Təltif olunan təhsil işçilərinə

mükafatlar təqdim edilib

Təhsil Nazirliyində Azərbaycan Respublikası Prezidentinin sərəncamları ilə "Tərəqqi" medalı, "Əməkdar müəllim" və "Əməkdar bədən tərbiyəsi və idman xadimi" fəxri adları ilə təltif olunan təhsil işçilərinə mükafatların təqdim olunması mərasimi keçirilib.

Görüşdə təhsil naziri Mikayıl Cabbarov Azərbaycan Respublikasının Prezidenti cənab İlham Əliyevin müvafiq sərəncamları ilə 5 oktyabr - Beynəlxalq Müəllimlər Günü ərəfəsində "Tərəqqi" medalı, "Əməkdar müəllim" və "Əməkdar bədən tərbiyəsi və idman xadimi" fəxri adları ilə təltif olunmuş təhsil işçilərini təbrik edib. Nazir bu sərəncamların ölkə Prezidentinin təhsil sahəsinə olan diqqət və qayğısının bariz nümunəsi olduğunu bildirib. Mikayıl Cabbarov təhsil sahəsində islahatların uğurla həyata keçirilməsində müəllim peşəsinin ictimai nüfuzunun artırılmasının, onun yüksək maddi və mənəvi motivasiyasının vacib olduğunu vurğulayıb. Bütün dövrlərdə hər bir ölkənin uğurlu gələcəyinin, ayrı-ayrı sahələrdə əldə edilən nailiyyətlərin təhsilin inkişaf səviyyəsi ilə müəyyən olunduğunu söyləyən nazir inkişaf edən ölkəmizdə təhsil sisteminin daim yenilənməsi, dünya təhsilindəki sürətli tərəqqi proseslərindən faydalanması istiqamətində işlərin görüldüyünü nəzərə çatdırıb.

Təhsil naziri Mikayıl Cabbarov bildirib ki, 89 ümumtəhsil müəssisəsində məktəbəhazırlıq qrupları yaradılıb. Bu proses məktəbəqədər təhsilin inkişafına dair cari ilin əvvəlində Heydər Əliyev Fondunun prezidenti, ölkənin birinci xanımı Mehriban Əliyevanın iştirakı ilə keçirilən tədbirdə qoyulan hədəfə doğru bir addımdır.

Təhsil naziri vurğulayıb ki, bu il paytaxtın bütün ümumtəhsil məktəb müəllimləri sınaq qiymətləndirməsində iştirak edib.

Mikayıl Cabbarov yeni əməkhaqqı sisteminin tətbiqinin dərs yükünün və hər bir dərs saatı üçün baza əməkhaqqının artırılması ilə mümkün olacağını qeyd edib. Yaxın zamanlarda bununla bağlı konkret təkliflər Nazirlər Kabinetinə təqdim olunacaq.

Nazir bildirib ki, təhsil sahəsi üçün vaxtilə ən böyük problem saxta diplomlu müəllimlərin işə qəbulu olub. Təhsil Nazirliyi bu sahədə ciddi araşdırmalar aparır və artıq belə müəllimlərin işə qəbulu mümkün olmayacaq.Bu sahədə görülən işlərin nəticəsi olaraq Azərbaycan Müəllimlər İnstitutunun Gəncə filialının fəaliyyəti dayandırılıb, orada qanuni təhsil alan tələbələr digər ali təhsil müəssisələrində yerləşdirilib. Mikayıl Cabbarov qeyd edib ki, Təhsil Nazirliyində yaradılan vahid məlumat bazası gələcəkdə saxta diplom probleminin yaranmasının qarşısını alacaq.

Nazir onu da qeyd edib ki, Təhsil Nazirliyi tərəfindən ümumtəhsil müəssisələrində vahid imtahan bazasında buraxılış və qəbul imtahanlarının keçirilməsi ilə bağlı təşəbbüs irəli sürülüb. Bu yeniliklər həm orta ixtisas təhsili müəssisələrini, həm yaradıcılıq ali təhsil müəssisələrini, həm də bir sıra digər təhsil müəssisələrini əhatə edəcək. Bununla bağlı Tələbə Qəbulu üzrə Dövlət Komissiyası və Təhsil Nazirliyi arasında məsləhətləşmələr aparılır. 2014-2015-ci tədris ilindən başlayaraq yeni qaydaya əsaslanan imtahanlar həmin müəssisələri əhatə edəcək. Bu, Kənd Təsərrüfatı Nazirliyinin mövqeyi nəzərə alınmaqla kənd təsərrüfatı, eləcə də idman ixtisaslarına şamil oluna bilər.

Təhsil naziri Mikayıl Cabbarov çıxışında bildirib ki, 2015-ci il yanvarın 1-dən nəzərdə tutulan regional təhsil idarələrinin yaradılması gələn ilin dövlət büdcəsində müvafiq vəsait nəzərdə tutulmadığı üçün təxirə salınıb. Növbəti ildə də rayon təhsil şöbələri mövcud sistem şəklində çalışacaq. Bakı Şəhəri üzrə Təhsil İdarəsində isə struktur islahatları davam etdiriləcək.

"Azərbaycan Respublikasında təhsilin inkişafı üzrə Dövlət Strategiyası"nın təsdiq olunduğu bir il ərzində təhsilin keyfiyyətinin artırılması istiqamətində atılan addımların əhəmiyyətini vurğulayan Mikayıl Cabbarov qarşıda duran işlərin həyata keçirilməsində müəllimlərin üzərinə mühüm vəzifələr düşdüyünü qeyd edib.

Görüşdə Bakı şəhəri 6 nömrəli məktəb-liseyin tarix müəllimi Elmin İmanov, Bakı şəhəri 135 nömrəli tam orta məktəbin coğrafiya müəllimi Rafiq Məmmədov, Xaçmaz rayonu Xudat şəhər 2 nömrəli tam orta məktəbin müəllimi Nəzakət Əhmədova təhsil işçilərinə göstərilən yüksək diqqətə görə dövlət başçısına minnətdarlıqlarını bildirib, şagirdlərin hərtərəfli bilik və bacarıqlara malik şəxsiyyət kimi yetişdirilməsi işində əzmlə çalışacaqlarını qeyd ediblər.

Tədbirin sonunda fəxri adlarla təltif olunan təhsil işçilərinə medal və vəsiqələr təqdim olunub.

Azərbaycan müəllimi.- 2014.- 17 oktyabr.- S.3.