəndə heyəti, Bolqarıstan Respublikası parlamentinin üzvü Q.Svilenski, Azərbaycan Respublikasının Bolqarıstandakı fövqəladə və səlahiyyətli səfiri E.Kərimov, Rusiya, Ukrayna, Belarus, Moldova, Qazaxıstan və Gürcüstanın bu ölkədəki səfirləri, ölkənin dövlət və qeyri-hökumət təşkilatlarının təmsilçiləri, Azərbaycan diasporunun nümayəndələri iştirak ediblər.

Mərkəzin açılış mərasimini açıq elan edən Şərq Dilləri və Mədəniyyəti Mərkəzinin müdiri, professor A. Fedotov tədbirin qədim tarixə və zəngin ənənələrə malik Sofiya Universitetinin həyatında mühüm hadisə olduğunu qeyd edib. Universitetin rektoru, professor İ. İlçev BSU tərəfindən yaradılan Azərbaycan Dili və Mədəniyyəti Mərkəzinin təkcə iki ali məktəb arasında əməkdaşlıq əlaqələrinin deyil, həm də xalqlar arasında dostluq münasibətlərinin möhkəmlənməsində mühüm rol oynayacağına əmin olduğunu bildirib. Rektor Mərkəzin BSU tərəfindən qısa bir müddətdə tərtib edilərək Azərbaycana maraq göstərəcək bolqar tələbələrinin istifadəsinə verilməsini yüksək qiymətləndirib.

BSU-nun tədris işləri üzrə prorektoru, professor Asif Hacıyev tədbir iştirakçılarını Bakı Slavyan Universitetinin rektoru, professor Kamal Abdullayevin adından salamlayaraq onun təbriklərini Sofiya Universitetinin rəhbərliyinə və mərasimə dəvət olunmuş qonaqlara çatdırıb. Qeyd edilib ki, Bakı Slavyan Universiteti Sofiya Universitetində fəaliyyətə başlayan mərkəzə xüsusi diqqətlə yanaşacaq, onu dərslik və lüğətlər, tədris vəsaitləri və elmi ədəbiyyatla mütəmadi olaraq təmin edəcək, universitetlər arasında müəllim və tələbə mübadiləsinə xüsusi önəm verəcəkdir.

Tədbirdə Azərbaycan Respublikasının Bolqarıstandakı fövqəladə və səlahiyyətli səfiri E. Kərimov, MDB Xalqları ilə Dostluq Federasiyasının sədri, professor Z. Zaxariyev, mərkəzin müdiri S.Şiqayeva və başqaları çıxış edərək Azərbaycan Dili və Mədəniyyəti Mərkəzinə uğurlar arzuladılar.

BSU tərəfindən ilk dəfə olaraq MDB məkanından kənarda, Bolqarıstanın Sofiya Universitetində yaradılan Azərbaycan Dili və Mədəniyyəti Mərkəzi Azərbaycan Respublikasının dövlət atributları ilə, elmi və tədris ədəbiyyatı nümunələri, xalqımızın qədim tarixi və zəngin mədəniyyətinə dair məlumatlarla, Azərbaycan dilinin tədrisi prosesində, mədəni-kütləvi tədbirlərdə istifadə ediləcək müasir texniki avadanlıqlarla təmin edilib, rəngarəng reproduksiyalar və şəkillərlə bəzədilib.

Açılış mərasiminin yüksək səviyyədə təşkili və keçirilməsi mərkəzin yaxın gələcəkdə Azərbaycanı təbliğ və tədqiq edən müasir tədris məkanına və maraqlı mədəniyyət guşəsinə çevriləcəyinə əminlik yaradır.

Şakir CƏFƏROV

Azərbaycan müəllimi.- 2013.- 4 oktyabr.- S.5.