Şamaxıda şahmat turnirinə yekun vurulub

Şamaxı Rayon Uşaq-Gənclər Şahmat Məktəbində "Novruz turniri" adı altında məktəbli şahmatçılar arasında şəhər birinciliyi keçirilib. Hər il ənənəvi keçirilən turnir oğlan və qız şahmatçıların iştirakı ilə İsveçrə sistemi üzrə təşkil olunub. 9 turdan ibarət yarışda 96 şahmatçı 5 yaş qrupunda mübarizə aparıb.

Şamaxı şəhər 1 nömrəli tam orta məktəbin IX sinif şagirdi Ülvi Xudiyev və şəhər 2 nömrəli tam orta məktəbin IX sinif şagirdi Niyaz Məmmədov ümumi turnirin qalibi elan olunublar.

Qızlar arasında müvafiq yaş qruplarında şəhər 2 nömrəli tam orta məktəbin I sinif şagirdi Xədicə Əhmədova (8 yaş), həmin məktəbin IV sinif şagirdi Aytac Şirəliyeva ( 10 yaş), Şamaxı Avropa liseyinin V sinif şagirdi Fəridə Rəhimova (12 yaş), Mədrəsə qəsəbə VII sinif şagirdi Səfiyyə Əlləzova (14 yaş), Şamaxı Avropa liseyinin VIII sinif şagirdi İzzət Ağayeva (16 yaş) bütün rəqiblərini qabaqlayaraq qalib gəliblər.

Oğlanların mübarizəsində isə şəhər 2 nömrəli tam orta məktəbin II sinif şagirdi Cəlil Əliyev (8 yaş), həmin məktəbin IV sinif şagirdi Mirəziz Babayev (10 yaş), şəhər 9 nömrəli tam orta məktəbin VI sinif şagirdi Ramazan Məcidov (12 yaş), Mədrəsə qəsəbə tam orta məktəbinin VIII sinif şagirdi Gülməmməd Xəlilli (14 yaş) çempion adına layiq görülüblər. Çempionlara və II-III yerləri tutan şahmatçılara diplomlar və hədiyyələr təqdim olunub.

Yarışın nəticələrinə əsasən şahmat məktəbləri komandalarının zona birinciliyində iştirak edəcək oğlan və qızlardan ibarət rayon komandasının üzvləri də müəyyənləşdirilib.

Turnir təsnifat xarakterli olduğundan şahmatçılara müvafiq idman dərəcələri də verilib.

A.AĞAYEV,

Şamaxı Rayon Uşaq-Gənclər

Şahmat Məktəbinin direktoru

Azərbaycan müəllimi.- 2014.- 4 aprel.- S.10.