Respublika müsabiqələri laureatı

Bu torpaqda çoxlu sənət korifeyləri yetişib. Şairlər, bəstəkarlar, xanəndələr yurdu olan Fizuli rayonunda sabah adı dillər əzbəri olacaq bir istedad sahibi də xalq çalğı alətlərinin şahı sayılan tarın sirlərinə yiyələnir. Ötən illər ərzində çoxlu sayda diplom, fəxri fərmanlar sahibi olan 16 yaşlı Atabəy İsmayılov Bakıdakı Bülbül adına Orta İxtisas Musiqi Məktəbində Əflaruz Məmmədovun tar sinfində təhsil alır. Respublika müsabiqələri laureatı, Qran-pri mükafatçısı, Prezident təqaüdçüsü olan, öz ifaçılıq qabiliyyəti ilə yaşıdlarından fərqlənən bu gənc sözün əsl mənasında istedad sahibidir. Təsadüfi deyildir ki, möhtəşəm tədbirlərdə təmsil etdiyi kollektivə başucalığı gətirən Atabəy haqqında dəfələrlə müxtəlif mətbu orqanlarında, xüsusilə Mədəniyyət və Turizm Nazirliyinin "Mədəni həyat" jurnalında bir-birindən maraqlı məqalələr dərc olunub. Haqqında yazılan "Dünyaya açılan pəncərə" oçerkində müəllif Atabəyin adının gələcəkdə korifeylər sırasında görəcəyinə zərrəcə şübhə etmir.

Atabəy İsmayılovun uğurları hər il artmaqdadır. 2014-cü il 2 fevral Azərbaycan Gəncləri Günü münasibətilə keçirilən tədbirdə musiqi sahəsində qazandığı uğurlara görə kubok və fəxri fərmanla mükafatlandırılıb. Həmin ilin iyulunda Kalmıkiya Muxtar Respublikasında yaşayan azərbaycanlıların istəyi ilə Dünya Azərbaycanlılarının Mədəniyyət Mərkəzinin (DAMM) vitse-prezidenti Rasim Məmmədovun başçılıq etdiyi nümayəndə heyəti bu ölkədə ikigünlük səfərdə olub. Səfər çərçivəsində Azərbaycan və Kalmıkiyanın mədəniyyət və incəsənət xadimləri ilə birgə keçirilən konsertdə gənc yeniyetmə öz ifası ilə tamaşaçıları məmnun edib.

Azərbaycanın Çexiya Respublikasındakı səfirliyinin dəstəyi və Azərbaycan Tələbələri Şəbəkəsi Təşkilatının dəvəti ilə Atabəy Beynəlxalq Musiqi Gününə həsr edilmiş və "Bakı-2015" birinci Avropa Oyunları münasibətilə keçirilən flaşmobda Praqa Simfonik Orkestri ilə çıxış edib. Tədbirdə istedadlı gənc, tar ifaçısı Atabəy İsmayılov və Praqa film orkestrinin ifasında məşhur bəstəkar Motsartın "Türk marşı" səsləndirilib.

Qarşıda onu hələ çoxlu səfərlər, festivallar, bayram tədbirləri gözləyir. Onların hər birində tamaşaçılar bu gəncin ifasında tarın ecazkar səsinin sehrinə düşəcəklər.

Azərbaycan müəllimi.- 2014.- 31 oktyabr.- S.6.