“Sabahın alimləri” V Respublika
Müsabiqəsinin keçirilməsi
haqqında
Azərbaycan
Respublikası təhsil nazirinin əmri
Azərbaycan
Respublikasında fəaliyyət göstərən ümumi təhsil müəssisələrinin
IX-XI siniflərində təhsil alan
şagirdlərin elmi axtarışlara sövq edilməsi, onların elmi
və yaradıcılıq fəaliyyətinin
stimullaşdırılması, elmi tədqiqat
işinə meyli olan
istedadlı şagirdlərin vaxtında aşkar edilməsi, həmçinin
ciddi elmi tədqiqat nəticələri əldə
etmiş Azərbaycan məktəblilərinin
seçilib ABŞ-da
keçirilən İntel İSEF - Beynəlxalq
Elm və Mühəndislik Sərgisinə göndərilməsini təmin etmək
məqsədi ilə
ƏMR
EDİRƏM:
1. 2016-cı il 11-13 fevral tarixlərində İntel İSEF - Beynəlxalq Elm və Mühəndislik Sərgisi çərçivəsində “Sabahın alimləri” V Respublika Müsabiqəsi keçirilsin.
2. Ümumi təhsil müəssisələrinin direktorları:
2.1. 2015-ci il 1 noyabr tarixindən etibarən şagirdlərin mövzularının sabahinalimleri.edu.az saytında onlayn rejimində qeydiyyatdan keçirilməsini və 25 dekabr tarixinədək şagirdlər tərəfindən təsdiq edilmis mövzular üzrə aparılan tədqiqatların başa çatdırılmasını təmin etsinlər;
2.2. Müsabiqənin Təlim Akademiyasında iştirak etmək istəyən müəllimlərin qeydiyyatdan keçməsi 2016-cı il 15 yanvar tarixinədək təmin edilsin.
3. Müsabiqəyə elmi dəstəyin verilməsi Bakı Dövlət Universiteti (A.Məhərrəmov), Azərbaycan Texniki Universiteti (H.Məmmədov), Sumqayıt Dövlət Universiteti (E.Hüseynov), Naxçıvan Dövlət Universiteti (S.Məhərrəmov) və Qafqaz Universitetinə (Ə.Saniç) tapşırılsın.
4. Naxçıvan Muxtar Respublikasının ümumi təhsil müəssisələrində müsabiqənin təşkili ilə bağlı məsələlərin həlli Naxçıvan Muxtar Respublikasının təhsil naziri P.Nağıyevə həvalə edilsin.
5. Bakı Şəhəri üzrə Təhsil İdarəsinə, Gəncə və Sumqayıt şəhərlərinin təhsil idarələrinə, digər rayon və şəhər təhsil şöbələrinə ümumi təhsil müəssisələri arasında müsabiqənin məqsədlərinin təbliğ edilməsi, elmi tədqiqatlara cəlb olunan şagirdlərin əhatə dairəsinin genişləndirilməsi və müsabiqəyə hazırlıqla bağlı məsələlərin həllində ümumi təhsil müəssisələrinə köməklik göstərilməsi tapşırılsın.
6. Elm və ali təhsil şöbəsinin sektor müdiri, müsabiqənin direktoru G.Hüseynova:
6.1. Müsabiqənin yüksək səviyyədə keçirilməsi üçün hazırlıq işlərini həyata keçirsin;
6.2. Müsabiqənin Təlim Akademiyasının təşkili və treninqlərin keçirilməsini təmin etsin;
6.3. Müsabiqənin Münsiflər Heyətinin tərkibi haqqında təkliflər hazırlayıb Nazirliyin rəhbərliyinə təsdiq üçün təqdim etsin;
6.4. Müsabiqənin həmtəşkilatçısı olan nazirlik və təşkilatçıların birgə qərarının layihəsini hazırlayıb 20 gün müddətinə Nazirliyin rəhbərliyinə təqdim etsin;
6.5. Müsabiqənin keçirilməsi ilə bağlı satın alınması tələb olunan mal, iş və xidmətlər barədə məlumatı Əsaslı Tikinti və Təchizat İdarəsinə təqdim etsin.
7. Təhsilin inkişafı proqramları şöbəsinə (E.Əmrullayev) müsabiqədə layihələrin qiymətləndirilməsi və seçim prosesinin həyata keçirilməsinə köməklik göstərilməsi tapşırılsın.
8. Əsaslı Tikinti və Təchizat İdarəsi (A.Axundov) müsabiqənin keçirilməsi ilə bağlı müvafiq mal, iş və xidmətlərin satın alınması üzrə lazımi tədbirlərin həyata keçirilməsini təmin etsin.
9. İqtisadiyyat şöbəsi (R.Orucov) müvafiq mal və xidmətlərin satın alınması üçün Əsaslı Tikinti və Təchizat İdarəsinin sifarişi əsasında həmin idarəyə vəsaitin ayrılmasını təmin etsin.
10. Təhsil Sisteminin İnformasiyalaşdırılması İdarəsi (S.Məmmədov) Müsabiqəyə texniki dəstək verilməsini (müvafiq elektron xidmətlərin göstərilməsi) təmin etsin.
11. İnformasiya şöbəsi (E.Əliyev) əmrin çoxaldılıb aidiyyəti müəssisələrə göndərilməsini, QHT və KİV-lərlə iş sektoru (C.Valehov) əmrin Nazirliyin internet səhifəsində yerləşdirilməsini və “Azərbaycan müəllimi” qəzetində dərc olunmasını təmin etsin.
12. Əmrin icrasına nəzarət nazir müavini C.Bayramova həvalə edilsin.
Mikayıl CABBAROV,
Azərbaycan Respublikasının təhsil
naziri
27 oktyabr 2015-ci il
Azərbaycan müəllimi.-
2015.- 7 noyabr.- S.4.