Pedaqoqlar vahid müəllim formasına

keçməyi necə qiymətləndirirlər?

Son illər respublikamızda şagirdlərin vahid məktəbli formasına keçidi müvəffəqiyyətlə həyata keçirilib. Hazırda gündəmdə olan məsələlərdən biri isə müəllimlərin vahid formaya keçidi ilə bağlıdır. Qeyd edək ki, bir çox inkişaf etmiş ölkələrdə müəllimlərin xüsusi geyim forması var. Azərbaycanda da müəllimlərin vahid geyim formasına keçidi ilə bağlı tez-tez təkliflər səsləndirilir. Artıq paytaxtın 20-dən artıq məktəbində könüllü olaraq müəllimlər vahid geyim formasına keçiblər. Pedaqoqların sözügedən məsələ ilə bağlı fikirlərini öyrənmək məqsədilə paytaxtın bir neçə məktəblərində olduq.

Sinfə daxil olan müəllim

geyimi ilə nümunə olmalıdır

İradə MURQUZOVA,

171 nömrəli tam orta məktəbin direktoru

- Məktəbimizdə müəllimlərin vahid forması artıq 6 ildir ki tətbiq olunur. Bir dəfə tənəffüs zamanı iki şagirdin söhbətinə şahid oldum. Şagirdlər maddi cəhətdən imkanlı və imkansız müəllimlərin geyimlərini müzakirə edirdilər. Bu, mənə çox pis təsir etdi və Pedaqoji Şurada məsələ ilə bağlı müzakirə apardıq. Demək olar ki, müəllimlərin 90-95%-i vahid formaya keçidi dəstəklədi. Sonra biz parçalar aldıq və hər bir müəllim özü üçün forma tikdirdi. Hazırda məktəbimizdə fəsillərə uyğun olaraq hər müəllimin 4 müxtəlif forması var. Bu gün artıq bizim məktəbdə müəllimlərin geyimi nə şagirdlərdə, nə valideynlərdə, nə də ictimaiyyətin digər nümayəndələrində narazılıq yarada biləcək tərzdədir. Düşünürəm ki, sinfə daxil olan müəllim geyimi ilə nümunə olmalıdır, müəllim adına xələl gətirməməlidir. Bundan başqa, müxtəlif peşə sahiblərinin nümayəndələrinin vahid forması mövcuddur. Bu forma onları ictimaiyyət arasında da fərqləndirir. Müəllim əgər bir ictimai nəqliyyatda və ya digər yerlərdə formada olarsa özünü daha məsuliyyətli hiss edər.

Müəllimlərin hamısının eyni geyim

formasında olması yaxşı haldır

Xatirə ZEYNALOVA,

171 nömrəli tam orta məktəbin Azərbaycan dili və ədəbiyyat müəllimi

- Vahid formaya keçid müəllimlərin şəxsi təşəbbüsü idi. Şəxsən mən buna müsbət yanaşıram və vahid geyimin tərəfdarıyam. Ona görə ki, vahid geyim forması müəllimin şagirdlər arasında imicinin daha da güclənməsinə xidmət edir. Eyni zamanda, bunun digər müsbət tərəfləri də var. Məsələ ondadır ki, müəllimlər də şagirdlər kimi eyni imkana malik deyil. Elə müəllim var ki, məktəbə gündə bir paltar geyməyə imkanı yoxdur. Bəzən bu amil müəllimdə kompleks yaradır, şagirdlər arasında sıxılır. O da ola bilər ki, müəllim dəbdəbəli paltar geydiyi üçün şagirdlərin dərsə olan diqqəti yayınsın. Bütün bu və buna bənzər digər problemlərin aradan qaldırılması baxımından müəllimlər üçün vahid geyim formasının tətbiqinin tərəfdarıyam. Müəllim vahid geyim formasında sinfə girsə, şagirdlər qarşısında yaxşı görsənər. O baxımdan, müəllimlərin hamısının eyni geyim formasında olması yaxşı haldır.

Hər bir məktəbin özünün

xüsusi forması olsa daha yaxşı olar

Süsən SALMANOVA,

201 nömrəli tam orta məktəbin direktoru, əməkdar müəllim

Hazırda bizim məktəbdə müəllimlərin vahid forması tətbiq olunmayıb. Lakin buna baxmayaraq müəllimlərin geyimi məktəb rəhbərliyi tərəfindən daim diqqətdə saxlanılır. Düşünürəm ki, müəllim geyimi, davranışı ilə hər bir şəxsə örnək olmalıdır. Biz məktəbdə müəllimlərin vahid forması ilə bağlı müxtəlif müzakirələr aparırıq və bu məsələ ilə bağlı hazırlıq dövründəyik. Bildiyiniz kimi, bu məsələyə bir az da həssas yanaşmaq lazımdır. Çünki vahid formaya keçid məcburi deyil və pedaqoji kollektivin istəkləri ön planda tutulmalıdır. Lakin mən bunun tərəfdarıyam və müəllimlərimizin də demək olar ki, böyük əksəriyyəti vahid formaya keçməyi istəyirlər. Müasirliyi və klassikanı özündə əks etdirən bir forma seçməyi planlaşdırırıq. Məncə vahid forma müəllimlərdə öz peşələrinə qarşı əlavə stimul yaradar. Bu, şagirdlərin müəllimə qarşı olan hörmət və ehtiramını daha da artırar. Həm də müəllimlər maddi cəhətdən də böyük bir yükdən azad olarlar. Fikrimcə, hər bir məktəbin özünün xüsusi forması olsa daha yaxşı olar. Müəllimlər öz işlədikləri məktəblərə görə fərqlənsələr rəngarənglik olar.

Məktəbimizdə 2 ildir ki, müəllimlər vahid forma geyinirlər

Gülnarə VƏLİYEVA,

38 nömrəli tam orta məktəbin kimya müəllimi

- Məktəbimizdə müəllimlər üçün vahid forma artıq 2 ildir ki, tətbiq olunur. Vahid formaya keçid müəllimlərin şəxsi təşəbbüsü idi. Biz müəllimlər bu formalara keçməklə həm şagirdlərə bir nümunə olmağı, həm də müəllimlər arasında maddi cəhətdən fərqlənməyi aradan götürməyi düşünürdük. Bu məqsədlə forma seçimi üçün ilk öncə parçalar aldıq və məsləhətləşərək vahid bir forma seçdik. Sonra hər bir müəllim şəxsi dərzisində bu formanı tikdirdi. Həmin forma bizə çox ucuz qiymətə başa gəldi. Artıq hər gün işə gələndə fikirləşmirik ki, bu gün məktəbə hansı geyim ilə gedək. Bilirik ki, bizim məktəbə geyməyə vahid formamız var. Düşünürəm ki, vahid forma müəllimləri daha da məsuliyyətli edir və onlarda bu müqəddəs peşəyə qarşı sevgini artırır. Bundan başqa, şagirdlər də qarşılarında səliqə ilə geyinmiş müəllim görürlər. Digər tərəfdən, şagirdin qarşısında müəllimin vahid formada olması özü də bir tərbiyəvi əhəmiyyət kəsb edir.

Niyazi RƏHİMOV

Azərbaycan müəllimi.- 2013.- 18 oktyabr.- S.6.