Ən yaxşı müəllimlərimiz

Xalidə NƏZƏROVA,

Sumqayıt şəhəri Texniki və Təbiət Elmləri Liseyinin

biologiya müəllimi

1959-cu ildə anadan olub. 1984-cü ildə Bakı Dövlət Universitetinin biologiya fakültəsini bitirib. 2007-2008-ci tədris ilində keçirilən "Ən yaxşı müəllim" müsabiqəsinin qalibi olub. 2013-cü ildə Azərbaycan Respublikası Prezidentinin sərəncamı ilə "Əməkdar müəllim" fəxri adına layiq görülüb. Şagirdləri respublika fənn olimpiadalarının və bir çox müsabiqələrin qalibləri olublar. Təhsil sahəsində aparılan islahatlarda fəal iştirak edir. Bir çox treninqlərin iştirakçısıdır. Şagirdlərindən bir çoxu qəbul imtahanlarında yüksək nəticələr göstərərək respublikamızın nüfuzlu ali təhsil müəssisələrinə daxil olublar.

Xudaverdi İSMAYILOV,

Sumqayıt şəhəri Təbiət Elmləri

Təmayüllü Gimnaziyanın kimya müəllimi

1957-ci ildə Zəngilan rayonunda anadan olub. 1976-cı ildə Azərbaycan Dövlət Pedaqoji İnstitutunun kimya fakültəsini bitirib. 2001-ci ildən Sumqayıt şəhəri Təbiət Elmləri Təmayüllü Gimnaziyada işləyir. Bir çox treninq və layihələrdə iştirak edərək sertifikatlar əldə edib. 2009-cu ildə 10-cu və 11-ci siniflərin, 2010-cu ildə isə 8-ci sinif kimya dərsliklərinin rəyçisi olub. Şagirdləri müxtəlif illərdə respublika fənn olimpiadalarında yüksək nəticələr əldə edib. 2009-cu ildə keçirilən "Ən yaxşı müəllim" müsabiqəsinin qalibi olub. 2012 və 2013-cü illərdə keçirilən qəbul imtahanlarında şagirdlərinin 100%-i ali məktəblərə daxil olub, onlardan 50%-dən çoxu isə 600-dən çox bal toplayıb. 2012-ci ildə Azərbaycan Respublikası Prezidentinin sərəncamı ilə "Əməkdar müəllim" fəxri adına layiq görülüb.

Fazil ELLAZOV,

Sumqayıt şəhəri Təbiət Elmləri Təmayüllü

Gimnaziyanın Azərbaycan dili və ədəbiyyat müəllimi

1959-cu ildə Gədəbəy rayonunda anadan olub. BDU-nun filologiya fakültəsini bitirib. 1993-cü ildən pedaqoji fəaliyyətə başlayıb. Elmi, pedaqoji, publisistik yazıları müxtəlif mətbuat orqanlarında çap olunub. İki dərsliyin, bir çox vəsaitin həmmüəllifi, bir neçə vəsaitin və bədii kitabın isə redaktorudur. Şagirdləri fənn olimpiadalarının respublika turunda, inşa müsabiqələrində uğurlu nəticələr göstərib, yüksək yerlər tutub, qəbul imtahanlarında yüksək bal toplayıblar. Ekspert kimi TQDK ilə əməkdaşlıq edir. 2009-cu ildə "Ən yaxşı müəllim" müsabiqəsinin qalibi olub. Azərbaycan Respublikası Prezidentinin sərəncamı ilə "Tərəqqi" medalı ilə təltif olunub.

Esmira MUSAYEVA,

Sumqayıt şəhəri 11 nömrəli

tam orta məktəbin tarix müəllimi

1969-cu ildə Sumqayıt şəhərində anadan olub. 1993-cü ildə Rusiya Federasiyasındakı Volqoqrad Dövlət Universitetinin tarix fakültəsini bitirib. Müxtəlif layihə, treninq və seminarların, beynəlxalq proqramların iştirakçısı olub. 2009-cu ildə Azərbaycan Respublikası Prezidentinin sərəncamı ilə "Tərəqqi" medalı ilə təltif edilib. 2007-2008-ci və 2012-2013-cü tədris illərində keçirilən "Ən yaxşı müəllim" müsabiqələrinin qalibi olub. Şagirdləri dəfələrlə fənn olimpiadalarında, müxtəlif müsabiqələrdə uğur qazanıb. Qəbul imtahanlarında yüksək nəticələr əldə edən şagirdləri müxtəlif ali təhsil müəssisələrinə daxil olublar. Tarix dərsliklərində rəyçi və dərsliklərin qiymətləndirilməsində ekspert kimi çalışır.

Gülər MƏMMƏDZADƏ,

Sumqayıt şəhəri 27 nömrəli tam orta məktəbin ingilis dili müəllimi

1978-ci ildə Sumqayıt şəhərində anadan olub. 2002-ci ildə Azərbaycan Dillər Universitetinin magistratura şöbəsini fərqlənmə diplomu ilə bitirib. Əmək fəaliyyətinə 1999-cu ildə hazırda çalışdığı 27 nömrəli tam orta məktəbdə başlayıb. 2003-cü ildə ABŞ Dövlət Departamentinin Təhsil və Mədəniyyət İşləri üzrə Bürosu tərəfindən yaradılan "Project Harmoniya" təşkilatının Məktəb Əlaqələndirmə və Mübadilə Proqramında layihə koordinatoru işləyib. İnternetin təhsilə inteqrasiyası, yeni təlim metodlarından istifadə və vətəndaş təhsili üzrə bir sıra treyninqlərin iştirakçısı olub. 2005-ci ildə qeyd olunan proqram çərçivəsində ABŞ-ın Corciya ştatının Atlanta şəhərinə mübadilə müəllimi kimi səfər edib.

2009-cu ildə "Ən yaxşı müəllim" müsabiqəsinin qalibi olub. Hazırda bir sıra innovativ təhsil proqramlarında və treninqlərdə iştirak edir.

Hazırladı: Niyazi RƏHİMOV

Azərbaycan müəllimi.- 2014.- 6 iyun.- S.8.