Azərbaycan Dövlət Mədəniyyət və İncəsənət

Universitetində "Şur" dəstgahına

həsr olunmuş tədbir keçirilib

Azərbaycan Dövlət Mədəniyyət və İncəsənət Universitetində "Muğam aləmi" IV Beynəlxalq Muğam Festivalı ərəfəsində növbəti tədbir baş tutub. Musiqi sənəti fakültəsi "Muğam sənəti" kafedrası müəllimlərinin yaradıcılıq-ifa işi "Şur" dəstgahına həsr olunan tədbiri ADMİU-nun rektoru, professor Fərəh Əliyeva açaraq Heydər Əliyev Fondunun ən möhtəşəm layihələrindən olan "Muğam aləmi" Beynəlxalq festivalının əhəmiyyətindən, muğamlarımızın bütün dünyaya tanıdılmasında böyük rolundan, onların musiqi mədəniyyətimizdəki yerindən, istedadlı xanəndələrin, ifaçıların üzə çıxarılaraq tanıdılmasından danışıb, belə tədbirlərin gələcək üçün böyük təcrübə olduğunu vurğulayıb.

Daha sonra "Muğam sənəti" kafedrasının müəllimi, xalq artisti Gülyanaq Məmmədova ifa olunacaq "Şur" dəstgahı haqqında tarixi və nəzəri baxımından məlumat verib. Dəstgah Gülyanaq Məmmədova, Xalq çalğı alətləri ifaçılığı kafedrasının dosentləri, əməkdar artistlər Vamiq Məmmədəliyev, Mirnazim Əsədullayev və tələbələrin ifasında dinləyicilərə kompozisiya şəklində təqdim edilib.

ADMİU-nun müəllim-tələbə heyətinin, muğam bilicilərinin iştirak etdikləri tədbir maraqla qarşılanıb.

 

Azərbaycan müəllimi.- 2015.- 21 fevral.- S.3.