9 yaşlı Zeynəb "Liseyin ulduzu"dur

Zeynəb Nəcəfzadə 2005-ci ildə Bakı şəhərində anadan olub. 4 yaşında "Azəri inciləri" rəqs ansamblında uğurlu çıxışlar edib. Hazırda Bakı Avropa Liseyinin IV, Aytəkin Axundovanın sinfində təhsil alır. Dərs əlaçısı Zeynəb böyüyəndə diplomat olacağını söyləyir, xarici dillərə böyük maraq göstərir. Q.Qarayev adına 8 nömrəli musiqi məktəbinin skripka şöbəsində təhsil alır. T.İsmayılov adına Uşaq-Gənclər Yaradıcılıq Sarayının "Uşaq dünyası" rəsm qalereyasının təsviri-tətbiqi sənət dərnəyinin üzvüdür. İlk gündən fərqli düşüncələri, rəssamlığa olan marağı rəsm müəllimi Aynurə Həşimovanın diqqətini cəlb edib.

Z.Nəcəfzadənin 100-dən artıq müxtəlif mövzularda rəsm əsərləri var. Çəkdiyi rəsmlərin bir çoxunu yağlı boya, quaşla, vitrajla işləyib. Azərbaycanda ilk qızlar məktəbinin banisi "Hacı Zeynalabdin Tağıyevin portreti və neft buruqları", "Bakının tarixi: dünən və bu gün", "Rəşid Behbudov", "Puşkin", "İngiltərədəki "Biq Ben saatı", "Fransadakı Eyfel qülləsi", tanınmış şəxsiyyətlərin portretlərini, Nizami Gəncəvinin "Xəmsə"sini (beşlik) öz rəsmlərində həvəslə canlandırıb. Kətan üzərində işlədiyi 30-a yaxın rəsmi diplom və fəxri fərmanlara layiq görülüb. 2011-ci ildə ümummilli lider Heydər Əliyevin anadan olmasının 88-ci ildönümünə həsr olunmuş Gül bayramı sərgisində rəsmləri I yerə layiq görülüb. 2013-cü ildə Çexiyada keçirilən "İdman-biz, sülh tərəfdarıyıq" rəsm müsabiqəsinin laureatı adını qazanıb. Bakıda keçirilən Azərbaycan və Türkmənistanın diplomatik münasibətlərinin 20 illiyinə həsr olunmuş tədbirdə isə Zeynəbin "Türkmən atı və oğlan" rəsmi diploma layiq görülüb. 1 İyun Uşaqların Beynəlxalq Müdafiəsi Gününə həsr etdiyi "Yaşasın hüquqlarımız", "Planetimiz Zeynəbin gözü ilə", vətənpərvərlik mövzularında "20 Yanvar", "Xocalı faciəsi", "Vətənim" rəsmlərinə həyəcansız baxmaq olmur.

2014-cü ildə Ukraynada keçirilən beynəlxalq rəsm müsabiqəsinə qatılan Zeynəbin "Sualtı fantaziyalar" rəsmi gümüş medala layiq görülüb. Bu münasibətlə məktəbin direktoru Zülfiyyə Veysova şagirdinin böyük istedad sahibi olduğunu yüksək dəyərləndirərək onun rəsmlərindən ibarət fərdi sərgisini keçirib. Zeynəbə "Liseyin ulduzu" və Bakı Avropa Liseyinin ictimai həyatında fəal xidmətlərinə görə diplom təqdim olunub.

Azərbaycan müəllimi.- 2014.- 31 oktyabr.- S.6.